Read KO E TOH TAPU KATOA TONGA KO SIOPE 16 Bible Online

KO SIOPE 16 - KO E TOH TAPU KATOA TONGA bible

KO SIOPE 16

¹PEA tali ‘a Siope, ‘o ne pehē,

²Kuo u fiu ‘i he fanongo me‘a pehē: Ko e tu‘unga fakalelu langa‘i mamahi homou kotoa.

³Lau ‘e au kuo ngata ‘a e fai ‘ata‘i lea; Pea ko e hā nai ‘a e me‘a ‘oku hoka‘i koe ke tali?

⁴Ko au foki te u lava ke lea hangē ko kimoutolu; Ka ne fetongi au ‘i heni ‘e hamou toko taha, ‘E faingofua ‘eku fokotu‘u lau kiate kimoutolu, Mo kalokalo hoku ‘ulu kiate kimoutolu.

⁵Faingofua ‘eku poupou kimoutolu ‘aki hoku ngutu, Mo fakalelu ‘aki ‘a e ngāue ‘a hoku loungutu.

⁶Kapau ‘oku ou lea, ‘oku ‘ikai lelei ai ‘eku mamahi: Pea kapau ‘oku ou ta‘ofi, tala‘ehai ‘oku mōlia ai ha‘aku me‘a.

⁷Ka ‘oku mo‘oni kuo u ka‘anga ‘i he fai ‘a ‘Ene ‘Afio: Kuo ke fakalala hoku ‘api kotoa.

⁸Pea kuo ke kofu fe‘ufe‘u au — ko e fakamo‘oni ia ‘e taha: Pea ko hoku tutue ‘oku ou hopo mo au, ‘O mātu‘aki talatalaaki‘i au.[38]

⁹Ko ‘ene houhau ‘oku hae au, ‘o fai takai: ‘Oku ne ina, ‘o fakangatata hono nifo kiate au. ‘Oku fakamāsila ‘e hoku fili ‘a e hila mai hono mata.

¹⁰‘Oku nau fakaava mio‘i honau ngutu kiate au; ‘Oku nau taa‘i pau‘u hoku kou‘ahe: ‘Oku nau kautaha ke ngaohi au.

¹¹‘Oku tukuange au ‘e ‘Ela ki he faka‘otuamate, ‘Oku ne fakapuna au ki he nima ‘o e faikovi.

¹²Na‘a ku nofo nonga, pea fokifā na‘a ne have‘i au; ‘O ne puke hoku kia, ‘o lulu; ‘Io, na‘a ne fokotu‘u au ko e polo ke ne fana ki ai.

¹³‘Oku puna mai ‘ene ngaahi ngahau mei he potu kehekehe, Na‘a ne fana‘i hoku kofuua, ‘o ‘ikai te ne faka‘atu‘i; Na‘a ne lilingi hoku ‘ahu ki he kelekele.

¹⁴‘Oku ne tuki hoku ‘ā ke ava ‘o toe ava; ‘Oku ne ‘ohofi au ‘o hangē ha mafi.

¹⁵Ko e tauanga‘a kuo u tuitui ki he funga patu ‘o hoku kili, Pea kuo u fakalielia‘i hoku tope ‘i he efu.

¹⁶Ko hoku mata ‘oku fefulai ‘i he tangi, Pea ko e ‘ata ‘o mate ‘oku ‘i hoku laumata;

¹⁷Neongo ‘oku ‘ikai ha fakamālohi ‘i hoku nima, Pea ko ‘eku lotu ‘oku ma‘a.

¹⁸Kelekele, ‘oua ‘e ‘ufi‘ufi hoku toto, Pea ke ‘oua na‘a ta‘ofi ‘a e ongo ‘o ‘eku tangi!

¹⁹Na‘a mo eni, vakai, ‘oku ‘i langi ha‘aku fakamo‘oni, ‘Io, ‘oku ‘i Taukakapa ha Taha ‘oku tu‘u ma‘aku.

²⁰Lolotonga ‘oku ‘iuvī mai hoku ngaahi kaume‘a: ‘Oku ou lingi lo‘imata kia ‘Elohā;

²¹Ke ne tala tonuhia ki ha tangata kuo hopo mo ‘Elohā, Pe ki si‘a tupu tangata ‘oku fai mo hono kaume‘a!

²²He ko e ngaahi ta‘u faka‘osi ‘ena ‘oku ha‘u, Pea u foua ‘a e hala ‘oku ‘ikai ha foki mei ai.