Read KO E TOH TAPU KATOA TONGA KO SIOPE 17 Bible Online

KO SIOPE 17 - KO E TOH TAPU KATOA TONGA bible

KO SIOPE 17

¹‘OKU kovi ‘eku mānava, ‘Oku toe ki he kia hoku ngaahi ‘aho, ‘Oku tali mai ‘a Fa‘itoka kiate au.

²‘Ikai ‘oku ‘iate au ha kau kakae? Pea ‘ikai ‘oku ou sio ki he‘enau fefe‘u mai he ‘aho mo e pō?

³‘Ē, hoko Koe mōku talifaki! Ko hai mo koe ‘e ‘atu nima kiate au?

⁴He kuo ke kofu honau loto ke ‘oua te nau ma‘ilo: Ko ia ‘e ‘ikai te ke tuku ke nau toka‘olunga.

⁵Ko ia ‘oku tala humaki hono kaume‘a ke vete, ‘E ‘osi‘osi ‘a e mata ‘o ‘ene fānau.[39]

⁶Pea kuo ne tu‘utu‘uni au ko e me‘a ke fakatokotokanaki ‘aki ‘e he ngaahi kakai; Pea kuo u hoko ko e taha kuo ‘anuhia hono mata.

⁷Pea kuo ninimo hoku mata ‘i he mamahi, Pea ko hoku ngaahi kupu ko e ‘ata tofu pē.

⁸‘Oku ofo ‘a ha‘a totonu ‘i he‘eku pehē, Pea ngaueue hake ‘a e ta‘ehalaia ki he angahala fufū.

⁹Ka ko e mā‘oni‘oni te ne tutui atu ‘i hono hala, Pea ko ia ‘oku nima ma‘a ‘e fakautuutu ai pē hono ivi.

¹⁰Ka ko e me‘a kiate kimoutolu kotoa, Mou toe ha‘u ā mu‘a! Koloto ke u ma‘u ha poto ‘e taha ‘iate kimoutolu.

¹¹Ko hoku ngaahi ‘aho kuo ‘osi atu, Ko ‘eku ngaahi fakakaukau kuo motu, ‘Io, ‘a e koloa ‘a hoku loto.

¹²Ko e pō e kuo tuku ‘e kinautolu ko e ‘aho: Pea ofi tokua ‘a e maama, ‘Osi, ‘oku mātu‘aki fotu mai ‘a e po‘uli.

¹³Ka ai ha‘aku fakatu‘a ko e fakatu‘a ki Hētesi ko ‘api ia; Kuo u teu hoku mohenga ‘i Po‘uli.

¹⁴Kuo u ui ‘a ‘Auha, ‘Alā ko ‘eku tamai; Pea ko e kelemutu, Ko ‘eku fa‘ē mo tuofefine.

¹⁵Ko ia ‘oku ‘i fē fua ‘eku ‘amanaki ‘oku nau lau? Pea ko ha‘aku ‘amanaki, ko hai ‘e sio ki ai?

¹⁶Te na fakatou ‘alu hifo[40] Ko e mo‘oni te na fakatou ‘alu hifo ki he efu.