Read KO E TOH TAPU KATOA TONGA KO SIOPE 18 Bible Online

KO SIOPE 18 - KO E TOH TAPU KATOA TONGA bible

KO SIOPE 18

¹PEA tali ‘a Pilitati ko e matāpule Sua‘a ‘o pehē,

²‘E tuku ‘afē ho‘omou ‘ai kupenga ke pō lea? Mou poto mu‘a, pea mau toki ava ke lea.

³Ko e hā ‘oku lau ai kimautolu ko e manu? Ko e hā ‘oku mau hā ai kiate kimoutolu ko e ‘atamai si‘i?

⁴‘A e manu fekai na ‘oku ke hae ‘e koe ‘a koe ‘i ho‘o ‘ita, ‘E tuku li‘aki koā ‘a māmani koe‘uhi ko koe? Mo hiki ‘a e makatu‘u mei hono potu?

⁵Pehē ko e maama ‘a e angahala ‘e tāmate‘i, Pea ‘e ‘ikai mo‘ui ‘a e ulo ‘o ‘ene afi.

⁶‘E fakapo‘uli ‘a e maama ‘aho ‘i hono tēniti, Pea ‘e tāmate‘i ‘ene maama tautau.

⁷‘E fakapinepine ‘ene laka mālohi, Pea ‘oku lī ia ki lalo ‘e he‘ene fakakaukau ‘a‘ana.

⁸He ‘oku fakateka ia ki he kupenga ‘e hono va‘e ‘o‘ona, Pea ‘oku ne ‘eve‘eva ‘i he funga hele.

⁹‘Oku tou‘ia ha mui va‘e ha helepuna, ‘Oku mo‘ua hono sino ‘i ha helekete.

¹⁰‘Oku fufū ‘i he kelekele ha hele va‘e mo‘ona, Mo e hele fakau‘u ki ai ‘i he hala papa.

¹¹‘Oku fakailifia‘i ia mei he potu kotoa pē ‘e he ngaahi ilifia, Pea nau molomolomuiva‘e ki ai ke faka‘ohovale‘i.

¹²‘E hoko ‘o ‘alefa hono mala, Pea ‘oku ene hono tu‘utāmaki ke tulaki ia.

¹³‘Oku kai ‘e he Me‘a ‘a e ngaahi fo‘i vākai ‘o hono kili, ‘Io, ko e ta‘okete ‘i he fāmili ‘o Mate, Te ne kai hono ngaahi kupu.

¹⁴‘E ta‘aki mei hono tēniti ‘a e ngaahi me‘a na‘a ne falala ki ai, Pea ‘e taki ia kia Tu‘i Ha‘a Fakailifia.

¹⁵‘E nofo ‘i hono tēniti ‘a e fa‘ahinga ‘oku ‘ikai ke kau kiate ia,[41] Pea ‘e tupe‘i ‘a e sūlifa ki hono nofo‘anga.[42]

¹⁶‘I lalo ‘oku mōmoa hono aka, Pea ‘i ‘olunga, kuo tū‘ulu hono ngaahi va‘a.

¹⁷Kuo mate ‘a e manatu ki ai mei he fonua, Pea ‘e ‘ikai lau hono hingoa ‘i he funga fonua ‘o tu‘a na.

¹⁸Te nau kapusi ia mei he maama ki he po‘uli, Pea te nau sese‘e ia mei he nofo.

¹⁹‘E ‘ikai hano pikilau, Pea ‘e ‘ikai ha hako ‘eiki ‘i hono kakai, Pea ‘e ‘ikai ‘ilo ha taha kuo hao ‘I he ngaahi potu kuo ne ‘āunofo ki ai.

²⁰Ko ha‘a nofo hihifo ‘e tumu ‘i he pehē hono ‘aho, Pea ko ha‘a nofo hahake ‘e mo‘utāfu‘ua.

²¹Tala atu, ko e anga ia ‘o e nofo‘anga ‘o e kakai kovi, Pea ko e potu ‘o ha‘a ta‘e‘ilo kia ‘Ela.