Read KO E TOH TAPU KATOA TONGA KO SIOPE 2 Bible Online

KO SIOPE 2 - KO E TOH TAPU KATOA TONGA bible

KO SIOPE 2

¹PEA hoko ‘a e ‘aho ‘e taha na‘e ha‘u ai ‘a e ngaahi foha ‘o e ‘Otua ke hā kia Sihova, pea ha‘u ‘a Sētane foki ‘i honau lotolotonga ke hā kia Sihova.

²Pea folofola ‘a e ‘Eiki kia Sētane, Na‘a ke ‘i fē ‘ena? Pea tali ‘e Sētane kia Sihova, ‘o pehē, Na‘a ku ‘alu fano ‘i māmani mo ‘a‘ahi holo ai.

³Pea folofola ‘a e ‘Eiki kia Sētane, Kuo ke tokanga‘i ‘eku tamaio‘eiki ko Siope? ‘a e ‘ikai hano tatau ‘i māmani? Ko e tangata haohaoa mo angatonu, ‘oku ne ‘apasia ki he ‘Otua mo afe mei he kovi: pea ‘oku ne kei kuku ‘ene haohaoa, neongo ‘oku ke o‘i au ke fōngia ia tu‘unga‘a pē.

⁴Pea tali ‘e Sētane kia Sihova, ‘o pehē, Ko e kili pē ia telia ha kili: ‘io, ‘e ‘atu ‘e ha tangata ‘ene me‘a kotoa telia ‘ene mo‘ui.

⁵Ka ko eni, ala atu mu‘a ki hono kili mo hono kakano, pea tala atu te ne mātu‘aki tafuli meiate koe.

⁶Pea folofola ‘a Sihova kia Sētane, Ko ena ia ke ke fa‘iteliha ki ai; ka te ke fakaili ‘ene mo‘ui.

⁷Pea hū ki tu‘a ‘a Sētane mei he ‘ao ‘o Sihova, ‘o ne taa‘i ‘a Siope ‘aki ‘a e ngaahi hangatāmaki kovi mei hono ‘aofiva‘e ‘o a‘u ki hono tumu‘aki.

⁸Pea ne to‘o mai ha mafoa‘i ipu ke vakuvaku ‘aki, ‘o ne nofo ‘i he tu‘unga ‘oto‘ota.

⁹Pea lea kiate ia ‘a hono uaifi, ‘Oku ke kei kuku koā ho‘o haohaoa? Tafuli mu‘a mei he ‘Otua, pea mate.

¹⁰Pea ne tali ki he fefine, Ko ho‘o lea ‘oku hangē ko e lau ‘a ha taha ‘i he kau fefine fakangangau. He te tau tali koā ‘a e lelei mei he ‘Otua, kae ‘ikai tali mo e kovi? ‘I he me‘a ko ia kotoa na‘e ‘ikai tō ha me‘a hala mei he ngutu ‘o Siope.

¹¹Pea fanongo ‘e he kaume‘a ‘e toko tolu ‘o Siope ki he ngaahi kovi ko ia kuo hoko ki ai, pea nau omi takitaha mei hono feitu‘u — ‘a ‘Elifasi mei Tīmani, mo Pilitati mei Sua‘a, mo Sofa‘a mei Na‘ama — he kuo nau tālanga ke ha‘u fakataha, ‘o fakamamahi mo ia, mo fai ha fakalelu.

¹²Pea ‘i he‘enau fakasio mai mei he mama‘o, ‘o ‘ikai te nau mei ‘ilo ko ia, na‘a nau ‘ai ‘enau fu‘u fākafoa; pea nau hae hifo takitaha hono kofu, pea nau laku ki ‘olunga ‘a e efu ke tō ki honau ‘ulu.

¹³Pea na‘a nau nonofo mo ia ‘i he kelekele ‘o ‘aho fitu mo pō fitu, ‘o ‘ikai fai ha momo‘i lea ki ai: he na‘a nau vakai kuo hulu fau ‘ene mamahi.