Read KO E TOH TAPU KATOA TONGA KO SIOPE 21 Bible Online

KO SIOPE 21 - KO E TOH TAPU KATOA TONGA bible

KO SIOPE 21

¹PEA tali ‘a Siope, ‘o ne pehē,

²Mou fanongo mu‘a ki he‘eku lau; Pea ke hoko ia ko ho‘omou fakalelu kiate au.

³Mou tuku ke u lea foki ‘e au, Pea ka hili ‘eku lea, fai atu ha‘au taukae.

⁴Ko e me‘a kiate au, he na‘e kau ‘eku lāunga ki ha tangata? Pea kapau kuo u kātakingata‘a, ko e hā?

⁵Tokanga kiate au, pea mou ofo, ‘Oku ngutu mu‘a.

⁶‘Io, ka u ka manatu ki ai ‘e au ‘oku ou puputu‘u, Pea ‘oku mo‘utetea hoku kakano.

⁷Ko e hā ē — ‘a e mo‘ui ‘a e kau angahala? ‘Oku nau a‘u atu, ‘oku nau kaukaua foki.

⁸‘Oku nau fokotu‘u honau hako fakataha mo kinautolu, ‘Oku nau ‘i ai pē, Pehē mo e makapuna, ‘o nau sio ki ai.

⁹Ko honau ngaahi fale ‘oku ‘atā mei he manavahē, Pea ko e sēpita ‘o ‘Elohā ‘oku ‘ikai ke tō kiate kinautolu.

¹⁰‘Oku faka‘unoho ‘ene pulu tangata, ‘o ‘ikai hala; ‘Oku fā‘ele ‘ene kau, ‘o ‘ikai tamatō.

¹¹‘Oku nau tuku atu ‘enau tamaiki pau‘u hangē ko e tākanga sipi, Pea ko ‘enau fānau ‘oku me‘e hopohopo.

¹²‘Oku nau ha‘aki mai ‘enau hiva Mo e nafa fāngongo mo e ha‘ape; Pea ‘oku nau fai ‘enau hākahaka He ifi ‘a e mimiha.

¹³Na‘a nau ma‘u honau ‘aho ke ‘osi ‘i he tu‘umālie pē; Pea nau toki hifo ki Hētesi ko e kemo pē.

¹⁴Ka na‘a nau pehē kia ‘Ela, “Hiki meiate kimautolu, He ko e ‘ilo ki ho ngaahi founga ‘oku ‘ikai te mau manako ki ai.”

¹⁵Ko e hā ‘a Sātai ke tau tauhi kiate ia? Pea ‘aonga ki he hā ha‘atau loto kiate ia?

¹⁶Vakai, ‘oku ‘ikai ‘i honau nima ‘a honau monū! Ke mama‘o meiate au ‘a e fāliunga ‘a e kau angahala!

¹⁷Ka kuo tu‘o fiha nai ‘a e tāmate‘i ‘o e maama ‘a e angahala? Mo e pāfua mai ‘enau tu‘utāmaki? ‘A e tufa ‘inasi ‘e He‘ene ‘Afio ‘i hono houhau?

¹⁸‘A ‘enau hoko hangē ko e veve ‘i he ‘ao ‘o e matangi, Mo e kafukafu ‘oku ‘ave ‘e he afā?

¹⁹“‘Oku tuku tauhi koā ‘a e kovi ‘e ‘Elohā ki he fānau ‘a e tangata ko ē?” ‘Ā, na‘a Ne mei fakaai kiate ia pē, ke ne ‘ilo‘i.

²⁰‘Oku totonu ke sio ki he‘ene tu‘utāmaki ‘e hono mata ‘o‘ona, Pea ke ne inu ‘e ia ‘a e tuputāmaki ‘a Sātai.

²¹He hono tokanga ia pe ko e hā ‘e hoko ki hono fale hili ‘ene pekia, Pea kuo tu‘usi ‘a e lau ‘o hono ngaahi māhina?

²²‘E lava ke ako poto kia ‘Ela, ‘Osi, ko ia te ne fakamāu‘i ‘a ha‘a mā‘olunga?

²³Ko Me‘a ‘oku pekia kei kakato hono mālohi, Ko e koto tu‘umālie mo nonga:

²⁴‘Oku fonu huhu‘a hono ngaahi kālava, Pea ‘oku hauhau ‘a e uho ‘o hono ngaahi hui.

²⁵Ka ko Me‘a ‘oku pekia loto mamahi, Pea kuo te‘eki ke ne kamata ha tu‘umālie.

²⁶‘Oku na tākoto fakataha ‘i he efu, Pea ‘oku ‘ufi‘ufi kinaua ‘osi pē ‘e he kelemutu.

²⁷‘Ā, ‘oku ou ‘ilo ho‘omou ngaahi fakakaukau; Mo e ngaahi fifili ‘oku mou ngaohi-ta‘e-hia-‘aki au.

²⁸He ‘oku mou pehē, “Kofa‘ā ‘a e fale ‘o e ‘eiki? Pea Kofa‘ā ‘a e tēniti, Ko e fu‘u nofo‘anga ‘o e faikovi?”

²⁹Kuo ‘ikai koā te mou fehu‘i ki he kau takai fonua? Pea tala‘ehai te mou ta‘etoka‘i ‘a e ngaahi me‘a mamafa ‘oku nau tala.

³⁰Tokua ‘i he ‘aho ‘o e tu‘utāmaki, ‘Oku fakahao ‘a e tangata kovi: ‘I he ‘aho ‘o e tanunu mai ‘a e kovi, ‘Oku fakahā‘ele ange kinautolu.

³¹Ko hai ‘e fie fakahā ‘a e ‘alunga ‘o ē, Ka ‘oku ne ‘i ai pē? Pea ko e me‘a kuo ne fai, Ko hai ‘e totongi kiate ia?

³²Pea ‘oku fakahā‘ele ange ia ki ha fu‘u fa‘itoka, Pea ‘oku fai ha le‘o ki hono langi.

³³‘Oku melie kiate ia ‘a e kelekele ‘o e tele‘a, He muimui ki he me‘a faka‘eiki ‘a e tangata kotoa, Pea ko kinautolu ‘e mu‘omu‘a ‘e ta‘emalaua.

³⁴Pea fēfē ai ho‘omou fakalelu ‘eku mamahi ‘aki ha koto muna? He ka sivi ho‘omou ngaahi tali, ko e me‘a ‘oku toe ko e koto kākā.