Read KO E TOH TAPU KATOA TONGA KO SIOPE 22 Bible Online

KO SIOPE 22 - KO E TOH TAPU KATOA TONGA bible

KO SIOPE 22

¹PEA tali ‘e ‘Elifasi mei Tīmani, ‘o ne pehē.

²Na‘a mo e tangata mālohi te ne lava koā ke ‘aonga kia ‘Ela? Seuke, ‘e ‘aonga ‘a e tangata ‘atamai kiate ia pē.

³‘E ma‘u ha me‘a ‘e Sātai koe‘uhi ko ho‘o faitotonu? Pe fakalahi ‘ene koloa ‘i ho‘o fakahaohaoa ho ngaahi ‘alunga?

⁴Ko hono manavahē koā ‘oku ne akonaki‘i ai koe, ‘Oku ne hopo mo koe ‘i he fakamaau?

⁵‘Ikai ko e lahi pē ho‘o kovi? Mo e ta‘efa‘alaua ho‘o faihala?

⁶Tala atu, na‘a ke ‘eke talifaki mei he kāinga tu‘unga‘a pē, Pea ke to‘o ‘a e kofu kae telefua.

⁷Tala‘ehai na‘a ke ‘ange ha vai ki he fie inu. Pea na‘a ke fakafisi ki he kole me‘akai ‘a e fiekaia.

⁸Tokua ko e nima mālohi ‘oku ‘o‘ona ‘a e fonua. Pea ko ha‘a ‘ilonga pē ke nofo ai.

⁹Ko si‘i kau uitou na‘a ke fekau ke ‘alu mola pē. Pea ko e nima ‘o e tamai mate ‘oku laiki.

¹⁰Ko hono ō ē ‘oku loki koe ‘aki ‘a e ngaahi tauhele. Pea ‘oku faka‘ohofi koe ‘e he fakailifia fakafokifā.

¹¹Pea na‘a ‘oku ‘ikai te ke ‘ilo‘i ‘a e po‘uli, Mo e lōmaki ‘oku ne fakapulonga koe.

¹²‘Ikai ko e taupotu ‘o langi ‘a ‘Elohā? Pea vakai ‘a e ngaahi fetu‘u hono ‘ikai mā‘olunga!

¹³Pea ke pehē nai, “Ko e hā ‘oku ‘ilo ‘e ‘Ela? ‘E ‘asi ‘ene fakamaau ‘i he po‘uli matolu?

¹⁴Ko e ngaahi ‘ao na ko e pulonga kiate ia, Pea ‘ikai te ne ‘ilo mai, Pea ko e aku pē ‘o langi ‘oku fai ai ‘ene hā‘ele.”

¹⁵Te ke piki pē ki he hala tupu‘a, ‘A ia ne foua ‘e he kau pāte‘i angahala?

¹⁶‘A kinautolu na‘e fena te‘eki hoko honau taimi, Na‘e tafe atu ‘a e tu‘unga kolo hangē ha vai.

¹⁷‘A ia na‘a nau pehē kia ‘Ela, “Hiki meiate kimautolu;” Pea, “Ko e hā ‘e fai ‘e Sātai ma‘atautolu?”

¹⁸‘Osi, ko ia na‘a ne fakafonu honau fale ‘i he lelei. Ke mama‘o meiate au foki ‘a e fāliunga ‘a e kau angahala!

¹⁹‘E sio ki ai ‘a e kau mā‘oni‘oni pea te nau fiefia. Pea kata kakae ki ai ‘a e kau ‘ata‘atā.

²⁰“Tā ‘oku faka‘auha ‘a e kakai na‘e tu‘u kiate kitautolu, Pea kuo kai ‘e he afi ‘enau hulu.”

²¹Fai ke mo vālelei mo ‘Ene ‘Afio, pea ke melino; ‘E ha‘u ai ‘a e tu‘umālie kiate koe.

²²Tali mu‘a ha fono ‘e tō mei hono fofonga. Pea ‘ai ‘ene folofola ki ho loto.

²³Kapau te ke foki ‘aupito kia Sātai, ‘e toe langa koe;[47] Kapau te ke fakamama‘o ‘a e kovi mei ho tēniti.

²⁴Pea ke ke tuku ‘a e koula-maka ki he efu. Mo e ‘Ōfela ki he maka ‘o e halanga vai;

²⁵Pea ‘e hoko ‘a Sātai ko ho‘o tu‘unga koula-maka, Mo ho‘o siliva ngingila.

²⁶Tala atu, te ke toki fiefia ‘ia Sātai, Pea ke tāngaki hake kia ‘Elohā.

²⁷Te ke lotu kiate ia, pea te ne ongo‘i koe; Pea te ke fakaai ho‘o ngaahi tukumo‘ui.

²⁸Pea te ke tu‘utu‘uni ha me‘a, pea ‘e tu‘u ma‘a u; Pea ‘e hopo ‘a e maama ki ho ngaahi ‘alunga.

²⁹Kapau ‘e tōkilalo ha ni‘ihi, pea te ke pehē, Fai ha hiki hake;[48] Pea ‘e fakamo‘ui ‘e He‘ene ‘Afio ha anga vaivai.

³⁰Te ne fakahaofi ha taha ‘oku ‘ikai tonuhia:[49] ‘Io, ‘e fakahaofi ‘a e toko taha ko ia koe‘uhi ko e ma‘a ho nima.[50]