Read KO E TOH TAPU KATOA TONGA KO SIOPE 23 Bible Online

KO SIOPE 23 - KO E TOH TAPU KATOA TONGA bible

KO SIOPE 23

¹PEA tali ‘a Siope, ‘o ne pehē,

²Tā ko ‘eku lāunga ko e angatu‘u ai pē: Ka ‘oku mamafa ange ‘a hoku tā ‘i he‘eku to‘e.

³Taumaiā ke u ‘ilo pe te u ma‘u ‘a ‘Ene ‘Afio ‘i fē, Ka u a‘u atu ki hono ‘afio‘anga!

⁴Te u faka‘otu ‘i hono ‘ao ‘a e totonu ‘o e me‘a, ‘O fakafonu hoku ngutu ‘i he fakamatala.

⁵Ka u ‘ilo ‘a e ngaahi me‘a te ne tali ‘aki, ‘O mahino kiate au ‘a e me‘a te ne folofola‘aki mai.

⁶Te ne fai‘aki koā hono fu‘u ivi ‘ema veipā? ‘Ikai: ka kuo pau te ne toka‘i au.

⁷‘I he potu ko ia ‘e lava ‘e ha faitotonu ke alea mo ia; Pea te u hao mei hoku fakamaau ‘o ta‘engata.[51]

⁸Kae vakai, ‘oku ou ‘alu ki hahake, Ka ‘oku ‘ikai te ne ‘i ai; Pea ki hihifo, Ka ‘oku ‘ikai te u ma‘iloa ia.

⁹‘Oku ou fai ki he tokelau ‘i he‘ene ngāue ai, Ka ‘oku ‘ikai te ne hā mai: ‘Oku ne fakamanimo ia ‘i he tonga, Ka ‘oku ‘ikai te u sioa.

¹⁰Ka ‘oku ne ‘ilo ‘a e hala ‘oku ou fou ai; Ka ‘osi ‘ene sivi au, te u ‘alu atu ‘o hangē ko e koula.

¹¹Ko hoku va‘e kuo piki ki hono topuva‘e; Kuo u tauhi ‘a e hala ‘o‘ona, ‘o ‘ikai te u afe.

¹²Ko e tu‘utu‘uni ‘a hono fofonga na‘e ‘ikai te u hiki mei ai; Kuo u koloa-mahu‘inga ‘aki ‘a e ngaahi lea ‘a hono fofonga, ‘O lahi ‘i he lao ‘oku ‘iate au.

¹³Ka ko e Taha ‘o e Taha ‘a ‘Ene ‘Afio, Pea ko hai te ne fakafoki? Pea ko e me‘a ‘oku holi ki ai hono finangalo, Ko ia ia ‘oku ne fai.

¹⁴Seuke, te ne fakakakato ‘a e me‘a kuo tu‘utu‘uni kiate au: Pea ‘oku lahi ‘a e me‘a pehē ‘oku fe‘ao mo ia.

¹⁵Ko hono ‘uhinga ia ‘oku ou manavahē ai ki he‘ene fotu mai; Ka u ka fakalaulauloto, ‘oku ou ilifia kiate ia.

¹⁶Pea ko ‘Ela ia kuo ne fakavaivai‘i hoku loto, Pea ko Sātai kuo ne fakailifia‘i au:

¹⁷He na‘e ‘ikai ke faka‘auha au ‘i he te‘eki hoko ‘a e po‘uli ni, Pea ‘i he te‘eki ‘ufi‘ufi au ‘e he po‘uli matolu.