Read KO E TOH TAPU KATOA TONGA KO SIOPE 24 Bible Online

KO SIOPE 24 - KO E TOH TAPU KATOA TONGA bible

KO SIOPE 24

¹KO E hā kuo ‘ikai tuku tauhi ai meia Sātai Ha ngaahi taimi tu‘utu‘uni? ‘O ‘ikai sio ki hano ngaahi ‘aho fakamaau ‘E he kakai ‘oku lave‘i ia?

²‘Oku ai ha ni‘ihi ‘oku hiki kau‘ā; ‘Oku nau fa‘ao tākanga manu, ‘o fafanga.

³‘Oku nau ‘ave ‘a e ‘asi ‘a e kau tamai mate, ‘Oku nau ta‘ofi ‘a e pulu toho palau ‘a e uitou mo‘o talifaki.

⁴‘Oku nau heu‘i ‘a e masiva mei he hala; Kuo pau ke mātu‘aki toi ‘a e mā‘ulalo ‘o e fonua.

⁵Vakai ‘enau ‘alu atu ‘enau ngāue! Ko e fanga ‘asi kaivao tofu pē, Si‘enau uhu atu ko e faka‘ete ‘a‘alu: Ko e fonua mamate ko e ma‘unga me‘akai ‘A si‘i motu‘a ki he fānau.

⁶‘I he vao tōkanga te nau utu mai ‘a e ta‘u ‘a manu ‘a e matāpule kovi;[52] Pe te nau fakaeve ‘ene ngoue vaine.

⁷‘Oku nau mohe telefua ko e ‘ikai hanau kofu, Pea ‘oku ‘ikai hanau kafu ‘i he momoko.

⁸‘Oku nau viku ‘i he vaivao ‘o e mo‘unga, ‘Oku nau lafi ki he makatu‘u ko e ‘ikai hanau palehahau.

⁹‘Oku ai ha ni‘ihi te nau hamusi ‘a e tamai mate mei he huhu ‘ene fa‘ē, ‘O nau to‘o mo‘o talifaki ‘a e me‘a ‘oku ‘ai ‘e he masiva:

¹⁰Ko ia, ‘oku femoulu‘i atu ‘a e fa‘ahinga ko ē ‘oku nau telefua ‘aupito, Pea ‘oku nau fiekaia neongo ‘oku nau fetuku ‘a e ‘ū koane;

¹¹‘Oku nau ngaohi lolo kae ‘aa‘i kinautolu ‘e he fa‘ahinga ko ē; ‘Oku nau fai ‘a e malaki ‘i he tata‘o‘anga uaine, kae fie inu pē.

¹²‘Oku ongo mai mei he kolo kakai ha ni‘ihi ‘oku to‘e, Pea ‘oku mahe‘a mai ‘a e laumālie ‘o e kau kafo: Ka tala‘ehai ‘oku toka‘i ‘e ‘Elohā ‘ene ngali kehe.

¹³Ko e fa‘ahinga ‘e taha kuo hoko ‘o tu‘u ki he maama; ‘Oku ‘ikai te nau fie ‘ilo hono ngaahi ‘alunga, Pea ‘oku ‘ikai te nau nofo ki hono ngaahi afenga makini.

¹⁴Kei hengihengi ‘oku tu‘u hake ‘a e fakapō, ‘Oku ne tāmate‘i ‘a e mā‘ulalo mo e masiva; Pea ‘i he pō ‘oku ne fai hangē ha kaiha‘a.

¹⁵Ko e mata foki ‘o e tono fefine ‘oku ne tatali ki he ataata, He‘ene pehē, ‘E ‘ikai sio ha mata kiate au: ‘Oku ne ‘ai foki ha nge‘esi mata.

¹⁶‘I he po‘uli ‘oku nau toli ‘a e holisi ‘oni fale: ‘Aho, ‘oku nau nofo loki; ‘Oku ‘ikai te nau fie ‘ilo ki he maama.

¹⁷He ko e pongipongi ‘oku tatau kiate kinautolu mo e kaupō‘uli; He ‘oku nau maheni mo e nānunga ‘o e kaupō‘uli.

¹⁸[53]‘Oku ne ‘auhia hangē ha me‘a ma‘ama‘a; ‘Oku taku mala‘ia honau tofi‘a ‘i he fonua: Tala‘ehai ‘oku ne kei ‘alua ‘a e hala ‘o e ngaahi ngoue vaine.[54]

¹⁹Ko e tatanu mo e pupuha ‘oku na fōngia hifo ‘a e vai sinou: Pehē ‘a e fai ‘a Hētesi ki he kau angahala na.

²⁰‘Oku ngalo ia ‘i he fatu na‘a ne ‘i ai; ‘Oku misi ia ‘e he kelemutu; ‘Oku ‘ikai kei manatua: Ko ia, ‘oku motuhi hangē ha ‘akau ‘a e koto kovi na.

²¹‘Osi, ko ia na‘a ne keikeina ‘a e pa‘a na‘e ‘ikai ke fanau; ‘O ‘ikai te ne fai ha lelei ki si‘i uitou.

²²Seuke, ‘oku toloaki ‘e He‘ene ‘Afio ‘a e mafi ‘aki Hono ivi: ‘Oku ne toetu‘u; ‘osi, na‘e ‘ikai te ne ‘amanaki te ne mo‘ui.

²³‘Oku ne ‘ange ki ai ha nonga, Pea ‘oku ne tu‘u mo e poupou; Pea ‘oku nau fou atu ‘i honau hala Kae sio ki ai ‘a ‘Ene ‘Afio.

²⁴‘Oku hākeaki‘i kinautolu; Ko e taimi si‘i pea nau ‘ikai; Pea ka nau ka tālolo, ‘Oku utu kinautolu ‘o hangē ha kakai kehe, ‘O kamu‘i hangē ko e ‘ulu‘i uite.

²⁵Pea kapau ‘oku ‘ikai ko ia, Ko hai te ne fakamo‘oni ‘eku loi, ‘O faka‘ikai ‘eku lea?