Read KO E TOH TAPU KATOA TONGA KO SIOPE 27 Bible Online

KO SIOPE 27 - KO E TOH TAPU KATOA TONGA bible

KO SIOPE 27

¹PEA fai atu ‘e Siope, ‘o ne ofa‘aki ‘ene ta‘anga, ‘o ne pehē:

²Tangi ‘a e mo‘ui ‘a ‘Ela, ‘A ia kuo ne to‘o ‘eku malu fakalao; Pea tangi ‘a e mo‘ui ‘a Sātai, ‘A ia kuo ne fakakona ‘eku mo‘ui;

³Kae lolotonga ‘oku ‘iate au ‘eku mānava, Mo e ‘i hoku ava‘i ihu ‘a e hō ‘a ‘Elohā;

⁴‘Ilo ‘e au kapau ‘e lea kovi ‘e hoku loungutu, Pe lau kākā ‘e hoku ‘elelo ni.

⁵Molekemama‘o ha‘aku fakatonuhia kimoutolu; ‘E ‘ikai te u tukuange ‘eku mā‘oni‘oni ‘o a‘u ki he mate.

⁶Ko ‘eku totonu ni te u puke ki ai, ‘o ‘ikai te u momo‘i fakamalūlū ange; ‘Oku ‘ikai haku ‘aho ‘e taha ‘oku tautea ai au ‘e hoku loto.

⁷Ko hoku fili pē ‘e hā ko e angahala, Pea ko ia ‘oku ne tu‘u kiate au ‘e hā ko e mamio.[59]

⁸He ko e hā ‘a e falala‘anga ‘o e angahala fufū ‘oka tu‘usi ia? ‘Oka unuhi ‘e ‘Elohā hono laumālie?

⁹‘E ongo‘i koā ‘e ‘Ela ‘ene tautapa, ‘Oka falala kiate ia ‘a e faingata‘a?

¹⁰Te ne lava ke felātani mo Sātai? Te ne lava ke ui kia ‘Elohā he taimi kotoa pē?

¹¹Te u fakahā kiate kimoutolu ‘a e anga ‘o e fai ‘a ‘Ela: ‘E ‘ikai te u fufū ‘a e me‘a ‘oku taka ‘ia Sātai.

¹²Seuke, kuo mou sio ki ai ‘e kimoutolu kotoa: Pea tū ko e fai ai ho‘omou fakamuna, ko e hā?

¹³[60]Ko eni ‘a e tofi‘a meia ‘Ela ‘o e tangata angahala, Mo e ‘inasi ‘o e kau fakamālohi ‘oku nau ma‘u meia Sātai.

¹⁴Kapau ‘oku tokolahi ‘ene fānau, ‘oku ma‘a e heletā pē; Pea ‘oku ‘ikai mākona hono pikilau ‘i he me‘akai.

¹⁵Ko hono toenga ‘oku tanu ‘e he mahaki faka‘auha, Pea ‘oku ‘ikai fai ha tēngihia ‘e hono kau uitou,

¹⁶Neongo ‘ene fokotu‘u noa ‘a e siliva hangē ko e efu, Pea tokonaki kofu hangē ha te‘etanu;

¹⁷‘Oku ne tokonaki pē, ka ‘oku kofu ‘aki ‘e he mā‘oni‘oni, Pea ko e siliva ‘e tufa ‘e he kau ‘ata‘atā.

¹⁸‘Oku ne langa fakamū[61] hono fale, Pea hangē ha palepale ‘oku ngaohi ‘e he tauhi ngoue.

¹⁹‘Oku ne tokoto koloa‘ia, ka ‘oku ‘ikai ke toe fai:[62] Ka ofo hake — ‘oku ‘ikai.

²⁰‘Oku a‘u mai ki ai ‘a e ngaahi ilifia hangē ko e lōmaki, ‘Oku lami‘i po‘uli ia ‘e he ‘ahiohio.

²¹‘Oku hiki ‘e he matangi hahake, pea ‘oku ne ‘alu, Pea ‘oku ne fakapuna ia mei he potu na‘a ne ‘i ai.

²²‘Io, ‘oku tukuna atu ki ai ‘e he ‘Afio ta‘eha‘ane mamae; ‘Oku ne mātu‘aki feinga ke hola mei hono nima.

²³‘Oku nau pasipasi nima ki ai, ‘O sese‘e ia mei hono potu.