Read KO E TOH TAPU KATOA TONGA KO SIOPE 28 Bible Online

KO SIOPE 28 - KO E TOH TAPU KATOA TONGA bible

KO SIOPE 28

¹[63] TŪ ko e siliva ‘oku ai hono keli‘anga, Pea ai ha nofo‘anga ‘o e koula ‘oku fakama‘a vai;

²‘Oku ma‘u ‘a e ‘aione mei he efu, Pea ‘oku haka ‘a e maka ‘o kapa.

³Ko e tangata — ‘oku ne teke atu ‘a e ngata‘anga ‘o e po‘uli, Ko ‘ene ngata leva ha potu, hakule atu ‘a e tangata ia ‘a e maka ‘o e po‘uli lōlō mo e ‘ata ‘o mate.

⁴‘Oku ne foa ha tafu mama‘o mo e nofo; ‘Oku puli kinautolu mei he va‘e ‘o ē ‘i ‘olunga; ‘Oku nau tāupe mama‘o mei he kakai, ‘o sīsīfā holo.

⁵Ko e fonua — ‘oku tupu mei ai ‘a e mā; Pea ko hono takele kuo mafuli hangē ko e fai ‘e he afi.

⁶Ko hono ngaahi maka ko e potu ‘o e sāfaia, Pea ‘oku ‘i ai ‘a e efu koula.

⁷Ko e hala ko ē — ‘oku ‘ikai ‘ilo ‘e he manupuna fekai, Te‘eki hila ki ai ‘a e mata ‘o e faokona:

⁸Te‘eki hā‘elea ia ‘e ha manu hau, Te‘eki laka ai ‘a e tama ngungulu.

⁹Na‘a mo e makahunu ka ‘oku ne ‘ai atu hono nima ki ai; ‘Oku ne fuli takele ‘a e ngaahi mo‘unga.

¹⁰‘Oku ne foa halanga ‘i he maka; Pea ‘ilonga ha me‘a mahu‘inga, pea sio ki ai hono mata.

¹¹‘Oku ne punupunu ‘a e ngaahi vai ke ‘oua te nau tutulu mai;[64] Pea ko e me‘a ‘oku fufū ‘oku ne ‘omi ki he maama.

¹²Ka ko Poto ‘e ‘ilo ia ‘i fē? Pea ko e fe‘ia ‘a e potu ‘o e maama?

¹³‘Oku ‘ikai ‘ilo ‘e ha Maama hono fokotu‘unga; ‘Io, ‘oku ‘ikai ma‘u ‘i he fonua ‘o e kau mo‘ui.

¹⁴‘Oku pehē ‘e Lolofonua, ‘Oku ‘ikai ‘iate au. Pea ‘oku pehē ‘e he moana, ‘Oku ‘ikai nonofo mo au.

¹⁵‘E ‘ikai ‘ange ki ai ‘a e koula ma‘opo‘opo, Pea ‘e ‘ikai fua siliva mōno totongi.

¹⁶‘E ‘ikai fua ki ai ‘a e tu‘utanga koula mei ‘Ōfela; ‘A e ‘onike mahu‘inga, mo e sāfaia.

¹⁷‘E ‘ikai ala tatau mo ia ‘a e koula mo e sio‘ata; Pea ‘e ‘ikai fetongi ‘aki ha nāunau koula fungani.

¹⁸Ko e feo kula mo e kilisitala ‘e ‘ikai ha momo‘i lau ki ai: Seuke, ko e totongi ki he poto ‘oku hulu ‘i he makakula koloa.

¹⁹‘E ‘ikai ala tatau mo ia ‘a e tōpasi mei Kusa, Pea ‘e ‘ikai fua ki ai ‘a e koula ‘asinisini.

²⁰Ka ko Poto — ‘oku ha‘u mei fē ia? Pea ko e fe‘ia ‘a e nofo‘anga ‘o maama?

²¹He kuo puli mei he mata ‘o e kau mo‘ui, Pea kuo fufū mei he manupuna ‘o e ‘atā.

²²Ko Hētesi[65] mo Mate ‘oku na pehē, “TŪ kuo mofisi mai hono talanoa ki homa telinga.”

²³Ko e ‘OTUA pē ‘oku mahino ki ai hono hala, Pea ko ia pē ‘oku ne ‘ilo hono potu.

²⁴He ‘oku a‘u ‘ene kilo ki he ngaahi ngata‘anga ‘o māmani, Pea ko e lalo langi kotoa ‘oku ne sioa.

²⁵Ko e taimi na‘a ne fai ‘a e mamafa ‘o e matangi; Mo fakafuofua ‘a e vai ‘i ha me‘a fua,

²⁶He‘ene fokotu‘u ha tu‘utu‘uni ki he ‘uha, Mo e hala ki he ‘uhila ‘o e mana;

²⁷Ko e taimi ko ia na‘a ne sio ki ai, ‘o ne ‘a‘au; Na‘a ne tuku hano tu‘unga, ‘o ne hakule foki.

²⁸Pea ne toki folofola ki he tangata, Vakai, ko e ‘apasia kia ‘Ātonai, ko ia ia ‘a e poto. Pea ko e afe mei he kovi ko ‘ete maama ia.