Read KO E TOH TAPU KATOA TONGA KO SIOPE 3 Bible Online

KO SIOPE 3 - KO E TOH TAPU KATOA TONGA bible

KO SIOPE 3

¹HILI ia na‘e ofa‘aki ‘e Siope ‘ene lea, ‘o ne talakaa‘i hono ‘aho.

²Pea fokotu‘u atu ‘e Siope, ‘o ne pehē:

³Ke mala‘ia ‘a e ‘aho ne fanau‘i ai au, Mo e pō na‘a ne tala, Kuo tu‘itu‘ia ha tama tangata.

⁴‘a e ‘aho ko ia! ke hoko ia ko e koto po‘uli! Ke ‘oua na‘a ‘eke ki ai ‘a e ‘Otua mei ‘olunga, ‘Oua na‘a hā ki ai ‘a e maama!

⁵Ke toe ma‘u mai ia ‘e he Po‘uli mo e ‘Ata-‘o-mate! Ke toka ki ai ha koto ‘ao! ‘Ilonga ha me‘a ‘oku fakakaupō‘uli ‘a e ‘aho, Ke hoko ia ki ai, ‘o fakailifia‘i!

⁶‘a e pō ko ia! ke ma‘u ia ‘e he po‘uli lōlō! Ke ‘oua na‘a kau ia ‘i he fiefia ‘o e ngaahi ‘aho ‘o e ta‘u! ‘I he lao ‘o e ngaahi māhina, ‘oua na‘a tu‘u ia!

⁷‘Ise‘isa ‘a e pō ko ia! ‘ofa ke pa‘a! Ke ‘oua na‘a hū ki ai ha mavava!

⁸Ke tutuku‘i ia ‘e he fa‘ahinga fakamala‘ia ‘aho; ‘A kinautolu ‘oku poto ‘i he ue‘i ‘o Levaiatani![6]

⁹Ke fakanenefu hono ngaahi fetu‘u hengihengi! Ke ne holi ki he maama, kae ‘ikai; ‘O ‘oua te ne sio ki he mafoa ‘a e ata!

¹⁰Koe‘uhi na‘e ‘ikai te ne songo ‘a e matapā ‘o e fatu na‘a ku ‘i ai, ‘O fufū ‘a e mamahi meiate au.

¹¹Ko e hā na‘e ‘ikai te u mate ai pē mei he fatu? ‘O u hū mai mei he mānava ke hokotaki leva?

¹²Ko e hā na‘e tali ai au ‘e he funga tui; Pe ko e ongo huhu, ‘o fakahuhu!

¹³Pehē kuo u tokoto nonga; Kuo u mohe; talu ai ‘eku mālōlō:

¹⁴Fakataha mo e ngaahi tu‘i mo e ngaahi palēmia ‘o māmani, ‘A ia na‘a nau ngaohi langi mo‘onautolu;

¹⁵‘Io, kuo u toka mo hou‘eiki koula‘ia, Na‘e fakafonu siliva honau fonualoto.

¹⁶‘Io, kuo u ‘ikai; tatau mo ha tamatō ‘oku puli ai pē, Tatau mo e tamaiki na‘e ‘ikai mamata ki he maama.

¹⁷Ko e potu ko ia ‘oku tuku ai ‘e he kau angahala ‘enau fakafiu; ‘Io, ko e potu ko ia ‘oku mālōlō ai ‘a e kakai kuo ‘osi honau ivi.

¹⁸‘Oku fakataha ai ‘a e kau pōpula, ‘o tokoto noa; ‘Oku ‘ikai ongo mai ‘a e le‘o enginaki ngāue.

¹⁹Ko e si‘i mo e lahi ‘i ai ko ia ai pē; Pea ko e tamaio‘eiki ‘oku tau‘atāina mei hono ‘eiki.

²⁰Ko e hā ‘oku ‘omi maama ai pē ki si‘i ngaope; Mo e mo‘ui ki he kakai ‘oku kona honau loto?

²¹‘A kinautolu ‘oku mo‘utalia ki he mate, ka ‘oku ‘ikai te ne ha‘u; ‘Oku lahi ‘enau vili ki ai ‘i he‘enau vili ki he koloa fufū,

²²‘Oku nau fiefia mo hākailangitau, ‘Oku nau me‘e hopohopo, ‘oka ‘iloange kuo ma‘u ha tanu‘anga.

²³Ko e hā ‘oku ‘omi maama ai ki ha tangata kuo fakapuli hono hala. Pea kuo ‘aa‘i takai ‘e ‘Elohā?

²⁴He neongo ko ‘eku kai ē ‘oku ma fe‘ao, kae fai pē ‘eku māpuhoi; Pea puna atu ‘eku to‘e hangē ha fu‘u vai,

²⁵He ka u ka ilifia ki ha me‘a, kuo pau ke hoko; Pea ko e me‘a ‘oku ou teki ki ai, kuo pau ke a‘u mai.

²⁶‘Oku ‘ikai ha‘aku fiemālie; Pea ‘oku ‘ikai ha‘aku mohe; Pea ‘oku ‘ikai ha‘aku mālōlō: Ka ‘oku kei ha‘u hē ‘a e mamahi.