Read KO E TOH TAPU KATOA TONGA KO SIOPE 30 Bible Online

KO SIOPE 30 - KO E TOH TAPU KATOA TONGA bible

KO SIOPE 30

¹KA ko eni ‘oku manuki‘i au ‘e kinautolu ‘oku talavou ‘iate au, Ko e hako ‘o e fa‘ahinga ‘e ‘ikai te u tuku ke ō mo ‘eku fanga kulī sipi.

²Seuke, he ko e hā kiate au ‘a e ngū ‘o honau nima? Kuo mole honau mālohi;

³Ko e koto tutue ‘i he masiva mo e fiekaia; Ko e fa‘ahinga ‘oku huhua ‘enau kai ‘i he funga vaha makamaka; Ko e potu kei ma‘u hono anga mu‘a ko e maveuveu mo e anganoa.

⁴Ko e fa‘ahinga ‘oku fusi ‘akau māsima ‘oku huluni ‘i he te‘ehoosi: Mo e aka‘i sūnipa ma‘anau kai.

⁵‘Oku kapusi kinautolu mei he nofo; ‘Oku kaila‘i kinautolu hangē ha kaiha‘a.

⁶Ka ai ha tele‘a ‘oku fakailifia ange, Kuo pau ko honau nofo‘anga ia, ‘I he ngaahi ‘ana ‘i he kelekele mo e makatu‘u.

⁷‘Oku nau ngī-ngā mai mei he loto te‘ehoosi; ‘Oku hakaluku ‘enau nofo ‘i he lalo talatala.

⁸Ko e hako ‘o e fa‘ahinga vale, Kae‘uma‘ā ko e hako ‘o e kakai noa: Na‘e fakase‘e kinautolu mei he fonua.

⁹Ka ‘i he taimi ni kuo u hoko ko e ta‘anga ‘o e fa‘ahinga ko ia, ‘Io, kuo u hoko ko e me‘a ke nau taungalea ki ai.

¹⁰‘Oku nau fakalili‘a kiate au, ‘oku nau fakamama‘o, ‘Oku ‘ikai te nau popoi ke ‘a‘anu ki hoku mata.

¹¹He kuo Ne fakangaloku ‘eku uka, ‘O fakamo‘ulaloa‘i au; Ko ia, kuo veteange foki ‘e he fa‘ahinga na ‘a e piti na‘a nau ‘ai ‘i hoku ‘ao.

¹²‘Oku laoaki mai ‘i to‘omata‘u ‘a e fanga toki tupu na; ‘Oku nau heu‘i hoku va‘e: Seuke, ‘oku nau tanu puke tau kiate au.

¹³‘Oku nau maumau hoku hala, ‘Oku nau mōia atu hoku have‘i — ‘a e fa‘ahinga na ‘oku ‘ikai hanau pāletu‘a![66]

¹⁴Hangē kuo maumau ha konga lahi ‘o hoku ‘ā, ‘o nau ‘oho mei ai; Lolotonga ‘a e mokulu ‘a e me‘a, ‘oku nau mateka mai.

¹⁵Kuo liliu ‘a e ngaahi ilifia, pea ko au eni ‘oku ou ongo‘i. ‘Oku nau sese‘e hoku lāngilangi hangē ha tu‘oni matangi; Pea ‘oku mole ‘eku tu‘umālie hangē ha ‘ao.

¹⁶Ka ko e taimi ni ‘oku malingi pē kiate au ‘a e me‘a ‘oku ‘i hoku loto. ‘Oku ma‘u puke au ‘e he ngaahi ‘aho kātaki.

¹⁷‘Oku vili hoku hui ‘e he pō, ‘o hangē ka tatala; Pea tala‘ehai ‘oku mohe ‘eku kau fe‘ola.

¹⁸‘I he fu‘u mālohi ‘o e mahaki ‘oku hā kehe hoku kofu: ‘Oku piki kiate au hangē ko e kola ‘o hoku sote.

¹⁹Kuo ne lī au ki he pelepela, Pea ‘oku ou hangē ko ha koto efu mo e efuefu.

²⁰‘Oku ou tautapa atu, ka ‘oku ‘ikai te ke tali au: ‘Oku ou mo‘utu‘ua pē, ka ke fakasio mai pē.

²¹Kuo ke liliu, ‘o hoko ko e taha ke fakamamahi kiate au: ‘Oku ke ngāue‘aki ‘a e ngū ‘o ho nima ke fakatanga‘i au.

²²‘Oku ke fakaheka au ki ha fo‘i matangi: ‘Oku ke tuku ke u ma‘ali‘ali atu ai, Pea ke u mole ‘i he felasilasi ‘a e taufa.

²³Seuke, ‘oku ou ‘ilo pē te ke ‘omi au ki he mate, Pea ki he fale fakataha‘anga ‘o e kakai mo‘ui kotoa.

²⁴Ka ‘ikai ‘oku fai ha tautapa ‘oka tō ha taha? Seuke, ‘i he tu‘utāmaki ‘a ha taha ‘oku fai ‘a e kaila Koe‘uhi ko e ngaahi me‘a ko ia.[67]

²⁵He ‘ikai ne u tangi au ‘i he ‘aho na‘e faingata‘a‘ia ai ha taha? Na‘e mamahi hoku loto koe‘uhi ko e masiva.

²⁶He ko e lelei na‘a ku ‘amanaki ki ai; Kae hoko mai ‘a e kovi: Pea na‘a ku tatali ki he maama; Kae hoko mai ‘a e po‘uli ‘o e po‘uli.

²⁷‘Oku lili hoku fatu, ‘o ‘ikai toka; Kuo mo‘utāmakia au ‘e he ngaahi ‘aho kātaki.

²⁸Na‘a ku ‘alu fano pē kili ‘ui,[68] ka na‘e ‘ikai ko e la‘ā; Na‘a ku tu‘u ‘i he ‘ao ‘o e kakai, ‘o tangilāulau.

²⁹Kuo u hoko ko e tokoua ‘o e fanga siakale, Mo e kaume‘a ‘o e fanga ‘ositalesi.

³⁰Ko hoku kili ‘oku ‘uli‘uli, pea mafohi, Pea ‘oku vela hoku hui he pakukā.

³¹Ko ia ‘oku nofo ‘eku ha‘ape ki he tangi pē, Pea fakapetetangi pē ‘a ‘eku mimiha.