Read KO E TOH TAPU KATOA TONGA KO SIOPE 31 Bible Online

KO SIOPE 31 - KO E TOH TAPU KATOA TONGA bible

KO SIOPE 31

¹NA‘A ma alea mo hoku mata, ‘o u fai tu‘utu‘uni ki ai; Pea fēfē ai ha‘aku sio kovi ki ha ta‘ahine?

²Pea fēfē ai haku tofi‘a meia ‘Elohā ‘i ‘olunga, Mo haku ‘inasi meia Sātai ‘i Taukakapa?

³‘Ikai ‘oku a‘u ‘a e tu‘utāmaki ki he pau‘u? Mo ha tā kehe ki he kakai ‘oku nofo ki he kovi?

⁴‘Ikai ko e ‘Afio ia ‘oku ne lama hoku ngaahi ‘alunga? Mo lau ‘eku taulaka kotoa?

⁵Kapau ‘oku lau kuo u laka atu, ‘o ō mo loi, Pea kuo vave hoku va‘e ke muimui kia kākā:

⁶Ke fakafuofua au ‘e He‘ene ‘Afio ‘i he me‘a tautau totonu, Kae ‘afio‘i ‘e ‘Elohā ‘eku tonuhia.

⁷Kapau kuo afe hoku fononga mei he hala, Pea muimui hoku loto ki hoku mata, Pea lave ha ‘uli ki hoku ‘aofi nima:

⁸Tuku ke u to‘e au kae kai ‘e ha taha kehe; Pea ke ta‘aki fu‘u hoku ngaahi huli.

⁹Kapau kuo to‘oa hoku loto ki ha fefine alafia, Pea u tuku toitoi ki he matapā ‘o hoku kaungā‘api:

¹⁰Pea tuku ke fai ‘a e momosi mahoa‘a ‘e hoku uaifi ki ha taha kehe, Pea mākau ‘iate ia ha ni‘ihi kehe.

¹¹He ko e angahala fakalielia ia: Pea ko e kovi ke ‘ave ki he fakamaau.

¹²Seuke, ko e afi ia na‘e mei keina ‘o a‘u ki ‘Apatoni, Pea ta‘aki fu‘u hoku fua kotoa.

¹³Ka ne u ta‘etoka‘i ‘a e totonu fakalao ‘A ‘eku tamaio‘eiki pe kaunanga, ‘I he ‘i ai ‘enau me‘a mo au:

¹⁴Pea ko e hā ‘aku ‘e fai ‘oka tu‘u hake ‘a ‘Ela? Pea ko e hā te u tali ‘aki, ‘oka fai ‘e ia ‘a e sivi?

¹⁵‘Ikai ko ia na‘e ngaohi au ‘i he fatu, ‘A ‘Ene ‘Afio ai pē na‘e ngaohi ‘ena? Pea ko e Toko Taha ai pē na‘e fa‘u kimaua ‘i he manava?

¹⁶‘Ilo ‘e au ‘o kapau kuo u ta‘ofi ‘a e masiva mei he‘ene holi, Pe kuo u tuku ke ‘osi‘osi ‘a e mata ‘o si‘i uitou he holi noa,

¹⁷Pe kuo u kai toko taha ‘eku momo‘i mā, ‘O ‘ikai tuku ke kai ai ‘a e tamai mate!

¹⁸(‘Ā, talu ‘eku talavou mo ‘eku pusiaki ‘a e siana ko ē, ‘Ou hangē ha tamai kiate ia; Pea talu hoku fanau‘i mo ‘eku fale‘i ‘a si‘i fefine ko ē.)[69]

¹⁹‘Ilo ‘e au ‘o kapau na‘a ku sio ki ha taha ‘Oku mei tu‘utāmaki ko e masiva kofu, Mo si‘i masiva ‘oku ‘ikai hano kafu;

²⁰Kapau na‘e ‘ikai tāpuaki‘i au ‘e hono kongaloto, ‘O ‘ikai te ne māfana mei he fulufulu ‘o ‘eku fanga sipi!

²¹‘Ilo ‘e au ‘o kapau na‘a ku ino hoku nima ki he tamai mate, Ko ‘eku sio ‘oku ‘i he matanikolo hoku poupou:

²²Ke hu‘i hoku uma mei he hui fohe, Pea motu hoku nima mei he hokotanga!

²³He na‘e ‘iate au ‘a e manavahē ki ha tu‘utāmaki meia ‘Ela; Pea na‘e ‘ikai te u lava ke fai ha me‘a telia hono fu‘u ngeia.

²⁴‘Ilo ‘e au ‘o kapau na‘a ku tu‘u ‘i he koula ‘eku falala, Pea u pehē ki he koula mahu‘inga, Ko hoku pāletu‘a koe!

²⁵‘Ilo ‘e au ‘o kapau na‘a ku fu‘u fiefia ‘i he hulu ‘eku koloa, Mo fu‘u ma‘u hoku nima!

²⁶‘Ilo ‘e au ‘o kapau na‘a ku sio ki he tapa mai ‘a e la‘ā, Pe ko e hā‘ele ‘a e māhina ko e koto ngingila,

²⁷Pea to‘oa fufū ai hoku loto, Pea u lī atu ha ‘uma ki ai!

²⁸Ko e kovi mo ia foki ‘e ‘ave ki he fakamaau: He ko ‘eku faka‘otuamate‘i ‘a ‘Ela ‘oku ‘afio mei ‘olunga.

²⁹‘Ilo ‘e au ‘o kapau kuo u fiefia ‘i he tu‘utāmaki ‘a hoku fili, ‘O māfana hoku loto ‘i he ma‘u ia ‘e he kovi!

³⁰‘Ā, na‘e ‘ikai te u tuku hoku ‘ao‘ingutu ke angahala, He tuputupulefanua ke tō ha mala ki he‘ene mo‘ui.

³¹‘Ilo ‘e au ‘o kapau na‘e ‘ikai lau ‘e he kakai ‘o hoku tēniti, “Koloto ā ke ‘ilo ha taha kuo ‘alu mola he ‘api ni, ‘O ‘ikai mākona ‘i he kai kanomate!”

³²Na‘e ‘ikai mohe ‘i tu‘a ‘a e ‘āunofo; Na‘a ku fakaava hoku matapā ki hala.

³³‘Ilo ‘e au ‘o kapau kuo u tata‘o ‘eku ngaahi angahala hangē ko ‘Ātama, ‘O fufū ‘eku kovi ‘i hoku fatafata;

³⁴Ko ‘eku teteki na‘a ai ha fu‘u lolofi, Mo ‘eku manavahē telia ‘a e manuki ‘a e ngaahi matakali; ‘A ia ‘e pau ai ‘eku nofo mavahe, ‘ikai ‘alu ki tu‘a —

³⁵Taumaiā ‘oku ou ma‘u ha taha ke fanongo kiate au! (Vakai, ko ‘eku kolosi ē, ke tali au ‘e Sātai.) Pea ke u ma‘u ‘a e tohi kuo fai ‘e he tangata kuo ma hopo!

³⁶Tala atu, te u ‘ai ia ki hoku uma; Te u takai mōku ‘ū kalauni.

³⁷Te u ‘a‘au hokohoko kiate ia ‘eku ngaahi taulaka; Te u ‘unu‘unu kiate ia hangē ha ‘eiki.

³⁸Kapau kuo tangi hoku kelekele koe‘uhi ko au, Pea fetāngihi hono ngaahi kauefu,

³⁹Kapau kuo u kai hono mālohi ta‘etotongi, Pe fakaka‘anga ‘a e mo‘ui ‘a e kakai ‘oku ‘o‘ona:

⁴⁰Pea ke tupu ā ‘a e talatala ko e fetongi ‘o e uite! Mo e tea ko e fetongi ‘o e pa‘ale! Ko e ngata ē ‘o e lea ‘a Siope.