Read KO E TOH TAPU KATOA TONGA KO SIOPE 32 Bible Online

KO SIOPE 32 - KO E TOH TAPU KATOA TONGA bible

KO SIOPE 32

¹PEA tuku ai ‘e he tu‘unga me‘a ‘e toko tolu ko ē ‘enau tali ‘a Siope, koe‘uhi ‘oku ne kei taukave ‘ene tonuhia.

²Toki kohu ‘a e ‘ita ‘a ‘Ilaiū foha ‘o Palakela, ko e ha‘a Pusa mei he fāmili ‘o Lame: ‘io, na‘e kohu ‘ene ‘ita kia Siope, koe‘uhi ko ‘ene fakatonuhia‘i ia ‘e ia, ‘o tuku ‘a e ‘Otua.

³Na‘e kohu foki ‘ene ‘ita ki hono kaume‘a ‘e toko tolu, koe‘uhi na‘e ‘ikai te nau ma‘u ha tali; ka neongo ia ka nau fakahalaia‘i ‘a Siope.

⁴Pea kuo nofo‘aki tali ‘e ‘Ilaiū mo ‘ene ‘ū lea, kae‘oua ke ‘osi ‘a Siope, he kuo motu‘a ange ‘a kinautolu ‘iate ia.

⁵Ka ‘i he vakai ‘e ‘Ilaiū ‘oku ‘ikai ha tali ‘i he ngutu ‘o e tu‘unga me‘a ‘e toko tolu, pea kohu ai ‘ene ‘ita.

⁶Toki tali ‘e ‘Ilaiū foha ‘o Palakela ko e ha‘a Pusa, ‘o ne pehē, Ko e si‘i au ‘i he lau motu‘a, Pea ko e ha‘a sialea kimoutolu; Ko ia na‘a ku fakateteki, ‘O u papaka ke ‘a‘au atu ‘a e me‘a kuo u ma‘u.

⁷Na‘a ku pehē, Na‘e mei lea ‘a taimi lahi, Pea ke faka‘ilo poto ‘e he lahi ta‘u.

⁸Ka ko e laumālie ‘i he tangata, ko ia ia; ‘Io, ko e hō ‘a Sātai ‘oku ne ‘atamai ai.

⁹Tala‘ehai ko e lalahi pē ‘oku poto, Pea tala‘ehai ko ha‘a mātu‘a pē ‘oku ‘ilo ‘a e totonu.

¹⁰Ko ia ‘oku ou pehē, Fanongo mai koe kiate au, Ka u ‘a‘au foki ‘e au ‘a e me‘a kuo u ma‘u.

¹¹Tū na‘a ku nofo ‘amanaki ki ho‘omou lea; Na‘a ku fokotu‘u telinga, kae‘oua ke ‘osi ho‘omou fakamatala: Kae‘oua ke mou hakule ha‘amou faka‘uhinga.

¹²Ka neongo na‘a ku mātu‘aki tokanga atu kiate kimoutolu; Kae uoke, ‘oku ‘ikai ha taha ‘e ha‘aki ‘a Siope, Ha taha ‘e matali ‘ene ngaahi lea — hamou taha.

¹³Ka te mou lau ‘apē, Kuo tau a‘u atu ki ha poto; Ko ‘Ela pē ‘e mafakateka ia; ‘e ‘ikai lava ‘e ha tangata:

¹⁴Ka kuo te‘eki ke ne faka‘otu ‘ene lau kiate au; Pea tala‘ehai te u tali ‘aki ‘a e ngaahi lea ‘amoutolu.

¹⁵Kuo puputu‘u ‘a ē; ‘oku ‘ikai ha‘anau kei tali: Kuo mahu‘i ‘a e lea meiate kinautolu.

¹⁶‘Io, ne u tatali, kae ‘ikai te nau lea, Ka nau mo‘unofoa pē, ‘o ‘ikai toe tali.

¹⁷Ka u lea mu‘a ‘e au koe‘uhi ko ho‘oku, ‘inē? ‘Io, ka u ‘a‘au ‘a e me‘a kuo u ma‘u foki ‘e au.

¹⁸He ‘oku ou pito he lea; Ko e laumālie ‘i hoku fatu ‘oku kukuta tu‘u, ‘o ue‘i au.

¹⁹Seuke, ko hoku fatu ‘oku hangē ko e uaine ‘oku ‘ikai hano fakamao: ‘Oku hangē ka pā, tatau mo e ‘ainga uaine fo‘ou.

²⁰Ka u lea mu‘a ka u ma‘u ha nonga; Ka u to‘o hoku ngutu, ‘o u fai ha tali.

²¹Molekemama‘o ha‘aku toka‘i ha taha; Pea tala‘ehai te u lapu ki ha tangata.

²²Seuke, ‘oku ‘ikai te u ‘ilo ki he lapu; Ka ne u fai ia, ko e kemo pē ‘a e ‘ave au ‘e he ‘Afio na‘e ngaohi au.