Read KO E TOH TAPU KATOA TONGA KO SIOPE 34 Bible Online

KO SIOPE 34 - KO E TOH TAPU KATOA TONGA bible

KO SIOPE 34

¹TOE fokotu‘u atu ‘e ‘Ilaiū, ‘o ne pehē;

²‘Ilonga ha poto, fanongo mai ki he‘eku lea; ‘Io, mou fokotu‘u telinga mai, ‘a e kakai ‘ilo me‘a.

³He ‘oku sivi lea ‘a e telinga, Hangē ‘oku kamata hake ‘e he ‘ao‘ingutu ‘i he kai.

⁴Tau sivi ma‘atautolu ‘a e totonu: Tau ‘ilo fakaekitautolu pe ko e hā ‘oku lelei.

⁵He kuo lea ‘a Siope, ‘o pehē, “‘Oku ou tonuhia; Ka ko ‘Ela kuo ne to‘o ‘eku malu fakalao.

⁶Neongo ‘eku totonu, ‘oku lau au ko e loi; Ko hoku fana‘i ‘oku hangē ka kovi, ‘Osi, ‘oku ‘ikai ha‘aku angahala.”

⁷Ko hai ha mafi hangē ko Siope, ‘Oku ne inu luki hangē ha inu vai?

⁸Pea ‘oku ne hiki ki he fa‘ahi ‘o e kau faikovi, Pea ‘oku ne fai ke ō mo e kau tangata angahala.

⁹He kuo ne pehē, “‘Oku ‘ikai ‘aonga ki he tangata ke felātani mo e ‘Otua.”

¹⁰Ko ia, fanongo kiate au, ‘a e kau tangata ‘atamai: Molekemama‘o ‘a e fai angahala ‘a ‘Ela; Mo e faikovi ‘a Sātai.

¹¹He ko e fai ‘a e tangata ‘oku ne fakaai kiate ia, Pea ko e ‘alunga ‘o ha tangata ‘oku ne ‘ai ke fekītaki mo ia.

¹²‘Āua! tala atu ‘e ‘ikai lava ‘a ‘Ela ke faihala, Pea ‘oku ‘ikai ke piko‘i ‘a e totonu ‘e Sātai.

¹³Ko hai kuo tuku tauhi kiate ia ‘a māmani? ‘Io, ko hai kuo hilifaki ki ai ‘a e nofo kotoa?

¹⁴Ka Ne tokanga kiate Ia pē, Te Ne tānaki kiate Ia hono laumālie mo ‘ene mānava;

¹⁵‘E hokotaki fakataha ‘a e kakano kotoa, Pea ‘e foki ‘a e tangata ki he efu.

¹⁶Pea kapau ‘oku ai hao ‘atamai, fanongo ki he me‘a ni: Fokotu‘u telinga mai, ‘o ongo‘i ‘eku lea.

¹⁷‘E lava koā ke pule ‘e ha taha ‘oku fehi‘a ki he totonu? Pea te ke lau ko e angahala ‘a e Fai totonu mo Māfimafi?

¹⁸‘E lau koā ki ha tu‘i, Ko e faka-Pileali koe? ‘E lau ki ha‘a mā‘olunga, Ko e angahala koe?

¹⁹Ki he ‘Afio ‘oku ‘ikai te ne toka‘i ‘a e fotu mai ‘a hou‘eiki, ‘Oku ‘ikai te ne ‘ilo ‘a e koloa‘ia, kae tuku ‘a e masiva? He ko e ngāue ‘a hono nima ‘a kinautolu kotoa pē.

²⁰Ko e kemo kuo nau mate Pea ‘i he tu‘uapō ‘oku lulu‘i ‘a e kakai, ‘o mole; Pea ‘oku ‘ave ‘a e kakai to‘a ta‘ekau ai ha nima.

²¹He ko hono ongo fo‘i fofonga ‘oku ‘i he ‘alunga ‘o e tangata takitaha, Pea ‘oku ne ‘afio‘i ‘ene taulaka kotoa.

²²‘Oku ‘ikai ha po‘uli, pea ‘oku ‘ikai ha malu matolu, Ke toi ‘o fufū ai ‘a e kakai faikovi.

²³He tala‘ehai ‘e ongosia hila‘i ‘e ‘Ela ha taha ‘I he‘ena hopo mo ‘Ene ‘Afio.[71]

²⁴‘Oku ne laiki ‘a e kau mafi ta‘eha hakule, ‘Oku ne fokotu‘u ha ni‘ihi kehe ke fetongi.

²⁵Ko hono ‘uhinga, he ‘oku ne ‘afio‘i ‘enau fāliunga; Ko ia ‘oku ne fulihi po‘uli, pea nau havehave.

²⁶‘Oku ne taa‘i kinautolu tatau mo e kau angahala, ‘I ha potu ‘e sio kotoa pē ki ai.

²⁷Tā ko hono ‘uhinga ia ‘apē na‘a nau afe ai mei he muimui ki He‘ene ‘Afio, ‘O ‘ikai te nau momo‘i fie tokanga‘i hono ngaahi ‘alunga:

²⁸‘Enau ‘ai ke tau hake ki he ‘Afiona ‘a e tautapa ‘a masiva, Pea ongo kiate ia ‘a e tautapa ‘a e tu‘utāmaki.

²⁹Pea ka kuo fai ‘e ia ha fakanonga, pea ko hai ‘e lau ko e halaia? Pea ka kuo ne fufū hono fofonga, pea ko hai tū ‘e lava ke sio ki ai? Tatau ‘ene fai ki ha kakai pea mo ha fo‘i tangata.

³⁰Ke ‘oua na‘a tu‘i ha tangata ‘oku angahala fufū, Mo e fokotu‘u tauhele ki he kakai.

³¹Seuke, na‘e mei taau ke lau kia ‘Ela, ‘o pehē, Kuo u fua ‘eku hia — ‘e ‘ikai te u toe fai me‘a pango.

³²Ko e me‘a ‘oku ‘ikai te u sio ki ai, faka‘ilo mai ‘e koe: Ka kuo u fai kovi, ‘e ‘ikai te u toe fai.

³³Ko e pehē koā ke fai ‘ene tongi ngāue ke hoa mo ho‘o sio? He kuo ke fakaanga. Seuke, ko koe ‘oku ‘a‘au ke fili ki ai, ‘o ‘ikai ko au. Pea ka ai ha me‘a kuo ke ma‘u, pea lea mai.

³⁴Ko e kakai ‘atamai te nau pehē kiate au; Pea mo ha poto lahi ‘oku fanongo mai:

³⁵‘Oku lea ‘a Siope ‘i he ta‘e‘ilo me‘a ‘Io, ko ‘ene ngaahi lea ‘oku ‘ikai fai mo e fakakaukau.

³⁶‘Amusia ange ‘e au ke sivi ‘a Siope ke motupula, Koe‘uhi ko ‘ene tali hangē ko e kakai kovi.

³⁷He ‘oku ne kanoni ‘aki ‘ene angahala ‘a e pau‘u: ‘Oku ne huhua mai kiate kitautolu, ‘O ne fakalahi lau kia ‘Ela.