Read KO E TOH TAPU KATOA TONGA KO SIOPE 38 Bible Online

KO SIOPE 38 - KO E TOH TAPU KATOA TONGA bible

KO SIOPE 38

¹TOKI tali ‘a Sihova kia Siope mei he loto taufa, ‘o ne folofola mai,

²Ko hai tū hena ‘oku ‘ai ke hā faka‘ui‘uilātai ‘a e tu‘utu‘uni ‘Aki ‘ene ngaahi lea ta‘epoto?

³Huke mu‘a ho vala hangē ha to‘a; Ka u fehu‘i atu ka ke hīnoi‘i au.

⁴Na‘a ke ‘i fē ‘i he‘eku tanupou ‘a māmani? Tala mai, ‘o kapau ‘oku ke lava ke fakamahino.

⁵Ko hai na‘a ne tu‘utu‘uni hono fua — kapau ‘oku ke ‘ilo? Pe ko hai na‘e falō ‘a e kafa ki ai?

⁶‘Oku velo ki he hā hono ngaahi tefito‘i pou? Pe ko hai na‘e fakatoka hono maka tuliki?

⁷‘A e taimi na‘e hiva fakataha ai ‘a e ngaahi fetu‘u pongipongi, Pea hiki mavava kotoa pē ‘a e ngaahi foha ‘o e ‘Otua.[83]

⁸Pea ko hai na‘e tāpuni ‘a e tahi[84] ‘aki ‘a e ngaahi matapā, ‘I he‘ene hae mai, ‘o hū ki tu‘a mei he fatu?

⁹‘A e taimi na‘a ku ‘ai ‘ani ‘ao moano kofu, Mo e ‘ao fakapo‘uli moano kofu valevale.

¹⁰Pea u laiki atu ki ai ke tu‘u ‘eku fakangatangata; Pea u ‘ai matapā mo e fakama‘u;

¹¹‘O u pehē, Ngata ē ho‘o ha‘u; Pea ‘oua te ke toe taha mai, Pea ‘e fakangatangata ē ‘a e mofuta ho ngaahi peau.

¹²Lolotonga ho‘o mo‘ui kuo ke fai tu‘utu‘uni koā ki he pongipongi? Pea faka‘ilo ki he hengihengi hono potu?

¹³Ke ne puke ki he ngaahi tapatapa ‘o māmani, Ko ia ‘oku tupe‘i ‘a e kau angahala mei ai.

¹⁴‘Oku hā kehe leva ‘o hangē ko e ‘umea ‘oku ‘ai ki ai ‘a e sila; Pea tekefili mai ‘a e me‘a kehekehe hangē kuo ‘ai kofu.

¹⁵Pea ‘oku hiki mei he kau angahala ‘a e me‘a ‘oku nau māma‘aki, Pea kuo laikia ‘a e nima na‘e hiki tā.

¹⁶Kuo ke a‘u ‘apē ki he ngaahi fauniteni ‘o e tahi? Mo ke ha‘ele ‘i he takele ‘o e moana?

¹⁷Na‘e fakaava nai kiate koe ‘a e ngaahi matanikolo ‘o Mate? ‘Io, ne ke sio koā ki he ngaahi matanikolo ‘o e Maama ‘Ata?

¹⁸Kuo ke sivi ‘o ‘ilo ‘apē ‘a e laulahi ‘o māmani? Tala mai, ‘o kapau ‘oku ke ‘ilo ‘a e ngaahi me‘a ni kotoa.

¹⁹Ko e fē tū ‘a e hala ki he nofo‘anga ‘o e maama? Mo e po‘uli foki, ko e fē hono potu ‘o‘ona?

²⁰He kuo pau te ke lava ke to‘o ia, ‘o ‘ave ki hono kau‘ā, Pea tā ‘oku ke ‘ilo ‘a e ngaahi afenga ki hono fale.

²¹‘Oku ke ‘ilo ki ai; he na‘e fanau‘i koe ‘i he taimi ko ia, Pea ko e lau ‘o ho ta‘u ko e me‘a fakamanavahē!

²²Kuo ke a‘u ‘apē ki he ngaahi feleoko ‘o e sinou, ‘Io, kuo ke sio nai ki he ngaahi feleoko ‘o e ‘uha maka?

²³‘A ia kuo u ta‘ofi ki ha taimi faingata‘a, Ki he ‘aho ‘o e fepaki mo e tau.

²⁴Ko e hā nai ‘a e ‘alunga ‘o e tufa maama? ‘A e veteki atu ‘a e matangi hahake ki he fonua?

²⁵Ko hai na‘a ne foa ha tafenga ki he lōvai? Mo ha hala ki he ‘uhila ‘o e mana?

²⁶Koe‘uhi ke ai ha ‘uha ki he fonua ‘oku ‘ikai ‘i ai ha taha, ‘A e toafa ‘oku ‘ikai ‘i ai ha tangata:

²⁷Ke fakamākona ‘a e potu maveu mo anganoa, Pea ke laku mai ‘e he mohuku hono muka.

²⁸‘Oku ma‘u ‘e he ‘uha ha tamai? ‘Io, ko hai ‘oku fakatupu ‘a e ngaahi tulutā hahau?

²⁹‘Oku ‘alu atu ‘a e ‘aisi mei he fatu ‘o hai? ‘Io, ko hai ‘oku ne fanau‘i ‘a e hahau maka ‘o e ‘atā?

³⁰‘Oku mohe ‘a e vai hangē ha maka, Pea ‘oku fema‘uma‘utaki ‘a e funga ‘o e loloto.

³¹Te ke lava koā ke ha‘i ‘a e veteki ‘a Mataliki? Pe ke vete ‘a e ha‘i ‘a ‘Olioni?

³²Te ke lava ke fakaholo mai ‘a e Sōtiaka ‘i hono taimi totonu? Pea ke taki ‘a e Pea mo ‘ene fānau?

³³‘Oku ke ‘ilo ‘a e ngaahi lao ‘o e langi? Te ke lava ke fakaai ‘enau pule ki he fonua?

³⁴Te ke ofa‘aki ho le‘o ke a‘u ki he ‘ao, Kae pulonga koe ‘e he lōmaki?

³⁵‘Oku ke fekau atu ‘ani ‘uhila pea nau ‘alu? Pea te nau tali mai, Ko kimautolu eni?

³⁶Ko hai na‘e tuku ‘a e potu ki he fanga pīkoka?[85] ‘Io, ko hai na‘e ‘ange ki he moa ta‘ane[86] ‘ene poto ke vavalo?

³⁷Ko hai ha poto te ne lava ke malau ‘a e ngaahi ‘ao? ‘Io, pea ko hai ‘e lava ke matule ‘a e ngaahi hina ‘o e langi?

³⁸‘I ha taimi ‘oku hangē kuo haka mo lilingi ‘a e efu; ‘O hoko ko e ukamea ‘atā ‘O fema‘uma‘utaki ‘a e kauefu.

³⁹Te ke tuli ‘a‘alu ma‘a e laione toutama, ‘O fakamākona ‘a e fiekaia ‘a e laione mui?

⁴⁰‘Oka nau ka tokoto ‘i honau nofo‘anga, ‘O nofo he ngapulopulou ko e tokamalumu.

⁴¹Ko hai ‘oku ne tokonaki kakano ma‘a e lēveni, ‘Oka tangi ‘ene fānau kia ‘Ela, Si‘enau hē holo he masiva me‘akai?