Read KO E TOH TAPU KATOA TONGA KO SIOPE 39 Bible Online

KO SIOPE 39 - KO E TOH TAPU KATOA TONGA bible

KO SIOPE 39

¹‘OKU ke ‘ilo ‘a e taimi ‘e fā‘ele ‘a e fanga kosi nofo mo‘unga? ‘Oku ke tokanga‘i ‘a e langā ‘a e fanga tia?

²‘Oku ke lava ke lau ‘a e ngaahi māhina kuo kakato? Pea ‘oku ke ‘ilo ‘a e taimi te nau fā‘ele ai?

³‘Oku nau hanoku hifo, ‘oku nau tuku ‘enau fānau ke hae mai, ‘Oku nau sī atu honau mamahi‘anga.

⁴‘Oku ma‘u mālohi ‘enau fānau, ‘o tupu ke lahi ‘i he tuku‘uta; ‘Oku nau ‘alu atu, ‘o ‘ikai foki mai kiate ia.

⁵Ko hai na‘a ne tuku atu ‘a e ‘asi kaivao ke tau‘atāina? ‘Io, ko hai na‘e vete ‘a e ha‘i ‘o e kai kilokilo?

⁶‘A e manu kuo u tuku ke ne ‘api ‘aki ‘a e fonua mamate, Pea ke ne nofo‘anga ki he kelekele māsima.

⁷‘Oku ne ‘ū‘ū ki he longoa‘a mai ‘a e kolo; Kuo te‘eki ke ne ongo‘i ‘a e le‘o ‘o e tama fakateka.

⁸Ko e me‘a ‘oku ma‘u ‘i he mo‘unga ko hono kaikai‘anga ia; Pea ‘oku ne ha‘ao ki he me‘a kotoa ‘oku mata.

⁹‘E loto ‘a e pufaloe vao ke ngāue kiate koe? Te ne mohe po‘uli ki ho fale manu?

¹⁰Te ke no‘otaki ‘a e pufaloe vao, Ke ‘i he kauefu ‘a e leta ‘o hono piti? Te ne muimui kiate koe ‘i he ngaahi tele‘a, he toho ‘a e fu‘u leki?

¹¹Te ke falala kiate ia koe‘uhi ko e lahi hono ngū? Pe tuku ‘atā kiate ia ho‘o fita?

¹²Te ke tu‘anaki ki ai ke fakafoki ho tenga na‘e tō? Mo tānaki ki ho haha‘anga uite?

¹³‘Oku faka‘ofo‘ofa ‘a e ngalulululu ‘a e kapakau ‘o e ‘ositalesi; Ka he ko e kapakau mo e fulufulu ‘o e sitoaki?[87]

¹⁴He ‘oku ne li‘aki hono fua ‘i he kelekele, ‘O ne tata‘o pē ‘i he funga efu,

¹⁵Pea kuo ngalo ‘iate ia ‘e malaki nai ‘e ha va‘e, Pe laiki ‘e he manu ‘o e vao.

¹⁶‘Oku ne fai ta‘e‘ofa ki he‘ene fānau, ‘o hangē ‘oku ‘ikai te nau kau kiate ia; Ko e kulanoa ‘ene ngāue, ka ‘oku ‘ikai te ne hoha‘a:

¹⁷He kuo tuku ‘e ‘Elohā ke ngalo ‘ene poto, ‘O ‘ikai vahe kiate ia hono ‘inasi ‘atamai.

¹⁸Ka ‘oka ‘iloange te ne mafao atu, ‘o laka puna;[88] ‘Oku ne kakae‘i ‘a e hoosi mo ia ‘oku heka ai.

¹⁹Ko koe koā ‘oku foaki ki he hoosi ‘ene mālohi? Ko koe kuo kofu ‘aki hono kia ‘a e tala ‘oku tu‘u tekiteki na?

²⁰Ko koe na‘e ngaohi ia ke fepunakaki hangē ha he‘e? ‘Oku fakangeingei ‘a e ha‘aha‘a ‘ene holi!

²¹‘Oku nau vaku ‘i he lautoka, ‘o hākahaka ‘i honau mālohi; ‘Oku ne ‘alu atu ke fakafetaulaki ki he mahafu;

²²‘Oku ne kata mate ki he fakailifia, ‘O ‘ikai si‘i ke tuka: Pea ‘oku ‘ikai te ne popoi ki he mata ‘o e heletā.

²³‘Oku ngatata ‘i hono funga ‘a e hōfanga hau, ‘A e tao ngingila, mo e sifatau.

²⁴‘I he‘ene ngaungaue, mo ‘ene ‘oho, ‘oku ne folofua ‘a e kelekele; ‘Oku ‘ikai te ne pā ki lalo ka ifi ‘a e talupite.

²⁵‘I he ongo mai ‘a e ifi kotoa pē ‘oku mahe‘a mai ‘ene “Hahā!” ‘Oku ne fakahongi ki he tau kei mama‘o; ‘A e longoa‘a ‘o e hou‘eiki tau, mo e tuē.

²⁶Ko ho‘o fakahinohino koā ‘oku fakafolau ai ‘a e haoke, ‘O ne folahi ai hono kapakau ke puna ki he tonga?

²⁷Ko ho‘o fekau ‘apē ‘oku puna mā‘olunga ai ‘a e ‘īkale, ‘O ne ‘ai hono pununga ki he taua kapa?

²⁸‘Oku ne nofo‘ia ‘a e makatu‘u, ‘o ngaohi ai hono pununga, ‘I hono tumutumu māsila mo e puke.

²⁹‘Oku ne ha‘ao mei ai ki he‘ene kai, ‘Oku vakai‘i ‘e hono mata mei he mama‘o.

³⁰Na‘a mo hono fānganga ‘oku nau misi toto, Pea ko e potu ‘oku ‘i ai ‘a e mate, ‘i ai leva ia.