Read KO E TOH TAPU KATOA TONGA KO SIOPE 4 Bible Online

KO SIOPE 4 - KO E TOH TAPU KATOA TONGA bible

KO SIOPE 4

¹PEA na‘e toki fokotu‘u mai ‘a ‘Elifasi mei Tīmani, ‘o ne pehē,

²Kapau ‘e ala‘aki atu ha lea, Te ke mamahi? He ko hai ‘e lava ke ta‘ofi ai pē mei he lea?

³Vakai, kuo ke akonaki ki he tokolahi, Pea kuo ke poupou nima vaivai.

⁴Na‘e pukepuke ‘a e heke ‘e ho‘o ngaahi lea, Pea ko e tui fengatāliaki kuo ke ha‘iha‘i.

⁵Pea ko eni ko e taiēokoatu, pea kuo ke vaivai; ‘Oku ne mātu‘aki lave atu, pea ‘oku ke puputu‘u.

⁶‘Ikai na‘a ke mei falala ki ho‘o lotu, Pea tu‘u ho‘o ‘amanaki ‘i he totonu ho ‘alunga?

⁷Manatu mu‘a, ko hai kuo ‘auha ta‘ehalaia? Pe ‘i fē fonua ne tu‘usi ai ‘a e kakai angatonu?

⁸Ko ‘eku vakai ‘aku, Ko kinautolu ‘oku ngoue ‘aki ‘a e kovi, Mo kinautolu ‘oku tō ‘a e fakamamahi, Ko kinautolu ‘oku utu ‘a e me‘a ko ia.

⁹‘I he māfulu ‘a ‘Elohā na‘a nau ‘auha, Pea ‘i he mānava ‘o hono fofonga na‘a nau ‘osi.

¹⁰Ko e kālou ‘a e laione, Mo e le‘o ‘o e laione fekai Kuo ‘osi; Pea mapaki ‘a e nifo ‘o e laione mui.

¹¹‘Oku hē mama‘o ‘a e laione kaukaua ko e masiva ha‘alu, Pea ‘oku movete ‘a e fānganga ‘o e laione toutama.

¹²Ko eni, na‘e faka‘ete mai ha folofola kia kita ni, Pea na‘e ma‘u ‘e hoku telinga hano ngananganaiki.

¹³Kuo u mo‘ua ‘i he ngaahi fifili, ‘Oku tupu mei he vīsone ‘oku hoko po‘uli, ‘Oka tō ki ha tangata ha mohe ‘āvea.

¹⁴Na‘e ‘ohofia au ‘e ha ilifia, mo ha fakalilifu, Pea fengatāliaki ai ‘a e fu‘u ‘ūhui ni.

¹⁵Toki ma‘ili mai ha matangi ki hoku mata; Na‘e vavana hoku sino kotoa.

¹⁶Ne mamalu mai ‘a e Me‘a Ka na‘e ‘ikai te u ma‘iloa hono fōtunga; Ko ha ‘ata pē na‘e ma‘ali mai: Na‘e ai ha ngananganaiki Pea u ongo‘i ha lea,

¹⁷“‘E faitotonu ange koā ‘i he ‘Otua Ha tangata-me‘a-vaivai?[7] ‘Afio na‘e ngaohi ia?

¹⁸Vakai, na‘a mo hono lahi ‘oku ‘ikai te ne falala ki ai; Pea ‘oku ne tuku ‘e ala hē ‘e he‘ene kau ‘āngelo:

¹⁹Huanoa ‘a e nofo fale kelekele, ‘A e fa‘ahinga ‘oku tupu‘anga efu, Pea ‘oku momosingofua ange ‘i he mū!

²⁰Mei he pongipongi ki he po‘uli ‘oku fai honau tu‘usi; ‘Oku nau ‘auha ai pē, kae ‘ikai ha tokanga.

²¹‘Ikai ‘oku pehē? ‘oku ta‘aki honau pou tēniti ‘i loto; ‘Oku nau mate kae te‘eki poto.