Read KO E TOH TAPU KATOA TONGA KO SIOPE 42 Bible Online

KO SIOPE 42 - KO E TOH TAPU KATOA TONGA bible

KO SIOPE 42

¹PEA tali ‘e Siope ki he ‘Eiki, ‘o pehē,

²‘Oku ou ‘ilo ‘oku ke mafai ‘a e me‘a kotoa pē, Pea ‘oku ‘ikai ha‘o fakakaukau ‘e ala ta‘ofia.

³Na‘a ke me‘a mai koā, “Ko hai ia ‘oku faka‘uhinga kehe tu‘utu‘uni ko ‘ene masiva ‘ilo?” Ko au ia, ‘eku ‘a‘au ‘a e ngaahi me‘a na‘e ‘ikai te u a‘usia, ‘A e ngaahi me‘a fakaofo fau, ‘o ‘ikai te u tāea.

⁴Me‘a mai ka u tali ho‘o folofola na‘e pehē, “Te u fehu‘i atu ka ke tali mai.”

⁵Ne u fanongo kiate koe ‘aki ‘a e fanongo ‘a e telinga; Ka ko eni kuo māta‘i koe ‘e hoku mata;

⁶Ko ia ai, ‘oku ou fakalili‘a kiate au, ‘O u fakatomala‘i he funga efu mo e efuefu.

⁷Pea ko ia, hili ‘a e fai ‘e he ‘Eiki ‘a e lea ko ia kia Siope, na‘a ne folofola kia ‘Elifasi mei Tīmani, ‘o pehē, Kuo tō ‘eku ‘ita kiate koe mo ho ongo kaume‘a: he ‘oku ‘ikai totonu ho‘omou faka‘uhinga au, ‘o hangē ko ‘eku tamaio‘eiki ko Siope.

⁸Pea ko eni, ke mou hanga ‘o to‘o mai ha fitu‘i pulu mo ha fitu‘i sipi tangata, pea mou ō ki he‘eku tamaio‘eiki ko Siope, ‘o fai ma‘amoutolu ha feilaulau-mōifua; pea ko ‘eku tamaio‘eiki ko Siope te ne hūfia kimoutolu: he te u tali ia: ke ‘oua na‘a ku fai kiate kimoutolu ‘o fakatatau ki ho‘omou vale; he ‘oku ‘ikai totonu ho‘omou faka‘uhinga au, ‘o hangē ko ‘eku tamaio‘eiki ko Siope.

⁹Ko ia, na‘e ‘alu ‘a ‘Elifasi mei Tīmani mo Pilitati mei Sua‘a mo Sofa‘a mei Nā‘ama, pea nau fai ‘o hangē ko honau fekau ‘e Sihova: pea na‘e tali ‘a Siope ‘e he ‘Eiki.

¹⁰Pea fakafoki ‘e he ‘Eiki ‘a e pōpula ‘a Siope ‘i he‘ene hūfia hono ngaahi kaume‘a; pea na‘e foaki ‘e he ‘Eiki kia Siope, ‘o liunga ua ‘i he me‘a na‘a ne fua ma‘u.

¹¹Pea na‘e omi kiate ia hono ngaahi tokoua mo hono ngaahi tuofāfine, mo hono kau fe‘iloaki mu‘a, pea nau keinanga mo ia ‘i hono fale; ‘o nau fakamamahi mo ia, mo fakalelu ki ai ‘i he fu‘u kovi kuo ‘omi ‘e he ‘Eiki kiate ia: pea nau ‘ange takitaha kiate ia ha kesita mo ha mama koula.

¹²Ko ia, na‘e fai tāpuekina hake meia Sihova ‘a e taimi ki mui ‘o Siope ‘i he taimi mu‘a: pea na‘a ne ma‘u ha fanga sipi ‘e taha mano mā fā afe, mo ha kāmeli ‘e ono afe, mo e afe‘i taulua‘i pulu, mo ha afe‘i ‘asi fefine.

¹³Na‘a ne ma‘u foki ha foha ‘e toko fitu mo ha ‘ōfefine ‘e toko tolu.

¹⁴Pea ne fakahingoa ‘a e ‘uluaki ta‘ahine ko Simaima; pea ko hono ua, ko Kesaia; pea ko hono tolu, ko Kēleni-hāpuka.[101]

¹⁵Pea na‘e ‘ikai ‘ilo ‘i he fonua kotoa ha tu‘unga fefine na‘e faka‘ofo‘ofa hangē ko e ngaahi ‘ōfefine ‘o Siope; pea na‘e vahe ‘e he‘enau tamai hanau tofi‘a fakataha mo honau ngaahi tuonga‘ane.

¹⁶Pea hili ia na‘e mo‘ui atu ‘a Siope ko e ta‘u ‘e teau mā fāngofulu, ‘o ne mamata ki he‘ene fānau mo e makapuna, ko e to‘utangata ‘e fā.

¹⁷Pea toki pekia ‘a Siope kuo motu‘a mo a‘ua‘u.