Read KO E TOH TAPU KATOA TONGA KO SIOPE 5 Bible Online

KO SIOPE 5 - KO E TOH TAPU KATOA TONGA bible

KO SIOPE 5

¹TAUTAPA mu‘a: ko hai ‘e tali koe? ‘Io, ko hai ‘i he ha‘a Tapu te ke hanga ki ai?

²Sa‘a! ko e vale ‘oku ‘itangofua te ne ‘auha, Pea ko e lēlea lau ‘oku māfana vave, ko hono mate‘anga ia.

³Ne u mamata ‘e au ki he vale kuo fu‘u ma‘uma‘uluta; Kae fokifā pē na‘a ku talakaa‘i hono nofo‘anga.

⁴Ko ‘ene fānau ē na‘e masiva ha ni‘ihi ke tokoni, Pea ‘oku laiki kinautolu ‘i he fai‘anga fono, ‘o ‘ikai ha ‘aofi.

⁵‘Io, ‘oku kai hono ta‘u ‘e he fiekaia, ‘O ne to‘o mei he loto ‘ā talatala,[8] Pea ‘oku fanga ‘a e hele ki he‘enau koloa.

⁶He ‘oku ‘ikai ke fisi ‘a e kovi mei he efu, Pea ‘oku ‘ikai ke tupu mei he kelekele ‘a e mamahi;

⁷He na‘e fā‘ele‘i ‘a e tangata ki he mamahi, Hangē ‘oku puna hake ‘a e ngaahi kalofiama.[9]

⁸Ka ‘oka ne ko au, te u ha‘ao kia ‘Ela, ‘Io, te u ‘ave ki he ‘Otua ‘eku me‘a:

⁹‘A ‘Ene ‘Afio ‘oku ne fai me‘a lalahi mo ta‘emahakulea; ‘Ani me‘a fakaofo mo ta‘efa‘alaua.

¹⁰‘Oku ne tuku ‘uha ki he funga fonua, ‘O fekau atu ha vai ki he mata ‘o e ngoue‘anga:

¹¹Ko ‘ene fakamā‘olunga ‘a si‘i mā‘ulalo; Pea nofo ‘a kau tangi ki he malu ‘a mo‘unga.

¹²‘Oku ne motuhi ‘a e fakakaukau ‘a e kau olo, Ko ia ‘oku ‘ikai ke lava ‘e honau nima ‘a e me‘a ‘oku nau fai ki ai.

¹³‘Oku ne pō ‘a e kau poto ‘i he fai olopoto ‘anautolu; Kae tū‘ulu ‘a e fale‘i ‘oku fai ‘e he kau mamio.

¹⁴Kei ‘aho ‘oku nau hū ki he po‘uli, ‘Io, ‘oku nau taupō ho‘atā ‘o hangē ko e pō ia.

¹⁵Pea ‘oku ne fakahaofi si‘i masiva[10] mei he heletā ‘a honau ngutu, Pea mei he nima ‘o e kau fakamālohi.

¹⁶Ko ia ‘oku tupu ha ‘amanaki ki he vaivai, Pea ‘oku kū ngutu ‘a e kovi.

¹⁷Tala atu, ‘oku monū‘ia ‘a e tangata ‘oku tautea ‘e ‘Elohā: Ko ia, ‘oua te ke va‘inga‘aki ‘a e ako ‘oku fai ‘e Sātai.

¹⁸He ko e taha ia ‘oku mulu‘i, ‘o toe ha‘iha‘i; ‘Oku ne ‘ai ke kafo, pea ko hono nima ai pē ‘oku faito‘o,

¹⁹Te ne fakahaofi koe ‘i he faingata‘a ‘e ono; Pea ‘i hono fitu ‘e ‘ikai lave ha kovi kiate koe.

²⁰Ka honge, te ne fakahaofi koe mei he mate; Pea mei he ivi ‘o e heletā ‘oka ko e tau.

²¹‘I he tā ‘a e uipi ko e ‘elelo, te ke nofo fufū; ‘E ‘ikai te ke manavahē ki he faka‘auha ‘oka ‘unu‘unu mai.

²²Ko e faka‘auha mo e hālofia te ke kata ki ai; Pea ‘e ‘ikai te ke manavahē ki he manu fekai ‘o e fonua.

²³Kaekehe, ‘e ai ha‘o talite mo e ngaahi maka ‘o e vao; Pea ‘e melino ho vā mo e manu kaivao.

²⁴Pea te ke ‘ilo ‘oku tu‘umālie ho tēniti; Pea ‘i ho‘o lau ho‘o monumanu, ‘oku ‘ikai hē ha taha.

²⁵Pea te ke ‘ilo ‘e lahi ho hako, Pea hangē ko e mohuku ‘o e fonua ho pikilau.

²⁶Te ke hoko ki ho tanu‘anga kuo ke fu‘u a‘u, Pea hangē ha ‘ū koane ‘oku utu ‘i Faka‘afumate.

²⁷Tala atu, ko eni pē: Kuo mau hakule ki ai, pea ko ia pē; Fanongo ki ai, pea ‘ilo ‘e koe ma‘au.