Read KO E TOH TAPU KATOA TONGA KO SIOPE 6 Bible Online

KO SIOPE 6 - KO E TOH TAPU KATOA TONGA bible

KO SIOPE 6

¹PEA tali ‘e Siope, ‘o pehē,

²Taumaiā ke fua totonu ‘eku ‘itangofua, ‘Io, ke ‘ai fakataha ia mo ‘eku mamahi ‘i he fuatautau!

³‘E toki hā ai ‘ene mamafa ‘i he ‘one‘one ‘o e tahi: Ko hono ō ia na‘e puna noa ai ‘eku lea.

⁴He ‘oku ‘iate au ‘a e ngaahi ngahau ‘a Sātai, Pea ko hono kona ‘oku ne fakamaha hoku laumālie: Pea ‘oku fakatē mai ‘a e ngaahi ngeia ‘o ‘Elohā.

⁵‘Oku tangi hoha‘a koā ‘a e ‘asi vao ‘oku ne ma‘u ha mohuku mata? Pe ‘oku tangi ‘aulotu ha pulu ‘oku ma‘u me‘akai lelei?

⁶‘E kai ‘a e me‘a ta‘eifo, ‘o ‘ikai ‘ai ha māsima? Pea na‘a ‘oku fō ha hu‘a teve?

⁷Ko e ngaahi me‘a ‘oku fehi‘a ‘eku mo‘ui ke lave ai — Ko e koto fakalielia ko ia ke u me‘akai ‘aki tokua![11]

⁸Taumaiā ke ‘omi ‘eku kole; ‘Io, ke tuku mai ‘e ‘Elohā ‘eku faka‘amu!

⁹‘Io, ke finangalo ‘a ‘Elohā ke laiki au; Ke tuku ‘ene fakama‘uma‘u, kae ala mai, ‘o tu‘usi!

¹⁰Pehē ‘e ai ha‘aku ki‘i fiemālie; Seuke, neongo ‘oku ‘ikai ke faka‘ange‘ange ‘a e mamahi, Ka te u me‘e hopohopo pē: Koe‘uhi kuo ‘ikai te u fakatale‘i ‘a e folofola ‘a e Tāpuhā.

¹¹‘Oku fēfē fua hoku ivi ke u kītaki atu ai? Mo e hā fua ha me‘a te u iku ki ai ka u fakama‘uma‘u?

¹²He ko hoku ivi ko e ivi ‘o e maka? He ko hoku kakano ko e ukamea?

¹³Hono ‘ikai kuo u ta‘eha ivi toetoe, Pea kuo fakateka ‘a e poupou meiate au?

¹⁴Ka vaivai[12] ha taha, ko e tavi ‘o hono kaume‘a ke fai ha ‘ofa ki ai; Na‘a ‘iloange te ne tuku ‘ene ‘apasia kia Sātai.

¹⁵Ko hoku kāinga ni kuo fai fiemu‘a hangē ha tele‘a, Hangē ko e vai ‘o e ngaahi tele‘a, ‘a ia ‘oku mole.

¹⁶Si‘ene vai ‘uli‘uli ‘i he ‘aisi, Ko e sinou ‘oku fufū ai:

¹⁷Pea ka hoko hono taimi ke tafe ‘oku nau kamata mingi: Ka māfana leva kuo nau mei ‘osi mei honau feitu‘u.

¹⁸‘Oku afe ‘a e ngaahi kalavana ki ai; ‘Oku nau ‘alu ki he fonua mamate ‘o ‘auha ai.

¹⁹Na‘e sio ki ai ‘a e ngaahi kalavana ‘o Teima, Na‘e kītaki ‘a e ngaahi fononga ‘o Sipa koe‘uhi ko ia.

²⁰Ko e koto laea kinautolu, he na‘a nau ‘amanaki; Na‘a nau ‘alu atu ‘o a‘u, pea nau puputu‘u.

²¹He ko eni, kuo mou hoko[13] kimoutolu ko e noa;[14] Ko ho‘omou sio leva ki he koto havehave ni, pea mou ilifia.

²²He na‘a ke pehē, ‘Omi ha‘aku me‘a? Pē, Fai ha fakalelei ma‘aku mei ho‘omou koloa?

²³Pē, Mou fakahaofi au mei he nima ‘o e fili? Pē, Huhu‘i au mei he fa‘iteliha ‘a e kau nima mālohi?

²⁴Ako‘i au, pea te u fakalongo pē: ‘Io, fakamahino mai pe kuo u hē ‘i he hā.

²⁵Hono ‘ikai ‘asi ‘a e ngaahi lea ‘oku taunga tonu! Ka ko ho‘omou faka‘ilo ‘oku tau ki he hā?

²⁶Na‘a ko ho‘omou pehē ke faka‘ilo lea? Ka ko e lea ‘a e loto mate ‘oku ma‘a e matangi pē.

²⁷‘Ā! te mou talotalo ke ma‘u ‘a e tamai mate; Pea te mou fakatau homou kaume‘a.

²⁸Pea ko eni, mou hanga mai mu‘a kiate au; Pea hā ki homou mata pe ‘oku ou loi.

²⁹Toe fai mu‘a. ‘Oua ‘e longo mo e loto. ‘Io, toe fai: ‘e tonu ai pē ‘eku me‘a.

³⁰He ‘oku ‘ikai ke fakaifoifo tonu koā ‘a hoku ‘elelo? Pea na‘a ‘oku ‘ikai ke lava ‘e hoku ‘ao‘ingutu ke ‘ilo ‘a e me‘a ‘oku kovi?