Read KO E TOH TAPU KATOA TONGA KO SIOPE 7 Bible Online

KO SIOPE 7 - KO E TOH TAPU KATOA TONGA bible

KO SIOPE 7

¹LAU ‘e au ‘oku ai ha fatongia tau ki si‘i tangata ‘i māmani; Pea ko hono taimi ‘oku hangē ko e taimi ‘o e ngāue nō.

²Hangē ko e holi ‘a e tamaio‘eiki ke a‘u ‘a e ‘ata, Mo e mo‘usioa ‘a e unga ngāue ki he‘ene totongi,

³Pehē kuo vahe kiate au ‘a e ngaahi māhina faka‘amanakinoa, Pea kuo tufa kiate au ‘a e ngaahi pō fakaongosia.

⁴Ka u ka tokoto, pea u pehē, ‘Afē mai ā te u toe tu‘u! Ka ‘oku ne falō atu ‘a e pō; Pea ‘oku ou fiu he fetafokifoki‘aki, ‘O a‘u ki he ma‘a ‘a e ‘aho.

⁵‘Oku tofu hoku kakano ‘I he ‘uanga mo e lefetona kelekele; ‘Oku hakita hoku kili, ‘o toe pā.

⁶‘Oku fepunakaki noa ange hoku ngaahi ‘aho ‘I he fa‘onga filo ‘a e tangata lalanga,[15] Pea nau mole ta‘eha ‘amanaki‘anga.

⁷Manatu mu‘a ko ‘eku mo‘ui ko e matangi pē! ‘E ‘ikai toe sio hoku mata ki he lelei.

⁸Ko e mata ‘oku sio kiate au, ‘e ‘ikai toe mamata mai: Te ke fofonga mai Koe, ka kuo u ‘ikai.

⁹Hangē ko e ‘osi ‘a e ‘ao, ‘o mole, Pehē ko e hifo ki Hētesi ‘e ‘ikai toe hake mai.

¹⁰‘E ‘ikai te ne toe foki ki hono ‘api, Pea ‘e ‘ikai toe ‘ilo ia ‘e he potu na‘a ne kau ki ai.

¹¹‘Āua! pea koe‘uma‘ā ‘eku ta‘ofi hoku ngutu; Te u lea ‘i he mamahi ‘a hoku laumālie: Te u tangilāulau ‘i he kona ‘o ‘eku mo‘ui.

¹²He ko e tahi au, pe ko e tanini,[16] ‘A ē ā ‘oku ke fokotu‘u ai ha le‘o kiate au?

¹³Ka u ka pehē, ‘E fakafiemālie‘i au ‘e hoku tokoto‘anga, Ko hoku mohenga te ne tokoni kiate au ke fua ‘eku mamahi;

¹⁴Tā ‘oku ke fakailifia‘i au ‘aki ‘a e ngaahi misi, Pea ke ‘omi vīsone ke u līfusia ai:

¹⁵Ko ia ‘oku lelei ki he‘eku mo‘ui ke no‘o u‘a; ‘Oku lelei ‘a e mate ‘i he‘ete ‘ūhui ni mu‘a.

¹⁶‘Oku ou fakalili‘a ki ai; ‘Oku ‘ikai te u fie mo‘ui ma‘u ai pē: Tuku ai pē au; he ko e muna pē hoku ngaahi ‘aho.

¹⁷Ko e hā fua ‘a e me‘a vaivai ni ko e tangata ‘Oku ke lau ai ia ko e me‘a lahi? Pea ‘oku ke ‘ai ia ki ho loto ke tokanga ki ai,

¹⁸Pea ‘oku ke ‘a‘ahi kiate ia ‘i he ngaahi pongipongi, Pea ‘oku ke sivi ia ‘i he mōmeniti kotoa pē?

¹⁹Ko futu mo e ‘ikai te ke tafoki meiate au, Pe ki‘i tuku au ke u folo hoku ifo!

²⁰Kuo u angahala koā — Ko e hā fua te u lava ke fai ki he ‘Afiona? Si‘i Lama ‘o e tangata, Ko e hā kuo ke ‘ai ai au ko ho pākia‘anga, Pea u hoko ai ko e kavenga ki he ‘Afiona?

²¹Pea ko e hā ‘oku ‘ikai te ke fakamolemole ai ‘eku angahala, ‘O ‘ave ‘eku kovi? He ko eni te u tokoto ‘i he efu; Pea te ke mātu‘aki kumi au, Ka kuo u ‘ikai.