Read KO E TOH TAPU KATOA TONGA KO SIOPE 8 Bible Online

KO SIOPE 8 - KO E TOH TAPU KATOA TONGA bible

KO SIOPE 8

¹TOKI tali ‘a Pilitati ko e matāpule Sua‘a, ‘o ne pehē,

²‘E tuku ‘afē ho‘o lau pehē? Mo e hangē ha matangi hako ho‘o lea?

³He ‘e piko‘i ‘e ‘Ela ‘a e fakamaau? Pe mio‘i ‘e Sātai ‘a e totonu?

⁴Kapau kuo hia kiate ia ho‘o fānau, Pea kuo ne tuku kinautolu ki he nunu‘a ‘o ‘enau faikovi:

⁵Ko e me‘a kiate koe, ka ne ke mātu‘aki kumi kia ‘Ela, ‘O fai ho‘o kole kia Sātai;

⁶Kapau te ke ma‘a mo angatonu; Kuo pau te ne ‘ā ma‘au, ‘O fakafoki ho‘o nofo mā‘oni‘oni ko ē.

⁷‘Io, ko ho kamata‘anga ko e me‘a si‘i, Kae hulu fau ho ngata‘anga.

⁸He fehu‘i mu‘a ki he to‘utangata ‘e taha, Pea tokanga ki he ngaahi me‘a na‘e hakule ‘e he ngaahi kui ‘anautolu;

⁹(He ko e ha‘a ‘aneafi pē ‘a kitautolu, ‘O ‘ikai te tau ‘ilo ha me‘a; Koe‘uhi ko ‘etau mo‘ui ‘i māmani ko e ‘ata pē)

¹⁰‘O ‘ikai koā ako koe ‘e kinautolu na, ‘o tala, ‘O ‘a‘au ‘a e ngaahi me‘a kuo nau ongo‘i?

¹¹‘E tupu ‘a e pepailo ta‘eha kele? ‘E tupu ‘a e kutu, ‘oka ‘ikai ha vai?

¹²Lolotonga ‘ene kei mata, pea te‘eki tu‘usi, Ko ia pē ‘i he ‘akau kotoa pē ‘oku velehia vave.

¹³‘Oku pehē ‘a e ‘alunga ‘a ha‘a fakangalo ‘Otua; Mo e ‘auha ‘a e ‘amanaki ‘a e ta‘elotu:

¹⁴He ko hono pou ‘e fasi, Pea ko hono falala‘anga ko e fale ‘o hina.[17]

¹⁵‘Oku ne faaki ki hono fale ko ia, ka ‘oku ‘ikai tu‘u: ‘Oku ne puke ki ai, ka ‘oku ‘ikai ke ma‘u.

¹⁶Si‘ene huhu‘a ‘i he mata ‘o e la‘ā, Pea ‘osi ‘a e ngoue‘anga ‘i he mafola hono pikilau.

¹⁷Si‘ene a‘u ki ha tuva maka, ‘o takai ‘aki hono akaaka, Si‘ene sio hifo kuo falemaka‘ia.[18]

¹⁸Ka ‘iloange ‘e faka‘auha ia mei hono potu, Pea ‘e fakafisi leva ki ai, “‘Ā, kuo te‘eki ke u sio kiate koe.”

¹⁹Ko e mālie ē ‘o ē ‘alunga ko ē, Pea mei he efu ‘e tupu ha ni‘ihi kehe.

²⁰Tala atu, ‘oku ‘ikai ke li‘aki ‘e ‘Ela ‘a e angatonu, Pea ‘oku ‘ikai te na fepoupouaki mo e angahala.

²¹‘Oua ke ne fakafonu ho ngutu ‘i he mavava, Mo ho loungutu ‘i he tuē.

²²‘E fakakofu takaea ‘a e kakai ‘oku fehi‘a kiate koe; Pea ko e tēniti ‘o e angahala ‘e iku ki he ‘ikai.