Read KO E TOH TAPU KATOA TONGA KO SIOPE 9 Bible Online

KO SIOPE 9 - KO E TOH TAPU KATOA TONGA bible

KO SIOPE 9

¹PEA tali ‘a Siope, ‘o ne pehē,

²Seuke, ‘oku ou ‘ilo ‘oku pehē; Kae tonuhia fēfē ha tangata me‘a vaivai ‘i he fai mo ‘Ela?

³Kapau ‘oku ne loto ke fai mo e ‘Afio, ‘E ‘ikai te ne matali ha taha ‘i he afe‘i fehu‘i.[19]

⁴‘A e Finangalo poto na, mo Ivi kaukaua, Ko hai kuo ne faka‘uketau kiate ia ‘o tu‘umālie?

⁵‘A e ‘Afio ‘oku ne hiki mo‘unga ta‘e te nau ‘ilo ki ai, ‘Ene fulihi kinautolu ‘i he‘ene houhau.

⁶‘A e ‘Afio ‘oku ne lulu ‘a māmani, ‘o ue‘i mei hono feitu‘u, Pea fengatāliaki ai hono ngaahi pou.

⁷‘A e ‘Afio ‘oku ne fai ‘ene fekau ki he la‘ā, Pea tuku ai ‘ene hopo; ‘Oku ne sila‘i ‘a e ngaahi fetu‘u, ‘o tāpuni.

⁸‘Ene folahi toko taha pē ‘a e ngaahi langi, Mo hā‘elea ‘a e ngaahi mā‘olunga ‘o e tahi ‘ea.[20]

⁹‘A e ‘Afio na‘a ne ngaohi ‘a e Pea, ‘a ‘Olioni, pea mo Mataliki, Mo e ngaahi pupunga[21] ‘o e feitu‘u tonga.

¹⁰‘A e ‘Afio ‘oku ne fai me‘a lalahi mo ta‘emahakulea; Moni me‘a fakaofo mo ta‘efa‘alaua.

¹¹Vakai, ‘oku ne hala tutu‘u mai, Ka ‘oku ‘ikai te u sio ki ai; ‘Oku ne moulu ‘i hoku tafa‘aki, Ka ‘oku ‘ikai te u ma‘iloa.

¹²Vakai, ‘oku ne ala ke fa‘ao: ko hai te ne ta‘ofi mai? Ko hai te ne malea ki He‘ene ‘Afio, “Ko e hā tū ia ‘oku ke fai?”

¹³Ko ‘Elohā, ka ‘ikai ta‘ofi ‘e ia hono houhau; Na‘a mo e kau tokoni ‘a Lēhapi[22] ‘oku mapelu ko e ‘ikai matu‘uaki.

¹⁴Pea fēfē ai ha‘aku fakatau folofola ki ai ‘e au, ‘O fili lea ke fai ki He‘ene ‘Afio?

¹⁵He neongo ‘eku tonuhia, tala‘ehai te u lava ke fakamatala; Ko e me‘a pē ke u hū tōtōaki kiate ia kuo ma hopo mo au.

¹⁶Ka ne u tangi kiate ia, ‘o ne tali au; ‘E ‘ikai te u tui te ne ongo‘i ‘eku lea.

¹⁷He ‘oku ne laiki au ‘aki ha afā, Mo fakalahi lavea tu‘unga‘a.

¹⁸‘Oku ‘ikai te ne tuku ke u mānava hake, Ka kuo ne fakafonu me‘a kona au.

¹⁹“Kapau ko e fe‘auhi mālohi, KO AU eni! Kapau ko e fe‘auhi tonuhia, ko hai te ne faka‘ilo AU?”[23]

²⁰Kapau te u pehē, ‘Oku ou tonuhia, ‘E fakahalaia au ‘e hoku ngutu ‘o‘oku: Kapau te u pehē, ko e haohaoa kita, Te ne tala ko e mamio au.

²¹Kuo u haohaoa — hei‘ilo ki hoku laumālie. ‘Oku ou fehi‘a ki he‘eku mo‘ui —

²²‘Oku tatau ai pē — ko ia te u lea. Ko e haohaoa mo e angahala ‘oku Ne faka‘auha tatau pē!

²³Ka tā atu fakafokifā pē ‘e he mala, ‘Oku Ne kata ‘i he ‘au[24] ‘a e ta‘ehalaia.

²⁴Ko e fonua ē kuo ne tuku ki he nima ‘o e angahala: Ko e mata ‘o hono kau pule ‘oku Ne fakapūlou. Kapau ‘oku ‘ikai ko Ia, Pea tū ko hai nai?

²⁵Ko hoku ngaahi ‘aho foki ‘oku vave ange ‘i ha talafekau lele: ‘Oku nau puna atu te‘eki ke nau ‘ilo ha lelei.

²⁶‘Oku nau sīfā atu hangē ni vaka pepailo: Hangē ko e lofa ‘a e ‘īkale ki he‘ene kai.

²⁷Kapau te u pehē, Te u tata‘o ‘eku lāunga, Te u tuku ‘eku mapelu, ‘o u hanga hake:

²⁸‘Oku ou teki ki he‘eku ‘ū mamahi, ‘Oku ou ‘ilo ‘e ‘ikai te ke lau au ‘oku ou ‘atā.

²⁹Kuo pau ke fakahalaia au: Koe‘uma‘ā ai ‘eku fakaongosia noa?

³⁰Ka ne u kaukau vai sinou, ‘O fanofano ‘aki ‘a e sota;

³¹Ka te ke fakauku au ki he tokanga pela, Pea na‘a mo hoku ‘ū kofu ‘e fakalili‘a kiate au.

³²He tala‘ehai ko e tangata ia hangē ko au Ke u fai ki ai ha tali, ‘O ma ō fakataha ki he fakamāu‘anga.

³³Tala‘ehai[25] ‘oku ‘i ai ha taha ke tu‘u ‘i homa vaha‘a; Ha taha te ne puke kimaua ‘osi pē,

³⁴‘O ta‘ofi ‘Ene tā meiate au, Ke ‘oua na‘a ku tāfu‘ua ‘i hono ngeia:

³⁵Te u toki lea, ‘o ‘ikai te u manavahē kiate ia; He tala‘ehai ‘oku ou sio pehē kiate au.