Read KO E TOH TAPU KATOA TONGA KO E SAAME 10 Bible Online

KO E SAAME 10 - KO E TOH TAPU KATOA TONGA bible

KO E SAAME 10

¹KO E hā ‘oku ke fakamama‘o ai, ‘Eiki? Ko e hā ‘oku ke hanga kehe ai ‘i he taimi ‘efi‘efi?

²‘I he fielahi ‘a e angakovi kuo mohongia ‘a si‘i ngaohia; Kuo nau mo‘ua ‘i he ngaahi fakakaukau kuo puleaki‘i ‘e he fa‘ahinga na.[9]

³He ko e holi ‘o hono loto, ko e pōlepole‘anga ia ‘o e angakovi; Pea kuo ne fakamālō kiate ia ‘oku ma‘u me‘a ‘i he fakamālohi: ‘Oku ne mā‘imoa ‘aki ‘a e ‘Eiki.

⁴Ko e angakovi — ko ‘ene matahiki ‘oku lea, “‘E ‘ikai te ne ‘eke ‘a e me‘a: ‘Oku ‘ikai ha ‘Otua” — Ko e lau ia ‘a ‘ene ngaahi fakakaukau kotoa.

⁵‘Oku mālohi ai pē ‘ene ngaahi laka; ‘Oku mā‘olunga ho‘o ngaahi fakamaau, ‘o mama‘o mei hono mata: Ko e me‘a ki hono ngaahi fili ‘oku ne ifi‘i kinautolu kotoa.

⁶‘Oku ne pehē ‘i hono loto, “E ‘ikai maue‘i kita: ‘E ‘ikai te u tō ki ha kovi ‘i ha to‘utangata mo ha to‘utangata.”

⁷‘Oku fonu hono ngutu ‘i he tuki, mo e kākā, mo e fakaehaua; Ko e fakamamahi mo e pau‘u ‘oku ‘i hono lalo ‘elelo na.

⁸‘Oku ne nofo ‘i he ngaahi toitoi‘anga ‘o e ngaahi vilisi; ‘Oku ne tāmate‘i ‘a e ta‘ehalaia ‘i he ngaahi potu ‘oku puli; Ko hono mata ‘oku lamalama fufū ki he vaivai.

⁹Hangē ha laione ‘i hono vao pehē ‘ene toitoi ‘i hono toitoi‘anga; ‘Oku ne toi pē ke pō ‘a e ta‘eli‘ekina: ‘Oku ne ma‘u ‘a e ta‘eli‘ekina he ha‘o ‘aki hono kupenga.

¹⁰Ko ia, kuo laiki ia pea hinga, Pea ‘oku tō ‘a si‘i kau vaivai ‘i he ngaahi fu‘u mahafu ‘a‘ana.

¹¹‘Oku ne pehē ‘i hono loto, “Kuo ngalo ‘i he ‘Otua: Kuo ne hanga kehe; ‘e ‘ikai te ne sio ki ai ‘o ta‘engata.”

¹²‘Eiki, tu‘u hake; ‘e ‘Otua, ofa ho nima: ‘Oua na‘a ngalo ‘a e ngaohikovia!

¹³Ko e pehē koā ke mā‘imoa ‘aki ‘e he angakovi ‘a e ‘Otua! Ke ne pehē ‘i hono loto, “E ‘ikai te ke ‘eke ia!”

¹⁴Kuo ke sio ki ai; he ‘oku vakai‘i ‘e he ‘Afiona ‘a e ongosia mo e hoha‘a; Koe‘uhi ke ala ki ai ho nima; ‘Oku tuku ‘e he vaivai ‘enau me‘a kiate koe, He ko koe ai pē ‘a e tokoni ‘o e tamai mate.

¹⁵Laiki ‘e koe ‘a e nima ‘o e faihala: Pea ko e me‘a ki he tangata kovi, ‘eke ‘ene fai hala, Kae‘oua ke ‘ikai kei ‘ilo ha me‘a.

¹⁶‘Oku Tu‘i ‘a Sihova ‘o lauikuonga pea ta‘engata: Kuo ‘auha ‘a e hīteni mei hono fonua.

¹⁷Ko e holi ‘a e ngaohikovia kuo ke ongo‘i, ‘e Sihova, ‘Oku ke poupou honau loto; ‘oku ke fakatokanga‘i ho fofonga;

¹⁸Ka ke fai fakamaau ma‘a e tamai mate mo si‘i havehave, Kae‘oua na‘a toe fakailifia mai ‘e ha me‘a vaivai ‘a ia ko e kelekele pē.