Read KO E TOH TAPU KATOA TONGA KO E SAAME 101 Bible Online

KO E SAAME 101 - KO E TOH TAPU KATOA TONGA bible

KO E SAAME 101

¹(Ko e Saame ‘a Tēvita) TE U hiva ‘aki ‘a e fai ‘ofa mo e fakakonisitūtone: Te u tā ha‘ape, ‘e Sihova, kiate koe.

²Te u fai fakapotopoto, ‘o fou ha hala tonusika: — ‘Afē te ke hoko mai kia kita? — Te u taka ho loto fale mo e loto haohaoa.

³‘E ‘ikai te u tuku ke fe‘ao mo au ha me‘a fakalielia: Ko e fai ‘a e fa‘a afe ‘oku ou fehi‘a ki ai; ‘e ‘ikai piki ia kia kita.

⁴Te ne hiki meiate au, ‘o kapau ko ha taha loto mamio;[127] Ko e tangata kovi[128] ‘e ‘ikai te u momo‘i ‘ilo.

⁵Ko ia ‘oku lau‘ikovi fufū hono kaungā‘api, te u faka‘auha pē: Ko e mata hihiki mo e loto fielahi, ‘e ‘ikai te u kātaki ha taha pehē.

⁶‘Oku hanga hoku mata ki he kau fai mo‘oni ‘o e fonua ke fe‘ao mo kita: Ko ia ‘oku fou ha hala tonusika, Ko ia ia te ne hoko ko hoku minisitā.

⁷‘E ‘ikai lotofale‘ia mo au ha taha ‘oku fai kākā: Ko ha lea loi ‘e ‘ikai ma‘u ‘ene fe‘ao mo kita.

⁸Ko e pongipongi kotoa pē te u faka‘auha ‘a e kau angahala ‘o e fonua; Ke u tu‘usi ‘a e kau fai kovi fua pē mei he kolo ‘a Sihova.