Read KO E TOH TAPU KATOA TONGA KO E SAAME 102 Bible Online

KO E SAAME 102 - KO E TOH TAPU KATOA TONGA bible

KO E SAAME 102

¹(Ko e Lotu ‘a si‘i ngaohikovia ‘i he‘ene vaivai maha, ‘o lilingi ‘i he ‘ao ‘o Sihova ‘ene mamahi) FANONGO ki he‘eku lotu, ‘e Sihova, Pea ke a‘u ki ho ‘ao ‘eku kalanga.

²‘Oua te ke hanga kehe ‘oka ai ha mamahi ‘iate au: Ofe‘i mai ho fofonga, ‘oka u ka tautapa atu; Ke vave ho‘o tali au.

³He ko hoku ngaahi ‘aho ko e koto kohu pē, Pea ‘oku ‘afu vela hoku ngaahi hui ‘o hangē ha va‘a fefie.

⁴Kuo taa‘i hoku loto hangē ha musie, pea ‘oku mae: Seuke, na‘a mo e fai ‘eku kai ‘oku ngalo pē.

⁵Ko e me‘a ‘i he he‘aki ‘eku tauto‘e ‘Oku piki hoku hui ki hoku kanomate.

⁶‘Oku ou tatau mo ha pelikani he toafa; Kuo u hoko ko e lulu tofu pē ‘i he ngaahi potu lala.

⁷‘Oku ou le‘o tu‘u, ‘o ‘ā pē: ‘Io, ‘oku ou hangē ko ha fuleheu toko tefua ha tu‘a fale.

⁸Ko e ‘aho kotoa mo e fai ‘e hoku ngaahi fili ‘enau manukia: Ko kinautolu ‘oku vale he ‘ita mai, Ka kole mala, ‘oku nau tauange ke hangē ko kita.

⁹He Kuo u me‘akai ‘aki ‘a e efuefu, Pea kuo hu‘i lo‘imata hoku inu.

¹⁰Koe‘uhi ko ho houhau mo ho tuputāmaki; He kuo ke to‘o hake au, ‘o li‘aki.

¹¹Ko hoku ngaahi ‘aho ‘oku hangē ha ‘ata ‘oku pale; Pea Kuo u mae hangē ha musie.

¹²Ka ko koe, ‘e Sihova, ‘oku ‘afio ‘o ta‘engata; Pea ko ho‘o fotu ‘oku laui to‘utangata.

¹³Te ke tu‘u hake ‘e koe: Te ke faka‘atu‘i ‘a Saione; He ko e kuonga eni ke fai ‘ofa, ‘Io, kuo hokosia hono taimi kotofa;

¹⁴He ko ho‘o kau tamaio‘eiki ‘oku lata ki hono ngaahi maka; Pea ‘oku nau ‘ofa ki he efu ‘o‘ona.

¹⁵Pea ‘e ‘apasia ‘a e ngaahi kakai ki he huafa ‘o Sihova, Mo e ngaahi tu‘i ‘o māmani ki ho kolōlia:

¹⁶Koe‘uhi ko e langa ‘a Saione ‘e Sihova, Mo ‘ene hā mai ‘i hono kolōlia.

¹⁷Na‘a ne hāngai fofonga ki he lotu ‘a e telefua ‘atā, Pea na‘e ‘ikai te ne fakasīkaka‘i ‘enau lotu ko ia.

¹⁸‘E tohi ia ma‘a ha to‘utangata kaha‘u: Pea ‘e fakamālō‘ia ‘a IAA ‘e he fa‘ahinga ka toki fakatupu.

¹⁹He kuo hanga hifo ‘a Sihova mei hono mā‘olunga tāpuhā: Kuo ne fakasio mei langi ki he fonua.

²⁰Ke fakaongo ki he to‘e ‘a si‘i pōpula; Ke vete ange ‘a e kakai kuo tuku ke ‘auha;

²¹Ke ‘a‘au ‘i Saione ‘a e huafa ‘o Sihova, Pea mo hono fakamālō‘ia ‘i Selusalema.

²²‘Oka tānaki fakataha ‘a e ngaahi fa‘ahinga Mo e ngaahi pule‘anga ke tauhi ‘a Sihova.

²³Kuo ne fakavaivai‘i he fononga hoku ivi; Kuo ne kosi hoku taimi.

²⁴Pea u pehē, “E ‘Otua, ‘oua ‘e ‘ave au ‘i he vaeua hoku taimi: Ko ho ngaahi ta‘u ‘o‘ou ‘e a‘u ki he ngaahi to‘utangata ta‘ehili.”

²⁵‘I he kamata‘anga na‘a ke tanupou ‘a māmani; Pea ko e ngāue ‘a ho nima ‘a e ngaahi langi.

²⁶Ko kinautolu ‘e ‘auha, Kae tu‘u ai pē ‘a e ‘Afiona: ‘Io, te nau faka‘au kotoa ke motu‘a hangē ko e kofu; Pea te ke fetongi ia hangē ha pulupulu: ‘Io, ‘e fetongi pē kinautolu.

²⁷Ka ka pehepehē ai pē ‘a e ‘Afiona, Pea ko ho ngaahi ta‘u ‘e ‘ikai ngata.

²⁸Ko e fānau ‘a ho‘o kau tamaio‘eiki ‘e tolonga, Pea ko honau hako ‘e ma‘u ‘enau fe‘ao mo e ‘Afiona.