Read KO E TOH TAPU KATOA TONGA KO E SAAME 105 Bible Online

KO E SAAME 105 - KO E TOH TAPU KATOA TONGA bible

KO E SAAME 105

¹(1 Kal 16.8-22) FAKAFETA‘I kia Sihova, kailavaki hono huafa; Faka‘ilo ‘ene ngaahi ngāue ki he ngaahi fa‘ahinga.

²Hiva ki he‘ene ‘Afio, tā ha‘ape ki he‘ene ‘Afio, Fakalaulauloto ki he‘ene ngaahi ngāue fakaofo.

³Pōlepole ‘i hono huafa tāpuhā: Ke fiefia ‘a e loto ‘o ha‘a kumi kia Sihova.

⁴Huhū kia Sihova mo hono fu‘u ngū; Kumi ki hono fōtunga, ‘o ‘oua ‘e tuku.

⁵Manatu ki he ngaahi me‘a fakaofo kuo ne fai; ‘A ‘ene ngaahi faka‘ilonga, mo e ngaahi fakamaau kuo ne pu‘aki;

⁶‘E kimoutolu ko e hako ‘o ‘Epalahame ko ‘ene tamaio‘eiki, ‘A e fānau ‘a Sēkope na‘a ne fili.

⁷Ko ia ia ‘a hotau ‘Otua, ‘a Sihova: Ko ‘ene ngaahi fakamaau ‘oku ‘i māmani kotoa.

⁸Kuo ne manatu ai pē ki he‘ene fuakava, ‘A e folofola na‘a ne fakapapau ki he afe‘i to‘utangata;

⁹‘a e kovinānite na‘a na fai mo ‘Epalahame, Mo e me‘a na‘a ne fuakava kia ‘Aisake.

¹⁰Pea ne fakapapau kia Sēkope ko e tu‘utu‘uni; Ko e fuakava ta‘engata ma‘a ‘Isileli:

¹¹He‘ene pehē, “Te u ‘atu mo‘ou ‘a Kēnani na, Ko e laine ia homou tofi‘a:”

¹²‘Osi ko e falukunga kakai; Ko e toko si‘i pea muli ki ai.

¹³Pea nau fe‘alu‘aki mei he fa‘ahinga ki he fa‘ahinga, Mei he pule‘anga ko ē ki he kakai ‘e taha.

¹⁴Na‘e ‘ikai te ne tuku ke fai ‘e ha tangata honau fakaehaua; ‘Io, na‘a ne valoki ‘ani tu‘i koe‘uhi ko kinautolu na.

¹⁵“Oua ‘e ala ki he‘eku kau pani, Pea ‘oua ‘e fai ha kovi ki he‘eku kau palōfita ni.”

¹⁶Pea ne ui mai ha honge ki he fonua, ‘O ne maumau kotoa honau falala‘anga mā.

¹⁷Na‘a ne fekau mu‘omu‘a atu ha taha, Na‘e fakatau ‘a Siosifa ke pōpula.

¹⁸Na‘a nau fakamamahi ‘aki ha seini hono va‘e; Na‘e fekuki ‘ene mo‘ui mo e ‘aione.

¹⁹Ko e fai atu ki he taimi na‘e hoko ai ‘ene lea; Na‘e sivi ia ‘e he folofola ‘a Sihova.

²⁰Fekau atu ‘e he tu‘i, ‘o vete ia: ‘Io, na‘e faka‘atā ‘e he pule ‘o e ngaahi fa‘ahinga.

²¹Na‘a ne ngaohi ia ko e ‘eiki ‘o hono fale, Mo e pule ‘o ‘ene koloa kotoa pē:

²²Ke ne ha‘i hou‘eiki he‘ene fa‘iteliha, Pea ke ne fakapoto ‘ene kau mātu‘a.

²³Na‘e ha‘u foki ki ‘Isipite ‘a ‘Isileli; Pea ‘āunofo ‘a Sēkope ‘i he fonua ‘o Hami.

²⁴Na‘a ne fakanga‘uto‘uta[135] hono kakai, ‘O ne ‘ai ke nau kaukaua ange ‘i honau ngaahi fili.

²⁵Na‘a ne ofe‘i honau loto ke fehi‘a ki hono kakai; Pea ke fai kākā ka ki he‘ene kau tamaio‘eiki.

²⁶Na‘a ne fekau ‘a Mōsese ko ‘ene tamaio‘eiki; ‘A ‘Ēlone kuo ne fili.

²⁷Na‘a ne tuku ‘ene ngaahi folofola faka‘ilonga ‘i honau ‘ao; ‘Io, na‘a na fai he fonua ‘o Hami ha ngaahi me‘a fakaofo.

²⁸Na‘a ne fekau atu ‘a e po‘uli, pea po‘uli tu‘u; ‘Io, na‘e ‘ikai te na paetaku‘i ‘ene ngaahi fekau.[136]

²⁹Na‘a ne liliu ke toto honau ngaahi vai, ‘O ne ‘ai ‘enau fanga ika ke mate ai.

³⁰Na‘e nga‘uta ‘i honau fonua ‘a e fanga poto; Ko e fale mohe ‘o honau ngaahi tu‘i na‘a nau fakapito.

³¹Na‘a ne folofola pē pea ha‘u ‘a e mongomonga; Ai mo e namu ‘i honau tafafonua kotoa.

³²Na‘a ne ‘ange ‘uha maka ma‘anau ‘uha, Mo ha afi tapa ki honau fonua.

³³Ko honau vaine foki mo e fiki na‘a ne te‘ia, ‘O ne laiki ‘a e ‘akau ‘i honau tafafonua.

³⁴Na‘a ne folofola, pea ha‘u ‘a e he‘e Pea ta‘efa‘alaua mo e ‘unufe.[137]

³⁵Pea ko e mohuku honau fonua na‘a nau kai kotoa pē. ‘O nau faka‘osi ‘a e fua ‘o e kelekele.

³⁶Pea ne taa‘i ‘a e kau ‘olopo‘ou ‘o honau fonua; ‘A e fuatapu ‘o honau ivi kotoa.

³⁷Na‘a ne fakahū mai kinautolu kuo nau siliva-mo-koula‘ia, Pea na‘e ‘ikai ha taha ‘i honau ngaahi matakali ‘e fakave‘eve‘etuia.

³⁸Na‘e fiefia ‘a ‘Isipite ‘i he‘enau ‘alu; He kuo tō honau ngeia kiate kinautolu.

³⁹Na‘a ne folahi mōnau fale ha ‘ao, Mo e afi ke fakamaama ‘i he pō.

⁴⁰Na‘a nau[138] kole, pea ne ‘omi ‘a e kueili, Pea ne fakamākona ‘aki ‘a e mā ‘o e langi.

⁴¹Na‘a ne avangi ‘a e maka, pea ko e vai na‘e puna mai: Na‘e tafe ‘i he ngaahi potu mōmoa ko e vai lahi.

⁴²He na‘a ne manatu ki he‘ene folofola mā‘oni‘oni, Mo ‘Epalahame ko ‘ene tamaio‘eiki.

⁴³‘O ne fakahū mai hono kakai mo e mavava; ‘A ‘ene pele mo e hiva fiefia.

⁴⁴Pea ne ‘ange kiate kinautolu ‘a e kelekele ‘o e ngaahi pule‘anga; Pea nau ma‘u ‘a e ngaahi me‘a kuo ‘osi ai ‘a e kakava ‘o e ngaahi fa‘ahinga.

⁴⁵Koe‘uhi ā ke nau tauhi ‘ene ngaahi fono, Mo tokanga‘i ‘ene ngaahi lao, Halelu‘ia.