Read KO E TOH TAPU KATOA TONGA KO E SAAME 107 Bible Online

KO E SAAME 107 - KO E TOH TAPU KATOA TONGA bible

KO E SAAME 107

¹Ko Hono Fakahīkihiki‘i ‘o e ‘Ofa ‘a e ‘Otuá FAKAFETA‘i kia Sihova; he ‘oku lelei ia; He ‘oku tolonga ‘o ta‘engata ‘ene ‘alo‘ofa.

²Ke pehē ‘a e lau ‘a e kakai kuo huhu‘i ‘e he ‘Eiki, ‘A kinautolu kuo ne huhu‘i mei he nima ‘o e fili:

³Pea kuo ne tānaki mei he ngaahi fonua, Mei Hahake mo Hihifo, mei he Tokelau mo e Tonga.[140]

⁴Na‘a nau hē noa he Toafa ha hala vao; Na‘e ‘ikai te nau ‘ilo ha kolo ‘e fai ai ha nofo.

⁵Si‘i fiekaia mo fie inua foki, Na‘e vaivai maha ‘enau mo‘ui.

⁶Pea ‘i he‘enau mamahi na‘a nau tautapa kia Sihova, Pea ne hamusi kinautolu mei he‘enau ‘ū faingata‘a‘ia.

⁷Pea ne tataki ‘i ha hala tonusika, Ke nau a‘u ki ha kolo nofo‘anga.

⁸‘Ē, ke nau fakafeta‘i kia Sihova koe‘uhi ko ‘ene ‘alo‘ofa; Mo ‘ene ngaahi ngāue fakaofo ma‘a e hako‘i tangata.

⁹He ‘oku ne fakamākona ‘a e laumālie holi, Pea ko e loto ‘oku fiekaia ‘oku ne fakapito ‘i he lelei.

¹⁰Si‘i nofo he po‘uli, mo e ‘ata ‘o Mate, ‘O ha‘isia he mamahi mo e ‘aione —

¹¹He ko e folofola ‘a ‘Ela na‘a nau paetaku‘i, Pea ko honau fale‘i ‘e ‘Elioni na‘a nau fakasīkaka‘i:

¹²Ko ia na‘a ne fakavaivai‘i honau loto ‘aki ‘a e ngāue fakaongosia; Na‘a nau humu, pea ‘ikai ha taha ke tokonia.

¹³Pea ‘i he‘enau mamahi na‘a nau tangi kia Sihova, Pea ne fakahaofi mei honau ‘ū faingata‘a‘ia.

¹⁴Na‘a ne fakahū mai mei he po‘uli, mo e ‘ata ‘o Mate, Pea ko honau ha‘i na‘a ne motuhi pē.

¹⁵‘Ē, ke nau fakafeta‘i kia Sihova koe‘uhi ko ‘ene ‘alo‘ofa, Mo ‘ene ngaahi ngāue fakaofo ma‘a e hako‘i tangata!

¹⁶He ko e ngaahi matapā palasa kuo ne laiki, Pea ko e ngaahi fakama‘u ‘aione kuo ne tu‘usi.

¹⁷Si‘i kau vale koe, ‘i honau ‘alunga pau‘u, mo e ngaahi faikovi, ‘Oku nau fakatō kiate kinautolu ha mahaki:

¹⁸‘Oku fehi‘a ki he me‘akai honau laumālie; ‘Oku nau fakaofiofi ki he ngaahi matanikolo ‘o Mate.

¹⁹Pea nau toki tangi ‘i he‘enau mamahi kia Sihova, Pea ‘oku ne fakahaofi mei honau ‘ū faingata‘a‘ia.

²⁰‘Oku ne fekau atu ‘ene folofola, ‘o fai honau faito‘o, ‘O ne hamusi mei honau ngaahi luo.

²¹‘Ē, ke nau fakafeta‘i kia Sihova koe‘uhi ko ‘ene ‘alo‘ofa, Mo ‘ene ngaahi ngāue fakaofo ma‘a e hako‘i tangata!

²²‘Io, ke nau feia ‘a e ngaahi feilaulau fakafeta‘i, Pea tala mo e mavava ‘ene ngaahi fai.

²³Si‘i kakai ‘oku ‘alu ki tahi ‘i he ngaahi vaka, Mo fai ngāue ‘i he vaha loa:

²⁴Ko kinautolu ia ‘oku sio ki he mafai ‘a e ‘Eiki, Mo ‘ene ngāue fakaofo ‘i Ngātai.

²⁵He ‘oku ne folofola, pea falala mai ha matangi lahi fau, ‘A ia ‘oku ne langa‘i hono ngaahi peau:

²⁶‘Oku nau hake ki langi, ‘oku nau hifo ki he loloto ē: Kuo pehē ‘a e kovi kuo vai honau laumālie.

²⁷‘Oku nau mamio, pea nau tāsipa hangē ha taha ‘oku konā, Pea kuo fōngia honau poto kotoa.

²⁸Pea ‘i he‘enau mamahi ‘oku nau tautapa kia Sihova, Pea ne fakahao mai kinautolu mei honau ‘ū faingata‘a‘ia.

²⁹‘Oku ne ngaohi ‘a e havili ke angiiki pē, Pea malona ai ‘a e ngaahi peau ko ē.

³⁰Pea nau fiefia he‘enau nonga, Pea ne taki kinautolu ki honau taulanga manakoa.

³¹‘Ē, ke nau fakafeta‘i kia Sihova koe‘uhi ko ‘ene ‘alo‘ofa, Mo ‘ene ngaahi ngāue fakaofo ma‘a e hako‘i tangata!

³²Pea ke nau fakahīkihiki‘i ia ‘i he fakataha ‘a e kakai, Pea ‘i he ‘alofi ‘a e kau mātu‘a ke nau fakamālō ki ai.

³³‘Oku ne liliu ‘a e potu vaitafe‘ia ko e fonua mōmoa, Ko e feitu‘u matavaia ko e potu ‘auinua:

³⁴‘Oku ne liliu ‘a e fonua mahu ko e ano mahimahi: Koe‘uhi ko e kovi ‘a e kakai ‘oku nofo ai.

³⁵‘Oku ne liliu ‘a e fonua mōmoa ko e tokanga vai, Mo e fonua mamate ko e ‘ū fauniteni:

³⁶Pea ne tuku ke nofo ai ‘a e fiekaia, Pea nau langa ha kolo nofo‘anga:

³⁷Pea nau ngoue‘i ‘a e vao, ‘o tō vaine, Pea nau ma‘u ‘a e fua ‘o ‘enau ngāue.

³⁸Pea ‘oku ne tāpuaki‘i kinautolu, ‘o nau tupu lahi: ‘O ‘ikai te ne tuku ‘enau monumanu ke toko si‘i.

³⁹‘Iloange kuo nau toko si‘i mo lusa, Ko e me‘a ‘i he fakamālohi, mo e kai me‘a kovi, mo e mamahi‘ia.

⁴⁰Ko ‘ene ‘Afio ‘oku ne hua‘i kia hou‘eiki ‘a e manukia, ‘O tuku ke nau hē he maonganoa ta‘eha hala:

⁴¹Ka ‘oku ne hiki ki ‘olunga si‘i masiva mei he kovi ‘oku ne ‘i ai; ‘O ne ‘ai ke nau fakafāmili hangē ni tākanga sipi.

⁴²‘Oku sio ki ai ‘a e angatonu, ‘o nau fiefia: Ka ‘oku kū ngutu ‘a e kovi kotoa.

⁴³‘Ilonga ha poto te ne tokanga‘i ‘a e ngaahi me‘a ni, Pea ‘e ‘uhinga kiate kinautolu ‘a e ‘alo‘ofa ‘a e ‘Eiki.