Read KO E TOH TAPU KATOA TONGA KO E SAAME 124 Bible Online

KO E SAAME 124 - KO E TOH TAPU KATOA TONGA bible

KO E SAAME 124

¹(Ko e Hiva ‘o e ngaahi ‘Alu-hake. Ko e me‘a ‘a Tēvita.) KA NE ta‘e‘oua ‘a e kau mai ‘a e ‘Eiki — Ke pehē mu‘a ‘a e lea ‘a ‘Isileli —

²Ka ne ta‘e‘oua ‘a e kau mai ‘a e ‘Eiki ‘I he ‘ohofi mai ‘a e kakai:

³Pehē na‘a nau folo mo‘ui kitautolu, ‘I he kakaha mai ‘enau houhau;

⁴Pehē ne lōmekina kitautolu ‘e he ngaahi vai; Ne laka ‘a e vaitafe ‘i he‘etau mo‘ui:

⁵Pehē ne laka ‘i he‘etau mo‘ui ‘a e vaifā fielahi.

⁶Mālō mo Sihova ‘a e ‘ikai te ne tuku Ke tau hangē ha ha‘alu ‘i he nifo ‘onautolu.

⁷Kuo hao hotau laumālie hangē ha manupuna mei he hele ‘a e tulimanu: Kuo maumau ‘a e hele kae hao kitautolu.

⁸Ko hotau tokoni ‘oku ‘i he huafa ‘o Sihova, ‘A ia ne ne ngaohi ‘a e langi mo e fonua.