Read KO E TOH TAPU KATOA TONGA KO E SAAME 137 Bible Online

KO E SAAME 137 - KO E TOH TAPU KATOA TONGA bible

KO E SAAME 137

¹NA‘A mau nofo ‘i he ngaahi ve‘e vai ‘o Pāpilone, ‘Io, pea mau tangi foki ‘i he‘emau manatu ki Saione.

²Na‘a mau tautau ‘emau ngaahi ha‘ape ‘I he ngaahi uilou na‘e tu‘u loto pē.

³He ‘i he potu ko ia Ko kinautolu na‘e fai homau taki pōpula Na‘a nau tala ke mau fai ha hiva; Pea ko kinautolu na‘e fai homau vete Na‘e tala ke mau faiva, ‘o nau pehē, “Fai mai ha taha ‘o e ngaahi hiva ‘o Saione!”

⁴‘O mau hiva fēfē ha hiva ‘o Sihova ‘i he fonua ‘o ha kehe?

⁵Kapau ‘e ngalo koe, ‘e Selusalema, ‘Ofa ke ngalo ‘i hoku to‘omata‘u ni ke ala.

⁶Ke piki ki hoku ‘ao‘ingutu ‘a hoku ‘elelo ē, ‘O kapau ‘e ‘ikai te u manatua koe; ‘O kapau ‘e ‘ikai te u tuku ki mu‘a ‘a Selusalema ‘I hoku fungani fiefia.

⁷Manatu ke totongi ki ha‘a ‘Ītomi, ‘e Sihova, ‘A e me‘a na‘a nau fai ‘i he ‘aho ‘o Selusalema; ‘Enau pehē, Faka‘auha, faka‘auha, ‘O a‘u ki hono mātu‘aki tu‘unga.

⁸Ta‘ahine Pāpilone, ‘a ia ko ho vete kuo pau; Monū‘ia ā ka ko ia te ne fakaai atu ‘a e totongi na‘a ke ‘eke kiate kimautolu.

⁹Monū‘ia ā ka ko ia ‘oku ne to‘o ho‘o fanga ki‘i fānau, ‘O laiki ‘i he makatu‘u.