Read KO E TOH TAPU KATOA TONGA KO E SAAME 144 Bible Online

KO E SAAME 144 - KO E TOH TAPU KATOA TONGA bible

KO E SAAME 144

¹(Ko e me‘a ‘a Tēvita.) MĀLŌ mo Sihova, ko hoku Makatu‘u, ‘A ia ‘oku ne ako ki he fepaki ‘a e ‘ulu‘ulunima ‘o‘oku, Mo hoku louhi‘i nima ki he tau.

²Ko hoku Falengā-meesi, mo ‘eku Kolo ia; Ko hoku fu‘u Taua mo hoku Hao‘anga; Ko ‘eku Pā, mo ia ‘oku fai ki ai ‘eku hūfanga; ‘A e Taha ‘oku lomi hoto kakai ‘a kita.

³‘Eiki, ko hai ‘a e tangata ke ke ‘ilo‘i ai ia? Ha hako‘i vaivai ke ke lau ko ha me‘a?

⁴Ko e me‘a ki he tangata — ‘oku ne tatau mo e ‘ahu: Ko hono ngaahi ‘aho ‘oku tatau mo e ‘ata ‘oku mole atu.

⁵Ofe‘i ho langi na, pea ke ha‘anu hifo, Sihova ē: Ala ki he ngaahi mo‘unga ke nau kohu hake.

⁶Fakatapa ‘a e ‘uhila, ‘o veteki kinautolu; ‘Ai atu ho‘o ngaahi ngahau, ‘o nuiki kinautolu.

⁷Mafao hifo mei ‘olunga, ‘o fakahaofi; Pea hamusi au mei he ngaahi vai lahi, Mei he nima ‘o e hako‘i kehe ni;

⁸‘A ia ko honau ngutu kuo lea loi, Pea ko honau nima to‘omata‘u ko e nima ta‘emo‘oni.

⁹‘Elohimi ē, te u hiva kiate koe ha hiva fo‘ou Te u tā kiate koe ‘i he helefilo tu‘o hongofulu.

¹⁰‘a e ‘Afiona ‘oku ne foaki ikuna ki he ngaahi tu‘i: ‘Oku ne fakahaofi ‘ene tamaio‘eiki ko Tēvita mei he heletā kovi

¹¹Fakahaofi au, ‘o hamusi mei he nima ‘o e hako‘i kehe ni, ‘A ia ko honau ngutu kuo lea loi, Pea ko honau to‘omata‘u ko e nima ta‘emo‘oni.

¹²“Ko si‘omau ngaahi foha ē kei talavou Ka ‘oku hangē ko e ngaahi ‘akau kuo fu‘u tupu; Ko si‘omau ngaahi ‘ōfefine ē Kuo hangē ko e ngaahi tuliki fale, Mateu hangē ko e Temipale.

¹³Ko homau ngaahi feleoko ‘oku fonu ē, ‘O fakahū mai ‘a e me‘akai kotoa pē; Ko ‘emau fanga sipi kuo tupu ke afe mo mano ‘I homau ngaahi ‘api vao.

¹⁴Ko homau hou‘eiki ‘oku ma‘uma‘uluta[172] ‘Oku ‘ikai ha kā ‘ā, pe ha fakapuke ki tu‘a, Pea ‘oku ‘ikai ha fākaulu ‘i homau ngaahi hala.

¹⁵Monū‘ia ā ka ko e kakai ‘oku pehē hono anga: Monū‘ia ā ka ko e kakai ‘oku ‘Otua ‘aki ‘a Sihova!”