Read KO E TOH TAPU KATOA TONGA KO E SAAME 18 Bible Online

KO E SAAME 18 - KO E TOH TAPU KATOA TONGA bible

KO E SAAME 18

¹‘OKU OU hau‘alofa‘ia ki he ‘Afiona, ‘A hoku mālohinga ko Sihova.

²Ko hoku mo‘unga ‘a Sihova, mo ‘eku kolo, mo hoku hao‘anga; Ko hoku ‘Otua ko hoku makatu‘u ia, ‘a ia ‘oku fai ki ai ‘eku hūfanga: Ko ‘eku pā, mo hoku nifo fakamo‘ui: ko hoku fu‘u taua.

³Ko e Fakamālō‘ia ‘oku fai ki ai ‘a ‘eku tautapa, ‘a e ‘Eiki: Ko ia ai, ‘oku fakahaofi au mei hoku ngaahi fili.

⁴Na‘e ha‘o au ‘e he ngaahi kafa ‘a Mate; Ko e ngaahi vaifā ‘o e pau‘u na‘e fakatupu ‘eku manavahē.

⁵Na‘e takai au ‘e he ngaahi kafa ‘a Hētesi: Ko e ngaahi tauhele ‘a Mate na‘e fakafetaulaki mai.

⁶‘I he fa‘aki mai ‘a e faingata‘a na‘a ku tautapa kia Sihova, ‘Io, na‘a ku kavekalanga ki hoku ‘Otua — Na‘a ne ongona hoku le‘o mei hono temipale na: ‘Io, na‘e a‘u ki hono ‘ao ‘eku kalanga — Na‘e tau ki hono fofonga.

⁷Ngaue ai leva mo ngalulu ‘a e fonua, Pea ngatōtō ‘a e ngaahi tefito‘i mo‘unga; ‘Io, nau ngaueue, he kuo ne ‘ita.

⁸Na‘e ‘alu hake ha kohu mei hono ihu, Pea keina atu ‘e ha afi mei hono ngutu: Na‘e tutu ‘aki hani maka ‘afu.

⁹Na‘a ne ofe‘i foki ‘a e langi, ‘o ne ha‘anu hifo, Pea na‘e ‘i hono lalo va‘e ‘a e ‘ao fatu.

¹⁰Pea ne heka selupimi,[19] ‘o ne puna mai: ‘Io, na‘a ne tatele ‘aki ‘a e kapakau ‘o e matangi.

¹¹Na‘a ne ngaohi ‘a e fakapo‘uli ko hono potu lilo, ko hono tēniti takatakai; Ko e fakapo‘uli ‘o e ‘ao vai, ko e ngaahi ‘ao matolu ‘o langi.

¹²Mei he maama na‘e mu‘omu‘a ‘iate ia Na‘e ‘asi mai ‘i hono ngaahi ‘ao matolu na ‘a e ‘uha maka mo e maka kuo vela.

¹³Na‘e mana foki ‘i he langi ‘a Sihova; Pea ‘ai atu ‘e ‘Elioni ‘ene lea: ‘Uhamaka ai mo e maka vela.[20]

¹⁴Pea ne ‘ai atu ‘ene ngaahi ngahau, ‘o veteki kinautolu; Mo e ngaahi ‘uhila lahi, ‘o nuiki kinautolu.

¹⁵Toki hā ai ‘a e ngaahi kilisi vai, Pea tatala ‘a e takele ‘o māmani, ‘I ho‘o fai ho‘o valoki, ‘e Sihova, ‘I he māfulu ‘a e mānava ‘o ho fofonga.

¹⁶Na‘a ne mafao hifo mei ‘olunga, ‘o puke mai: Pea ne toho au mei he ngaahi vai lahi.

¹⁷Na‘a ne fakahaofi au mei hoku fili fu‘u mamalu ‘Io, meiate kinautolu na‘e fehi‘a kiate au, He na‘a nau mālohi fau.

¹⁸Na‘a nau fakafetaulaki mai ‘i he taimi ‘o ‘eku ‘efitu‘ua; Ka na‘e ‘i ai ‘a Sihova mōku pāletu‘a.

¹⁹Pea na‘a ne fakahū mai au ki he potu ‘atā fau; Na‘a ne huhu‘i au, koe‘uhiā na‘a ne mamana kiate au.

²⁰Kuo fai ‘e Sihova kiate au ke hoa mo e totonu ‘o ‘eku fai anga; Kuo ne totongi kiate au ‘o taau mo e ma‘a ‘o hoku nima.

²¹He Kuo u tauhi ‘a e ngaahi ‘alunga ‘o Sihova, Pea kuo te‘eki te u hiki kovi mei hoku ‘Otua.

²²He ko ‘ene konisitūtone kotoa na‘e feangai mo au, Pea ko ‘ene ngaahi lao — ‘oku ‘ikai te u teke‘i atu.

²³Kuo ta‘emele foki ‘eku fakafe‘ao kiate ia, Pea Kuo u mata‘ofi au mei ha‘aku ni hia.

²⁴Ko ia kuo totongi mai ‘e Sihova ke hoa mo e totonu ‘o ‘eku fai anga Ke tuha mo e ma‘a ‘a hoku nima ‘i he‘ene vakai ‘a‘ana.

²⁵‘I he fai mo e kakai lelei te ke takataka failelei; ‘I he fai mo ha fita ta‘emele te ke takataka ta‘emele;

²⁶‘I he fai mo e ha‘a ta‘efioa te ke takataka ta‘efioa; Pea ka fai mo ha fa‘ahinga mamio te ke tau‘aki fangatua.

²⁷He ko koe ‘oku ke fakamo‘ui ha‘a ta‘ali‘ekina; Ka ko e matahihiki ‘oku fakatōkilalo‘i ‘e he ‘Afiona.

²⁸He ko koe ‘oku ke fakaulo ‘eku maama: ‘Oku huluhulu ‘eku po‘uli ‘e Sihova ko hoku ‘Otua.

²⁹Seuke te u ‘ohofia ha kongakau ‘i he ‘Afiona, Te u hopokia[21] ha puke ‘i he kau ‘a hoku ‘Otua.

³⁰Ko e me‘a ki he ‘Otua — ko hono ‘alunga ‘oku haohaoa: Ko e folofola ‘a e ‘Eiki kuo ‘osi-‘a-sivi ia; Ko e fakaū ia ki he kakai ‘oku hūfanga kiate ia.

³¹He ko hai ha ‘Otua, ‘oka tuku ‘a Sihova? Pea ko hai ha mo‘unga, ‘oka ne ta‘e‘oua hotau ‘Otua?

³²‘a e ‘Otua ‘oku ne ‘omi ivi mōku no‘o vala, ‘O ne ngaohi hoku ‘alunga ke haohaoa.

³³‘A ia ‘oku ne ngaohi hoku va‘e ke hangē ko e motu‘a tia: ‘O ne ‘ai ke u matu‘u ‘i hoku ngaahi potu mā‘olunga.

³⁴‘A ia ‘oku ne ako ki he tau ‘a hoku ‘ulu‘ulunima; Ko ia ai, ‘oku mateke ‘e hoku ongo nima ni ha kaufana ukamea.

³⁵Pea kuo ke ‘omi kiate au ho pā fakamo‘ui: Pea ko ho nima to‘omata‘u kuo ne poupou mai, Pea ko ho‘o fakaalaala Kuo u hoko ai ‘o fu‘u lahi.

³⁶Kuo ke fakalaulahi ‘a e potu ‘oku ou laka ai, Ko ia, kuo ‘ikai ke fengatāliaki ai ‘a hoku tunga‘i va‘e ni.

³⁷Na‘a ku tuli hoku ngaahi fili, ‘o u ma‘u foki: Pea na‘e ‘ikai te u liu mai kae‘oua ke nau ‘osi.

³⁸Na‘e pehē ‘eku taa‘i kinautolu, na‘e ‘ikai te nau lava ke tu‘u hake; Kuo nau tō ki hoku lalo va‘e.

³⁹He na‘a ke no‘o ‘aki au ‘a e mālohi ki he tau: Ko e kakai na‘e tu‘u mai kuo ke lolo ki lalo ‘iate au.

⁴⁰Ko hoku ngaahi fili foki na‘a ke ‘ai ke nau sītu‘a, Pea ko kinautolu na‘e fehi‘a kiate au na‘a ku faka‘auha.

⁴¹Na‘a nau tautapa ka na‘e ‘ikai ha tokoni; Na‘a nau fai kia Sihova, ka na‘e ‘ikai te ne tali.

⁴²Pea u toki momosi kinautolu ke ‘ave ‘e he matangi ‘o hangē ko e efu: Ke hangē ko e pela ‘o e hala ‘i he‘eku hakaluku.

⁴³Kuo ke fakahaofi au mei he ngaahi fakafekāke‘i ‘a e kakai; Kuo ke ngaohi au ko e ‘ulu ki he tukui pule‘anga muli: ‘Oku nofo kiate au ha kakai ‘oku ‘ikai te u ‘ilo‘i.

⁴⁴‘I he ongoongo atu au ki honau telinga na‘a nau tali leva ‘eku fekau: Ko e hako‘i kehe na‘a nau fakamalua kiate au.

⁴⁵Ko e hako‘i kehe na‘a nau vaivai maha, Na‘a nau ha‘u tetetete pē mei honau talitau‘anga.

⁴⁶‘Oku mo‘ui ‘a Sihova; Pea ‘oku fakamālō‘ia hoku mo‘unga; Pea ‘oku hākeaki‘i hoku ‘Otua fakamo‘ui‘anga.

⁴⁷‘a e ‘Otua ‘oku ne fai sauni ma‘aku, Mo ne fakamo‘ulaloa kakai kiate au.

⁴⁸‘A ia ‘oku ne fakamo‘ui au mei hoku ngaahi fili: ‘Io, ‘oku ke fakamā‘olunga au ‘i he kakai ‘oku tu‘u mai. Kuo ke hamusi au mei he tangata fakamālohi.

⁴⁹Ko ia ai, ‘e Sihova, Te u fakafeta‘i ki he ‘Afiona, ‘I he ‘ao ‘o e ngaahi pule‘anga: ‘Io te u hiva fakamālō ki ho huafa.

⁵⁰‘a e ‘Afiona ‘oku ne fakato‘omata‘u ‘a e fakamo‘ui ‘o ‘ene tu‘i; Pea ‘oku ne fai ‘ofa ki he‘ene pani, Kia Tēvita mo e hako ‘o‘ona, ‘E fai pē ‘o lauikuonga.