Read KO E TOH TAPU KATOA TONGA KO E SAAME 2 Bible Online

KO E SAAME 2 - KO E TOH TAPU KATOA TONGA bible

KO E SAAME 2

¹KO E hā kuo futefute ai ‘a e ngaahi kakai, Pea ‘oku fakakaukau mūnoa ‘a e ngaahi matakali?

²He tu‘u mai ‘a e ngaahi tu‘i ‘o māmani, Pea fakatahataha ‘a e hou‘eiki Ke puleaki‘i ‘a Sihova, Pea mo e pani ‘a‘ana:

³“Tau motuhi ‘a e ngaahi ha‘i ‘anaua, ‘O li‘aki meiate kitautolu ‘ena ngaahi kafa.”

⁴Kata pē ia ‘oku ‘afio ‘i langi, Manukia kinautolu ‘e ‘Ātonai.

⁵Toki folofola ia ki ai ‘i he‘ene ‘ita, Pea ‘i he‘ene houhau ‘oku ne ‘ai ke nau ilifia:

⁶“Ka Kuo u fakanofo ‘eku tu‘i ‘a‘aku, ‘I funga Saione ko ‘eku mo‘unga tapu.”

⁷Ka u ‘a‘au mu‘a ‘a e fekau; Ne folofola ‘a Sihova kiate au, “Ko hoku Foha koe, Ko e ‘aho ni Kuo u fakatupu koe.

⁸Kole mai pea u ‘atu mo‘o tofi‘a ‘a e ngaahi kakai, Mo e ngaahi ngata‘anga ‘o māmani mo‘o ‘inasi.

⁹Te ke laiki kinautolu ‘aki ‘a e sēpita ukamea Te ke have‘i kinautolu hangē ha ipu ‘umea.”

¹⁰Pea ko eni, ‘a e ngaahi tu‘i, mou poto mu‘a; Tali akonaki, ‘a e kau fakamaau ‘o e fonua.

¹¹Tauhi ‘a Sihova mo e manavahē, ‘O fiefia tetetete pē.

¹²‘Uma ki he ‘Alo na‘a ne ‘ita,[1] Pea mou ‘auha ‘i he hala: He ko e kemo kuo kohu hake ‘ene ‘ita. Ha monū‘ia ka ko e kakai kuo hūfanga kiate ia!