Read KO E TOH TAPU KATOA TONGA KO E SAAME 22 Bible Online

KO E SAAME 22 - KO E TOH TAPU KATOA TONGA bible

KO E SAAME 22

¹(Ki he Pule ‘o e Hiva. Ke fai‘aki ‘a e fasi ko e “Tia ‘o e Pongipongi.” Ko e Saame ‘a Tēvita.) ‘E HOKU ‘Otua, ‘e hoku ‘Otua, ko e hā kuo ke li‘aki ai au? ‘O fakamama‘o mei hoku tokoni; mei he le‘o ‘o ‘eku kavekalanga atu?

²‘E hoku ‘Otua, ‘oku ou tangi ‘aho, ka ‘oku ‘ikai ha‘o tali; Pea u fai po‘uli, ‘o ‘ikai te u tuku ha taimi.

³Ka ‘oku ke mā‘oni‘oni, ‘A e ‘Afiona ‘oku ke nofo‘ia ‘a e ngaahi fakamālō ‘a ‘Isileli,

⁴Na‘e falala ‘emau ngaahi tamai kiate koe: Na‘a nau falala, pea na‘a ke fakamo‘ui pē.

⁵Ko koe na‘e fai ki ai ‘enau kalanga, pea nau ‘atā: Ko koe na‘e fai ki ai ‘enau falala, pea na‘e ‘ikai te nau mā.

⁶Ka ko au ko e kelemutu ‘o ‘ikai ko e tangata; Ko e manuki‘anga ‘o e kakai, pea ta‘etoka‘i ‘e he fonua.

⁷‘Ilonga ha taha ‘oku sio mai ‘oku ne luma kiate au: ‘Oku nau fakatōtao honau ngutu, ‘oku nau kalokalo ‘a e ‘ulu.

⁸“Tekaki kia Sihova — Ke ne fakahaofi ia; Ke ne hamusi ia, he ko hono mamana.”

⁹Kae fēfē, he ko koe na‘a ke to‘o au mei he manava; ‘I he‘eku ‘i he huhu ‘o ‘eku fa‘ē na‘a ke ngaohi au ke u falala.

¹⁰Na‘e lī atu au mei he manava ko ho‘o kavenga pē: Ko hoku ‘Otua ai pē koe mei he fatu ‘o ‘eku fa‘ē.

¹¹‘Oua te ke mama‘o meiate au, he ko e faingata‘a ‘oku ofi; Pea ‘oku ‘ikai ha tokoni.

¹²Na‘e kāpui au ‘e he fanga pulu tokolahi; Na‘e ha‘o au ‘e he ha‘a kaukaua ‘o Pēsani.

¹³‘Oku nau fakamanga honau ngutu kiate au, Ko e laione tofu pē ‘oku kokohi mo kālou.

¹⁴Kuo u malingi hangē ha vai, Pea ‘oku ngatōtō hoku ngaahi hui: Kuo hangē ha uakisi hoku loto ia, Kuo vaia ‘i hoku loto to‘oto‘onga.

¹⁵Kuo maha hoku ivi[24] ‘o hangē ko ha konga ipu kelekele; Pea ‘oku piki hoku ‘elelo ki hoku kaungao ē; Pea te ke ‘ai au ki he efu ‘o e mate.

¹⁶He ‘oku kāpui au ‘e he fanga kulī: Kuo ha‘o au ‘e he fakataha ‘o e kau faikovi; Ko hoku nima mo hoku va‘e na‘a nau vili.[25]

¹⁷‘Oku ou malau hoku ngaahi hui kotoa; ‘Oku sio fakamama‘u ‘e kinautolu na, ‘Oku nau siofia kita.

¹⁸‘Oku nau tufa fakaekinautolu hoku ‘ū kofu, Pea ko hoku sote ‘oku nau talotalo ki hano ma‘u.

¹⁹Kae‘oua te ke mama‘o koe, ‘Eiki: ‘E hoku Mālohinga, vave mai ke tokoni.

²⁰Hāmusi mei he heletā ‘eku mo‘ui; Si‘eku me‘a pē taha mei he fa‘iteliha ‘a e kulī.

²¹Fakahaofi au mei he ngutu ‘o e laione, Pea mei he nifo ‘o e fanga pufaloe — Tā kuo ke tali pē![26]

²²Ko ia ai, te u ‘a‘au ho hingoa ki hoku kāinga: Te u fakamālō kiate koe ‘i he lotolotonga ‘o e fakataha.

²³“A e kau ‘apasia kia Sihova, mou fakamālō kiate ia: ‘A e hako fuli pē ‘o Sēkope, mou fakahīkihiki‘i ia; ‘Io, pea mou ‘apasia kiate ia, ‘a ha‘a ‘Isileli kotoa.

²⁴He na‘e ‘ikai te ne ta‘etoka‘i, pea na‘e ‘ikai te ne fakalili‘a He mamahi ‘a si‘i fakamālohi; Pea na‘e ‘ikai te ne hanga kehe meiate ia; Pea ‘i he‘ene tangi ange na‘a ne talia.”

²⁵Ko ‘eku fakamālō ‘i he fakataha lahi ‘oku mei he ‘Afiona: Te u fai ‘eku tukumo‘ui ‘i he ‘ao ‘o e kakai ‘oku lotu kiate ia.

²⁶‘E kai ‘e si‘i ta‘ali‘ekina, ‘o mākona: ‘E fakamālō kia Sihova ‘e ha‘a kumi kiate ia. Ke mo‘ui homou loto ‘o ta‘engata!

²⁷‘E manatu mo tafoki ki he ‘Eiki ‘a e ngaahi ngata‘anga ‘o māmani: Pea ‘e hū ‘i he ‘ao ‘o e ‘Afiona ‘a e matakali fuli pē ‘o e tukui pule‘anga.

²⁸He ko e pule ‘oku ‘ia Sihova; Pea ‘oku ne tāfataha ‘i he ngaahi pule‘anga.

²⁹‘E kai mo lotu ‘a e fa‘ahinga sino ‘o māmani:[27] Ko kinautolu kuo mei ‘alu hifo ki he efu te nau tū‘ulutui ki ai, Mo ia ‘oku ‘ikai lava ke ta‘ofi hono laumālie ke mo‘ui.

³⁰‘E ai ha hako te nau tauhi ki ai; Pea ‘e fakahā ki he to‘utangata ko ē ‘a e me‘a ‘oku kau kia ‘Ātonai.

³¹Te nau ha‘u ‘o fakahā ‘ene mā‘oni‘oni; Te nau tala ki ha kakai ka toki fanau‘i, “Kuo ne fai.”