Read KO E TOH TAPU KATOA TONGA KO E SAAME 28 Bible Online

KO E SAAME 28 - KO E TOH TAPU KATOA TONGA bible

KO E SAAME 28

¹(Ko e me‘a ‘a Tēvita.) ‘EIKI, ‘oku ou tautapa ki he ‘Afiona; ‘E hoku makatu‘u, ‘oua te ke fakaongonoa: Na‘a ‘iloange ‘i ho‘o fakalongo, Pea u hangē ko kinautolu ‘oku ‘alu hifo ki he luo.

²Ongo‘i ‘a e le‘o ‘o ‘eku tautapa, ‘oka u ka kaila atu, ‘O ka u ka hiki hoku nima ki ho loto tatau tapu.

³‘Oua ‘e toho au mo e kau angahala, Mo e fa‘ahinga fai me‘a pango; ‘A kinautolu ‘oku veveho ki honau kaungāme‘a, Ka ko e kovi ‘oku ‘i honau loto.

⁴‘Ange kiate kinautolu ke taau mo ‘enau ngāue na, Pea ke tatau mo e kovi ‘o ‘enau fai anga: ‘Ange kiate kinautolu ke taau mo e ngāue ‘a honau nima; Fakafoki kiate kinautolu honau tuha.

⁵Ko e me‘a ‘i he ‘ikai te nau tokanga‘i ‘a e ngaahi ngāue ‘a Sihova, Pe ko e fita‘a ‘a hono nima, Ko ia te ne holoki kinautolu ‘o ‘ikai langa.

⁶Mālō mo Sihova, He kuo ne fanongoa ‘a e le‘o ‘o ‘eku tautapa.

⁷Ko Sihova ‘a hoku mālohinga mo fakaū; Na‘e falala ki ai ‘a hoku loto, pea kuo tokonia au: Ko ia ‘oku me‘e hopohopo hoku loto; Pea te u fai‘aki ‘eku hiva ni hono fakamālō.

⁸Ko Sihova ko e mālohinga ‘o hono kakai, Ko e hūfanga fakamo‘ui ia ki he‘ene pani.

⁹Fakamo‘ui ho kakai, pea tāpuaki‘i ho tofi‘a: ‘Io, fafanga kinautolu, ‘o fua ke ta‘engata.