Read KO E TOH TAPU KATOA TONGA KO E SAAME 30 Bible Online

KO E SAAME 30 - KO E TOH TAPU KATOA TONGA bible

KO E SAAME 30

¹(Ko e Saame ‘a Tēvita; ko e hiva huufi fale.) TE U fakahīkihiki‘i koe, ‘Eiki; He kuo ke fusi hake au, Pea na‘e ‘ikai te ke tuku hoku ngaahi fili Ke luki ‘iate au.

²‘Eiki, ko hoku ‘Otua, ne u tautapa atu, Pea ne ke faito‘o au.

³‘Eiki, kuo ke fakahā‘ele hake hoku laumālie mei Hētesi; Meiate kinautolu ‘oku hifo ki he luo,[35] kuo ke ui mai ‘eku mo‘ui.

⁴Hiva saame kia Sihova, ‘a ‘ene kau lotu, Fakamālō‘ia hono ongoongo toputapu.

⁵He ko e kemo ‘a e fuoloa ‘o ‘ene tuputāmaki; Ka ko ‘ene ‘ofa ‘oku lau mo‘ui: ‘E ha‘u efiafi nai ‘a tangi ke tau mohe, Kae pongipongi leva — ko e mavava ē!

⁶Ka ko au — ‘i he‘eku tu‘umālie na‘a ku lea, ‘E ‘ikai ue‘i au ‘o ta‘engata.

⁷‘I ho‘o ‘ofa, ‘e Sihova, Na‘a ke ngaohi hoku mo‘unga ke kaukaua: Na‘a ke fufū ho fofonga; Na‘a ku puputu‘u leva.

⁸Ko koe, ‘Eiki, na‘a ku tautapa ki ai; Pea u fai ‘eku hū kia ‘Ātonai:

⁹“Ko e hā ha koloa ‘e ma‘u mei hoku toto? Mei ha‘aku ‘alu hifo ki he Luo? ‘E ‘atu ‘e he efu ha fakafeta‘i? Te ne fakahā koā ho‘o fai mo‘oni?”

¹⁰Fanongo, ‘Eiki, pea ke ‘ofa mai; ‘E Sihova, hoko koe ko hoku tokoni.

¹¹Kuo ke liliu ‘eku tangilāulau ko e me‘a ke u me‘e ai; Kuo ke vete hoku tauanga‘a, ‘o no‘o ‘aki ‘a e fiefia lahi:

¹²Koe‘uhi ā ke hiva ki he ‘Afiona ‘E hoku lāngilangi, ‘o ‘oua ‘e tūkua. ‘E Sihova ko hoku ‘Otua, Te u fakafeta‘i kia koe ‘o ta‘engata.