Read KO E TOH TAPU KATOA TONGA KO E SAAME 31 Bible Online

KO E SAAME 31 - KO E TOH TAPU KATOA TONGA bible

KO E SAAME 31

¹(Ki he Pule ‘o e Hiva. Ko e Saame ‘a Tēvita.) ‘EIKI, Kuo u hūfanga ki he ‘Afiona: ‘Oua te ke tuku au ke u mā ‘o ta‘engata: Ka ‘i ho‘o totonu ke ke fakahaofi kita.

²Fakaongo hifo ho fofonga; Vave mai ke hamusi kita: Ke ke hoko kiate au ko hoku fale toinga, Ko e koto fale tau ke fakahaofi kita.

³He ko hoku mo‘unga mo ‘eku holo ‘a e ‘Afiona; Pea te ke tauhi mo taki au koe‘uhi ko ho huafa.

⁴Hu‘ihu‘i au mei he kupenga na Kuo nau tu‘u fufū kia kita; He ko koe ko hoku hao‘anga.

⁵‘Oku ou tuku hoku laumālie ki ho nima: Kuo ke huhu‘i au, Sihova, ‘a e ‘Otua Mo‘onia.

⁶‘Oku ou fehi‘a kiate kinautolu ‘oku tauhi ‘a e ngaahi muna launoa: Ka ko au ‘oku ou falala kia Sihova.

⁷Ka u hākahaka mo fakafiefia ‘i ho‘o meesi; He kuo ke hanga ki he‘eku tu‘utāmaki; Kuo ke ‘ilo ‘a e ngaahi faingata‘a ‘o ‘eku mo‘ui:

⁸Pea kuo ‘ikai te ke loki au ki he nima ‘o e fili; Kuo ke fokotu‘u hoku va‘e ki ha potu fālahi.

⁹‘Ofa mai, ‘Eiki, he ‘oku ‘iate au ha faingata‘a: Kuo ‘osi‘osi hoku mata ‘i he hoha‘a; Pehē hoku loto mo hoku manava.

¹⁰Kuo ‘osi ‘eku mo‘ui ‘i he fakamamahi, Mo hoku ngaahi ta‘u ‘i he māpuhoi: Kuo ka‘anga hoku ivi, pea ‘osi‘osi hoku hui Koe‘uhi ko ‘eku kovi.[36]

¹¹Ko e me‘a ‘i hoku ‘ū fili Kuo u hoko ko e ‘ita‘anga, Pea ko e kavenga ki hoku kau nofo‘anga, Pea ki hoku kau fe‘iloaki ko e ilifia‘anga: Ka sio ha taha kiate au ‘i he hala, pea hola.

¹²Kuo ngalo au hangē ha pekia, mei he ‘atamai: Kuo u hangē ha ipu li‘aki.

¹³He ne u fanongo ki he muhumuhu ‘a e tokolahi — Ko e ilifia na‘e takatakai — ‘Enau puleaki‘i fakataha mai, Na‘a nau fakakaukau ke ‘ave ‘eku mo‘ui.

¹⁴Ka ko au Kuo u falala kiate koe, ‘e Sihova: Ne u pehē, Ko hoku ‘Otua ‘a e ‘Afiona.

¹⁵Ko hoku ngaahi taimi ‘oku ‘i ho nima: Hāmusi au mei he nima ‘o hoku ngaahi fili, mo hoku kau fakatanga.

¹⁶Ke fakaulo mai ho fofonga ki ho‘o tamaio‘eiki: Fakamo‘ui au ‘i ho‘o meesi.

¹⁷‘Eiki, ‘oua na‘a tuku au ke u mā; He Kuo u tautapa ki he ‘Afiona: Ko e kau angahala pē ‘e mā; Te nau fakalongo pē ‘i lolofonua.

¹⁸Ke noa ‘a e loungutu loi, ‘Oku lau‘i ta‘emālū‘ia ‘a e mā‘oni‘oni, He fielahi mo e ta‘etoka‘i.

¹⁹Hono ‘ikai lahi ho‘o koto lelei na, ‘A ia kuo ke fa‘o ma‘a e kau ‘apasia ki he ‘Afiona, Pea ‘oku ke fai ma‘anautolu ‘oku unga ki he ‘Afiona ‘I he ‘ao ‘o e hako‘i tangata!

²⁰‘Oku ke ‘ufi‘ufi kinautolu ‘i he toitoi‘anga ‘o ho fōtunga Mei he ngaahi fa‘ahi ‘a e kakai; ‘Oku ke fufū kinautolu ‘i ho malu Mei he ngaahi ‘elelo felau‘aki.

²¹Ke mālō‘ia mu‘a ‘a Sihova: ‘Ene fakato‘omata‘u ‘ene ‘ofa; Kuo u ‘i ha kolo pā.

²²Ka ko au — ne u lau ‘i he‘eku hoha‘a, Kuo tu‘usi au mei he vakai ‘a ho fofonga: Ka tā na‘a ke ongo‘i ‘a e le‘o ‘o ‘eku tautapa ‘I he‘eku tangi tokoni ki he ‘Afiona.

²³‘Ē, mou ‘ofa kia Sihova, ‘ene kau lotu na: ‘Oku lehilehi‘i ‘e Sihova ‘ene kau tōnunga. Ka ki he fielahi ‘oku ne totongi ‘aufua.

²⁴Mou lototo‘a, ‘o tu‘u kalikali, ‘A ha‘a tatali ki he ‘Eiki.