Read KO E TOH TAPU KATOA TONGA KO E SAAME 34 Bible Online

KO E SAAME 34 - KO E TOH TAPU KATOA TONGA bible

KO E SAAME 34

¹(Ko e me‘a ‘a Tēvita ‘i he‘ene liliu hono anga ‘i he ‘ao ‘o ‘Apimeleki ‘a ia na‘a ne kapusi ia, pea ne ‘alu.) KE U fakafeta‘i kia Sihova ‘i he taimi kotoa pē: Ko hono fakamālō ‘e ‘i hoku ngutu ma‘u pē.

²‘E pōlepole hoku laumālie ‘ia Sihova: ‘E fanongo ki ai ‘a e kau tu‘utāmaki, pea te nau fiefia.

³Mou kau mo au ke viki ‘a Sihova, Pea tau hākeaki‘i hono huafa fakataha.

⁴Na‘a ku ha‘ao ki he ‘Eiki, pea ne talia; Pea ne hamusi au mei he‘eku ‘ū ilifia.

⁵Na‘a nau hanga kiate ia, pea nau maama leva: Pea na‘e ‘ikai peko honau mata.

⁶Si‘i tu‘utāmaki ko ē na‘e tautapa, pea na‘e ongo‘i ‘e Sihova, Pea ne fakahaofi mei hono faingata‘a kotoa.

⁷‘Oku ‘apitanga ‘a e ‘āngelo ‘a Sihova takatakai ki he‘ene kau ‘apasia, Ke fai honau fakahaofia.

⁸Mou kamata ki he ‘Eiki, ‘o ‘ilo ‘oku sai: Monū‘ia ā ka ko e to‘a ‘oku hūfanga ki ai.

⁹Mou ‘apasia kia Sihova ‘a e kau lotu ‘a‘ana: He ‘oku ‘ikai ha masiva ‘a e kau ‘apasia kiate ia.

¹⁰‘Oku ‘alefa pē ‘a e fanga laione[39] talavou, mo nau fiekakai: Ka ko ha‘a kumi ki he ‘Eiki ‘e ‘ikai te nau masiva ha me‘a ‘e taha ‘oku lelei.

¹¹Ha‘u ā, fānau, ‘o fanongo mai: Ka u ako kiate kimoutolu ‘a e ‘apasia ki he ‘Eiki.

¹²Ko hai tū ha tangata ‘oku fie mo‘ui? ‘Oku manako ‘aho lahi ke ne sio ki ha lelei?

¹³Lama ho ‘elelo mei he kovi, Mo ho loungutu mei he lea loi.

¹⁴Afe mei he kovi, ‘o fai lelei; Kumi ki he melino, ‘o tuli ki ai.

¹⁵Ko e fofonga ‘o Sihova ‘oku lalama ki he kau mā‘oni‘oni, Pea ‘oku ne fakaongo ke ma‘u ‘enau tangi.

¹⁶Ko e fōtunga ‘o e ‘Eiki ‘oku fe‘ao mo e kau faikovi, Ke tu‘usi ‘a e manatu ki ai ‘a māmani.

¹⁷Na‘e tangi hake ‘a e fa‘ahinga ko ē, pea fanongo ‘e Sihova, ‘O ne hamusi mei honau faingata‘a kotoa.

¹⁸He ko e loto lavea ‘oku ofi ki ai ‘a e ‘Eiki, Pea ‘oku ne fakamo‘ui ‘a kinautolu ‘oku laumālie mafesi.

¹⁹Ko e angatonu ‘oku lahi ‘ene ngaahi mamahi: Ka ‘oku hamusi ia mei ai kotoa ‘e he ‘Eiki.

²⁰‘Oku ne tauhi hono ngaahi hui kotoa: ‘Oku ‘ikai fasi hanau taha.

²¹‘E tāmate‘i ‘a e angahala ‘e he kovi: Pea ko kinautolu ‘oku fehi‘a ki he kau angatonu ‘e taute‘i.

²²‘Oku huhu‘i ‘e he ‘Eiki ‘a e mo‘ui ‘a e kau tamaio‘eiki ‘a‘ana: Pea ‘ilonga ha falala kiate ia ‘e ‘ikai fakahalaia.