Read KO E TOH TAPU KATOA TONGA KO E SAAME 36 Bible Online

KO E SAAME 36 - KO E TOH TAPU KATOA TONGA bible

KO E SAAME 36

¹‘OKU ai ha sikaina ‘o maumau lao ‘Oku nofo ‘i he angahala, ‘i hono tefito‘i loto; ‘Oku ‘ikai ha manavahē ki he ‘Otua Ke fai ha ta‘ofi mei mu‘a.

²Koe‘uhi kuo ne ‘ai ke hā molemole ia ‘i he‘ene vakai, ‘I he mei ‘ilo ‘ene angahala ‘o ne fehi‘a ki ai.

³Ko e lau ‘a hono ngutu ko e kovi mo e kākā: Ko e fakapotopoto mo e fai lelei kuo tuku ia.

⁴Ko ha kovi pē ‘oku ne fakakaukau‘i ‘i hono mohenga; Ko e hala ‘oku ‘ikai lelei ‘oku ne hanga ‘o foua; ‘Oku ‘ikai te ne fakalili‘a ki he me‘a hala.

⁵‘E Sihova, ‘oku ‘asi ‘i he ngaahi langi ‘a ho‘o ‘alo‘ofa; ‘Oku a‘u ho‘o fai mo‘oni ki he ngaahi ‘ao na.

⁶‘Oku hangē ko e ngaahi mo‘unga-‘a-‘Otua ‘a ho‘o faitotonu; Ko ho‘o ngaahi fakamaau ko ha moana hauhau: ‘E ‘Eiki, kuo ke fakamo‘ui mai ‘a e tangata mo e manu.

⁷Hono ‘ikai mahu‘inga ho‘o ‘ofa, ‘e ‘Otua! Ko ia ko e fānau ‘a e kakai ‘oku hūfanga ki he malu ‘o ho kapakau na.

⁸‘Oku nau fu‘u mākona ‘i he ngako ‘o ho fale; Pea ‘oku ke fakainu kinautolu ki he vaitafe ‘o ho ngaahi mālie.

⁹He ko e matavai ‘o e mo‘ui ‘oku ‘i he ‘Afiona: ‘I ho‘o maama te mau sio maama.

¹⁰Ke holo ange mu‘a ho‘o ‘ofa ki ha‘a ‘ilo ki he ‘Afiona; Mo ho‘o faitotonu ki ha‘a loto totonua.

¹¹‘Oua na‘a tu‘u kiate au ‘a e va‘e ‘oku laukau, Pea ko e nima ‘o ha‘a faikovi, ke ‘oua te ne fakahee‘i au.

¹²Ko e hā kuo tō ai ‘a e kau ngāue hala: Kuo ha‘aki kinautolu, pea ‘oku ‘ikai te nau lava ke langa.