Read KO E TOH TAPU KATOA TONGA KO E SAAME 39 Bible Online

KO E SAAME 39 - KO E TOH TAPU KATOA TONGA bible

KO E SAAME 39

¹(Ki he Pule ‘o e Hiva. Ma‘a Situtuni. Ko e Saame ‘a Tēvita.) NA‘A ku pehē, Te u vakai hoku ngaahi ‘alunga, ‘o le‘o, Na‘a fai angahala ‘e hoku ‘elelo: Te u tauhi ‘aki ha fakaniupāpua hoku ngutu, Lolotonga ‘oku ‘i hoku ‘ao ‘a e kau pau‘u.

²Ne u longo ‘i he fakavaivai, Pea u ta‘ofi ‘eku lea neongo ne u kovi ai;[47] Pea ko hoku mamahi loto na‘e uhu ai.

³Na‘a ku ongo‘i hifo kuo māfana hoku loto; ‘I he‘eku fifili, ‘iloange ko e afi na‘e ulo: Toki lea ‘a hoku ‘elelo.

⁴‘Eiki, faka‘ilo kiate au hoku ngata‘anga, Mo e fua hoku taimi pe ko e hā; Ke u ‘ilo hono ‘ikai ko e ‘aunga kita.

⁵Tā ‘oku ke fua lau‘i nima pē hoku taimi; Pea ko ‘eku mo‘ui kotoa ko e fo‘i noa ‘i ho‘o vakai: ‘Ā, neongo ko e tangata ‘oku tu‘umālie taha, Tā ko e koto ‘ahu pē ‘ata‘atā.

⁶‘Ā, ‘oku ‘alu holo ‘a e tangata ko e fu‘u ‘ata pē: ‘Ā, ‘oku nau ta‘emanofo ke ma‘u ha kohu pē: Fai ai pē ‘ene fokotu‘utu‘u, Kae ‘ikai ‘ilo pe ko hai te ne faluku.

⁷Pea ko eni ‘e ‘Ātonai, ko ‘eku toe tatali ki he hā? Ko ‘eku tu‘a ‘oku ‘i he ‘Afiona.

⁸Hāmusi au mei he‘eku angahala fua pē: ‘Oua ‘e ngaohi au ko e luma‘anga ‘o e vale.

⁹Na‘a ku longomate pē ā; Na‘e ‘ikai te u mafa‘a hoku ngutu ke lea; He ko koe ne ke fai ‘a e me‘a.

¹⁰Le‘ei ho‘o tā meiate kita: Kuo u tei ‘osi ‘i he mamafa mai ho nima.

¹¹‘Oka ke ka akonaki ‘a e tangata, ‘Aki ‘a e ngaahi tautea ‘i he‘ene angahala, ‘Oku ke ngaohi hono faka‘ofo‘ofa ke luku hangē ha‘ane ‘i ha kofu: Tā ko e tangata fua pē ko e koto kohu. (Sila)

¹²Fanongo ki he‘eku lotu, ‘e Sihova, Pea fakaongo hifo ki he‘eku tautapa; ‘Oua te ke fakalongo ‘i ho‘o vakai hoku lo‘imata: He ko e muli au ‘oku nonofo mo e ‘Afiona, Ko e ‘āunofo hangē ko ‘eku ngaahi kui kotoa.

¹³Hanga kehe meiate au ke u fakamānava hake, Te‘eki te u laka ange ‘o mole.