Read KO E TOH TAPU KATOA TONGA KO E SAAME 44 Bible Online

KO E SAAME 44 - KO E TOH TAPU KATOA TONGA bible

KO E SAAME 44

¹(Ki he Pule ‘o e Hiva. Ko e me‘a ‘a Ha‘a Kola, Ko e Hiva-ako.) ‘E ‘OTUA, kuo ongo ki homau telinga, Kuo ‘a‘au mai ‘e homau tupu‘anga, ‘A e ngāue na‘a ke feia ‘i honau kuonga, ‘I he ngaahi taimi fuoloa.

²‘A e ‘Afiona, ko ho nima ‘ou na‘e hu‘ihu‘i ‘ani pule‘anga, Kae fakalanga mai ‘a e tō ‘a kinautolu na; Na‘a ke laiki ‘ani fa‘ahinga, ka ke ‘ai kinautolu ke mafola.

³He tala‘ehai ko ‘enau heletā na‘a nau ma‘u ai ‘a e fonua, Pe ko honau nima na‘a nau lava ai ke ikuna: Ka ko ho nima to‘omata‘u ia, mo ho mālohi, mo e maama ‘a ho fofonga, Koe‘uhi na‘e toka kiate kinautolu ho‘o ‘ofa.

⁴Ko koe ia hoku tu‘i, ‘e ‘Otua: Ke ke tu‘utu‘uni ma‘a Sēkope ha ngaahi ikuna.[51]

⁵Ko e ‘Afiona te mau tui‘i ai homau ngaahi fili: Ko ho huafa te mau malaki ai kinautolu ‘oku tu‘u mai.

⁶He tala‘ehai ‘oku ou falala ki he‘eku kaufana, Pea ‘e ‘ikai te u ikuna ko ‘eku heletā.

⁷Ka kuo ke ‘omi ke mau ikuna homau ngaahi fili, Pea kuo ke fakamaa‘i kinautolu ‘oku fehi‘a mai.

⁸Ko ‘Elohimi kuo mau pōlepole ai ‘i he ‘aho kotoa, Pea ko ho huafa te mau fakafeta‘i ki ai ‘o ta‘engata. (Sila)

⁹Ka kuo ke tekaki kimautolu, ‘o tuku ke mau mā; Pea ‘oku ‘ikai te ke hā‘ele mo homau ngaahi vāhenga.

¹⁰‘Oku ke fakasītu‘a‘i kimautolu ki he fili: Pea ‘oku vete noa kimautolu ‘e he fa‘ahinga ‘oku fehi‘a mai.

¹¹Kuo ke tuku ke mau hangē ko ha fanga sipi ‘oku me‘akai ‘aki; Pea kuo ke tufaki kimautolu ki he ngaahi kakai.

¹²‘Oku ke fakatau ho kakai ki ha momo‘i totongi, Pea tala‘ehai ‘oku ke mo‘umo‘ua ‘i he me‘a ‘oku ‘omi.[52]

¹³‘Oku ke tu‘utu‘uni kimautolu ko e mā‘anga ‘o e nofo fonua ni, Ko e luma — mo-va‘inga‘anga ‘o e fonua takatakai.

¹⁴‘Oku ke tuku kinautolu ko e taungalea‘anga ‘o e ngaahi pule‘anga, Ko e me‘a ke kalo ‘ulu ai ‘ani fa‘ahinga.

¹⁵‘Oku fe‘ao mo au ‘eku fo‘i ‘i he ‘aho kotoa, Pea ‘oku pulonga mai ‘a e mā hoku mata.

¹⁶Ko e ongo mai ‘a e lea ‘a e manuki mo e talakā, Ko e hanga mai ‘a e fili mo e lama.

¹⁷Ko e hoko mai ‘a e me‘a ni kotoa Ka tala‘ehai na‘a mau fakangalo‘i ‘a e ‘Afiona, Pe ne mau kākaa‘i ho‘o fuakava.

¹⁸Ko homau loto na‘e ‘ikai sītu‘a, Pea ko ‘emau laka na‘e ‘ikai afe mei ho ‘alunga;

¹⁹‘A ē ā kuo ke laiki kimautolu ‘i he potu ‘o e siakali, Pea ko e ‘ata ‘o e mate kuo ke ‘ufi‘ufi ‘aki.

²⁰Ka ne mau fakangalo‘i ‘a e huafa ‘o e ‘Otua ‘omautolu, Mo mafao homau nima ki ha ‘otua fo‘ou.

²¹‘Ikai ‘e hakule ia ‘e ‘Elohimi? He ‘oku ne ‘afio‘i ‘a e me‘a ‘oku tukuloto‘i.

²²He ko e me‘a ‘i he ‘Afiona ‘oku fai ‘i he ‘aho kotoa homau have‘i, ‘Oku lau kimautolu ko e fanga sipi pē ke tāmate‘i.

²³Ofo! Ko e hā ‘oku ke mohe ai, ‘e ‘Ātonai? Me‘a hake, ‘oua na‘a fai ‘o ta‘engata ho‘o li‘aki.

²⁴Ko e hā ‘oku hanga kehe ai ‘a e ‘Afiona? Ko e hā ‘oku mangalo ai homau ngaohikovi‘i mo fakamo‘ulaloa?

²⁵Pea ‘oku mapelu ki he efu homau laumālie: ‘Oku piki ki he kelekele homau kete.

²⁶Tu‘u koe mo homau tu‘otu‘a, Pea huhu‘i kimautolu koe‘uhi ko ho‘o ‘ofa.