Read KO E TOH TAPU KATOA TONGA KO E SAAME 49 Bible Online

KO E SAAME 49 - KO E TOH TAPU KATOA TONGA bible

KO E SAAME 49

¹(Ki he Pule ‘o e Hiva. Ko e me‘a ‘a ha‘a Kola. Ko e Saame.) FANONGO ki he me‘a ni, ‘a e ngaahi kakai; Fokotu‘u telinga mai, ‘a e nofo taimi:

²‘A ha‘a mā‘ulalo mo ha‘a mā‘olunga fakatou‘osi. ‘A e koloa‘ia mo e masiva foki.

³‘E ‘a‘au ‘e hoku ngutu ha koto poto; Pea ko e koto maama ‘a ‘eku fakalaulauloto.

⁴Te u tuku atu hoku telinga ke ma‘u ha paloveepi: Te u fakamatala ‘i he ha‘ape ‘eku misiteli.

⁵‘I he ngaahi ‘aho ‘o e kovi koe‘uma‘ā ‘eku manavahē, ‘Oka kāpui au ‘e he kākā ‘o hoku kau hakiva‘e?

⁶Ko e fa‘ahinga ‘oku falala ki he‘enau koloa, Mo pole ‘i he lahi ‘o ‘enau nga‘oto‘ota;

⁷Tala‘ehai ‘oku lava ‘e ha taha ke huhu‘i ha taha, Pe ke ‘ange kia ‘Elohimi hano tatala:

⁸(‘Io, ko e huhu‘i honau laumālie ‘oku fu‘u mamafa, Pea kuo pau ke tuku ai pē ‘o ta‘engata)

⁹Ko e pehē ke ne mo‘ui atu ‘o lauikuonga, ‘O ‘oua te ne sio ki fa‘itoka.

¹⁰He kuo pau ke ne sio He mate ‘a e kau poto, Te nau ‘auha fakataha mo e vale mo e anga fakamanu, ‘O li‘aki ‘enau koloa ke ma‘u ha ni‘ihi atu.

¹¹‘Oku nau tui loto ‘e tu‘u honau ngaahi fale ‘o ta‘engata,[59] ‘A honau ngaahi nofo‘anga ki he to‘utangata mo e to‘utangata; ‘Oku nau ui honau ngaahi ‘api ‘aki honau huafa.

¹²Ka na‘a mo e tangata lāngilangi‘ia ‘oku ‘ikai kakato hono fo‘i pō, Ka ‘oku na tatau mo e fanga manu ‘oku mate longo.[60]

¹³Ko hono ‘alunga ē ‘o e ha‘a falala kia kita, Neongo ‘e mālie‘ia ‘a e kakai ‘i he‘enau lea hili ‘enau pekia.[61] (Sila)

¹⁴Hangē ha fanga sipi ‘e fakahū ki Hētesi; Ko Mate honau tauhi: ‘E fakaehaua kinautolu ‘e he angatonu ‘i he hoko ‘a e pongipongi; Pea ko honau ‘īmisi ‘e tuku ke keina ‘e Hētesi, Kae‘oua ke ‘ikai toe ha me‘a ke ne fale ai.[62]

¹⁵Ka ko e ‘Otua te ne huhu‘i hoku laumālie ni mei he nima ‘o Hētesi: He te ne ‘ave au. (Sila)

¹⁶Ka faka‘a‘au ‘o koloa‘ia ha taha, ‘oua ‘e manavahē, ‘I he hulu ‘a e nāunau‘ia hono fale:

¹⁷He tala‘ehai te ne ‘ave ha me‘a ‘i he‘ene pekia; Tala‘ehai ‘e hifo mo ia ‘ene nāunau‘ia.

¹⁸Ka ko hono laumālie — neongo na‘a ne lau monū ki ai ‘i he‘ene mo‘ui Pea ‘i ho‘o fai lelei ma‘au kuo pau ho sani ‘e he kakai —

¹⁹Te ne ‘alu ki he to‘utangata ‘o hono tupu‘anga; ‘A ia ‘oku ‘ikai te nau sio ki he maama ‘o ta‘engata.

²⁰Ko e tangata ‘oku lāngilangi‘ia kae ‘ikai poto, ‘Oku hangē ko e fanga manu ‘oku mate longo.