Read KO E TOH TAPU KATOA TONGA KO E SAAME 50 Bible Online

KO E SAAME 50 - KO E TOH TAPU KATOA TONGA bible

KO E SAAME 50

¹KO ‘ELA ‘Elohimi Sihova kuo ne folofola, Pea kuo ne ui ‘a māmani mei he hopo‘anga la‘ā ‘o a‘u ki hono tō‘anga.

²Mei Saione, ko e fungani ‘i he faka‘ofo‘ofa, Kuo malama mai ‘a e ‘Otua.

³‘Oku hā‘ele mai hotau ‘Otua ē, Pea tala‘ehai te ne fakalongo pē: ‘Oku mu‘omu‘a ‘iate ia ha afi faka‘auha, Pea takatakai ki ai ha fu‘u afā.

⁴‘Oku ne ui mai ‘a e ngaahi langi mei ‘olunga, pea mo māmani, Ki he fakamaau ‘o hono kakai.

⁵“Mou fakataha mai, hoku ‘ofa‘anga, kiate au; Ha‘a fai kovinānite mo au ‘i he funga ‘o e feilaulau.”

⁶(‘Io, kuo toka tala ‘e he langi hono pau ke totonu; He ko ‘Elohimi ia ‘e fai ‘a e fakamaau.) (Sila)

⁷Fanongo mai ka u lea, ‘e hoku kakai; ‘Isileli ē, ka u fai ha talatalaaki: Ko ho ‘Otua au, ‘a ‘Elohimi.

⁸‘Oku ‘ikai ko ho‘omou ngaahi feilaulau ‘oku ou hopo ai mo koe; Seuke, ko ho‘o ngaahi feilaulau-mōifua ‘oku ‘i hoku ‘ao ma‘u pē.

⁹Tala‘ehai ‘oku ou fie to‘o ha pulu mei ho ‘api na, Pe ha ngaahi kosi tangata mei ho ngaahi loto‘ā.

¹⁰He ko e manu ‘o e vao ‘oku ‘a‘aku kotoa pē, ‘A e manu ‘oku kaikai ‘i he mo‘unga laui afe.

¹¹‘Oku ou ‘ilo ‘a e manupuna kotoa ‘o e ngaahi mo‘unga, Pea ‘oku ‘iate au ‘a e me‘a ‘oku ngāue ‘i he toafa.

¹²Ka ne u fiekaia ‘e ‘ikai te u tala atu: He ‘oku ‘a‘aku ‘a māmani mo hono mahu.

¹³He te u kai koā ‘a e kakano ‘oni pulu kāfakafa, Pe inu ‘a e toto ‘oni kosi tangata?

¹⁴Feilaulau kia ‘Elohimi ‘aki ‘a e fakafeta‘i;[63] Pea fakaai kia ‘Elioni ho‘o ngaahi tukumo‘ui:

¹⁵Pea ‘i he ‘aho faingata‘a tautapa kiate au; Te u hamusi koe, pea te ke fakalāngilangi‘i au.

¹⁶Ka ki he angahala ‘oku folofola mai ‘a ‘Elohimi, Ko e hā ‘au ‘oku ke lau fola ai ‘eku ngaahi tu‘utu‘uni, Pea ko ‘eku kovinānite ‘oku ke ngutu ‘aki?

¹⁷‘Osi, ‘oku ke fehi‘a koe ki he akonekina, Pea ko ‘eku ngaahi lea ‘oku ke sī ki ho tu‘a.

¹⁸Ko ho‘o sio leva ki ha kaiha‘a pea mo felātani, Pea ke me‘a taha mo e kau fe‘auaki.

¹⁹Kuo ke tukuange ho ngutu ke taka he kovi, Pea ko ho ‘elelo ‘oku ne fatu loi.

²⁰‘Oku ke nofo ni ‘o lau‘i ho tokoua ē, Pea ke ‘ai tūkia‘anga ki he tama ‘a ho‘o fa‘ē.

²¹Ko e ngaahi me‘a pehē na‘a ke fai, pea u fakalongo pē, Na‘a ke lau ‘oku ou tatau mātē mo koe: Ka u valoki koe mu‘a, ‘O ‘ai hokohoko ke ke mātā.

²²‘a e kau fakangalo‘i ‘Otua, fakakaukau mu‘a ki he me‘a ni, Na‘a ku hae kimoutolu, ‘o ‘ikai ha taha ‘e haofaki:

²³Ko ia ‘oku ne feilaulau ‘aki ‘a e fakafeta‘i, ‘Oku ne fai mo‘oni hoku fakalāngilangi‘i, Pea ‘oku ne tofa ‘a e hala ke u fakahā ki ai, ‘A e fakamo‘ui ‘a ‘Elohimi.