Read KO E TOH TAPU KATOA TONGA KO E SAAME 51 Bible Online

KO E SAAME 51 - KO E TOH TAPU KATOA TONGA bible

KO E SAAME 51

¹(Ki he Pule ‘o e Hiva. Ko e Saame ‘a Tēvita ‘i he ‘alu kiate ia ‘a e palōfita ko Nētane, hili ‘ene ‘alu kia Pātisepa.) KE KE meesi kiate au, ‘e ‘Otua, He ko ho tau ‘a e manava‘ofa. Ke ke tāmate‘i ‘eku ngaahi angahala Ke hoa mo e lahi ‘o ho‘o ‘alo‘ofa.

²Ke ke mātu‘aki fō au mei he‘eku hia, Pea ‘ai ke u ma‘a mei he‘eku angahala.

³He ‘oku ou ‘ilo‘i ‘eku talangata‘a, Pea ‘oku ma fe‘ao ma‘u pē mo ‘eku angahala.

⁴Ko koe — ko koe pē kuo u angahala ki ai: Pea Kuo u fai ‘a e me‘a ‘oku kovi ‘i ho‘o vakai: Koe‘uhi ke hā ho‘o tonuhia ‘oka ke ka lea, Pea ke ‘ata‘atā ‘oka ke ka fakamaau?.

⁵Vakai, na‘e fanau‘i au mo e hia; ‘Io, na‘e tu‘itu‘ia ‘eku fa‘ē ‘iate au ko e me‘a angahala.

⁶Vakai, ‘oku ke manako ki he fai mo‘oni ‘i he feitu‘u lotoloto; Pea ‘i he potu fufū te ke ngaohi au ke u ‘ilo ‘a e poto.

⁷Ke ke fakama‘a‘i ‘īsope au, pea te u ma‘a: Fō au, pea te u hinehina ange he sinou.

⁸Tuku ke u fanongo ki he fakafiefia mo e mavava, Kae me‘e ‘a e ngaahi hui kuo ke fakavolu.

⁹Hanga kehe mei he‘eku ngaahi angahala, Pea tāmate‘i ‘eku hia kotoa.

¹⁰Fakatupu ‘iate au ha loto ma‘a, ‘e ‘Otua ‘O toe langa‘i ‘i loto ha laumālie totonua.

¹¹‘Oua ‘e kapusi au mei he fe‘ao mo koe; Pea ko ho laumālie tapu ‘oua te ke ‘ave.

¹²Ko e fiefia ‘o ho‘o fakamo‘ui ke ke fakafoki kia kita. Kae poupou au ‘e ha laumālie tau‘atāina.

¹³Te u toki ako ho ngaahi hala ki he kau talangata‘a; Pea ‘e foki kiate koe ‘ani kau angahala.

¹⁴Fakahaofi au mei he halaia toto,[64] ‘E ‘Elohimi ko hoku ‘Otua fakamo‘ui‘anga, Kae fakahīkihiki‘i ‘e hoku ‘elelo ho‘o fakatonuhia.

¹⁵‘Ātonai ‘e ko hoku loungutu ke ke to‘o, Kae ‘a‘au ‘e hoku ngutu ho fakamālō.

¹⁶He ‘oku ‘ikai te ke tangi ki he feilaulau, Ka ne pehē te u ‘atu: Na‘a mo e feilaulau-mōifua ‘Oku ‘ikai te ke manakoa.

¹⁷Ko e feilaulau ki he ‘Otua ko e laumālie lavea: Ko e loto lavea mo mafesifesi ‘e ‘ikai ta‘etoka‘i ‘e he ‘Afiona.

¹⁸Ke ke finangalo ke fai lelei ki Saione: Langa ‘a e ngaahi ‘ā ‘o Selusalema ē.

¹⁹Te ke toki fiema‘u ‘a e feilaulau fakatonuhia, ‘Ani feilaulau-tutu mo mōifua: Te nau toki feia pulu ‘i ho ‘ōlita.