Read KO E TOH TAPU KATOA TONGA KO E SAAME 52 Bible Online

KO E SAAME 52 - KO E TOH TAPU KATOA TONGA bible

KO E SAAME 52

¹(Ki he Pule ‘o e Hiva. Ko e Hiva-ako ‘a Tēvita: ‘i he ha‘u ‘a e ‘Ītomi ko Toeki, ‘o fakahā kia Saula, ‘o pehē, “Ne ha‘u ‘a Tēvita ki he fale ‘o ‘Ahimeleki.”) KO E hā ‘oku ke pōlepole ai ‘i he kovi kuo fai — ‘a e to‘a! Ko e ‘ofa ‘a ‘Ela ‘oku tolonga.

²‘a e manako kākā, ko ho ‘elelo ‘oku fakakaukau fakapō, ‘O hangē ha tele kuo faka‘alo.

³‘Oku ke ‘ofa lahi ki he kovi ‘i he lelei; Pea ki he loi ‘i he lea mā‘oni‘oni. (Sila)

⁴‘a e ‘elelo kākā, Ko ho‘o manako ai pē ‘a e lau faka‘auha.

⁵Ko ‘Ela foki te ne laiki koe ‘o ta‘ehili; Te ne puke koe ‘o hamusi mei ho tēniti, Pea te ne ta‘aki fu‘u mei he fonua ‘o e mo‘ui. (Sila)

⁶Pea ‘e sio ki ai ‘a e kau angatonu, pea te nau ‘apasia, Pea te nau kata manuki ki he toko taha ko ia.

⁷“‘Āua! tā ko e to‘a ia na‘e ‘ikai hūfanga ‘aki ‘a e ‘Otua, Ka ne falala ki he lahi ‘o ‘ene koloa, ‘O ne ta‘emangoi ‘i he fai ‘ene havala.”

⁸Ka ko au te u ‘i he fale ‘o e ‘Otua, ‘O hangē ha fu‘u ‘ōlive laumata. Te u falala ki he ‘ofa ‘a e ‘Otua, ‘O lauikuonga pea tuputupu‘a.

⁹Te u fakafeta‘i kiate koe ‘o ta‘engata, Koe‘uhi ko ho‘o fai ‘a e me‘a ko ia: Pea te u tatali ki ho huafa he ‘oku lelei ia, ‘I he ‘ao ‘o ho kau ‘ofeina.