Read KO E TOH TAPU KATOA TONGA KO E SAAME 55 Bible Online

KO E SAAME 55 - KO E TOH TAPU KATOA TONGA bible

KO E SAAME 55

¹(Ki he Pule ‘o e Hiva. Ke fai mo e ngaahi me‘a helefilo. Ko e Hiva-ako ‘a Tēvita.) FANONGO, ‘Elohimi, ki he‘eku lotu; Pea ‘oua te ke hanga kehe mei he‘eku ngaahi hū.

²Tokanga kiate au, ‘o tali mai: ‘Oku ou hoha‘a tu‘u ‘i he‘eku mamahi, ‘O ‘ikai mata‘ofi ‘eku to‘e tangi;

³Koe‘uhi ko e lea ‘a e fili, Koe‘uhi ko e loki au ‘e he kakai kovi; He ‘oku nau langa‘i ha kovi ke pā ‘iate au, Pea ‘i he‘enau ‘ita ‘oku nau fakatanga‘i au.

⁴‘Oku ou langa loto pē: Pea kuo tō kiate au ‘a e ngeia ‘o e mate.

⁵Ko e manavahē mo e tetetete kuo a‘u kiate au, ‘o hū; Kuo ta‘omi au ‘e he fakalilifu.

⁶Pea u toki pehē, Taumaiā ke u kapakau hangē ha lupe! Ka u toki puna atu ‘o nofo nonga pē.

⁷‘Ā, ‘e mama‘o atu ‘eku hola, Pea te u mālōlō ‘i he lala. (Sila)

⁸Te u kumi vave haku hūfanga Mei he matangi taka mo e afā.

⁹Fakaiku noa, ‘Ātonai ē; ‘Ai ke nau lea kehekehe, He kuo ‘ilo ‘i he kolo ‘a e fakamālohi mo e kē.

¹⁰‘Oku na taka ‘i he funga ‘ā ‘i he ‘aho mo e pō: Pea ko e pau‘u mo e fakamamahi ‘oku nofo mei loto.

¹¹‘Oku lotolotoi ai ‘a e u‘unoa: ‘Oku ‘ikai hiki mei hono mala‘e ‘a e ngāue fefeka mo e kākā.

¹²He tala‘ehai ko ha fili ‘oku taukae‘i kita; Ka ne pehē te u ala kātaki‘i: Tala‘ehai ko e taha ‘i he fa‘ahinga ‘oku fehi‘a mai, ‘a ia ‘oku fakapupula; Pehē te u fufū au mei ai:

¹³Ka ko koe pē, ko e tangata ‘i hoku laine; Ko hoku takanga, mo hoku kaume‘a fafale.

¹⁴Na‘e mālie ‘ema fa‘a talanoa fakaekimaua, Pea ma hoa ‘i he fononga tapu ‘i he ‘alu ki he fale ‘o e ‘Otua.

¹⁵‘Ofa ke mo‘utāmakia kinautolu ‘e he mate, Ke nau ‘alu hifo ki lolofonua ‘oku nau mo‘ui pē: He ko e kovi ‘oku ‘i honau nofo‘anga, ‘o lotolotoi pē.

¹⁶Ka ko au ‘oku ou tautapa ki he ‘Otua; Pea ‘oku fakamo‘ui au ‘e Sihova.

¹⁷Efiafi, pongipongi, mo ho‘atā, ‘oku ou tala ‘eku mamahi, mo to‘e tangi; Pea kuo ongo atu ‘eku lea ki ai.

¹⁸‘Oku ne fakahaofi ‘aupito ‘eku mo‘ui mei he tau na‘e fai mai: He ko e kakai na‘e fai mo au ko e me‘a tokolahi.

¹⁹‘E ongo‘i ‘e he ‘Otua, pea te ne fakavaivai ‘a kinautolu na, (Sila) He ‘oku ne ‘afio ai pē talu mei mu‘a. ‘Io, ‘a kinautolu ‘oku ‘ikai hanau taufetongi, Pea ‘oku ‘ikai te nau ‘apasia kia ‘Elohimi.

²⁰Kuo ala hono nima kiate kinautolu na‘e melino mo ia kuo ne maumau‘i ‘ene fuakava.

²¹‘Oku momole hono ngutu, ko e koto totoka‘i hu‘akau, Ka ko e me‘a ‘oku ‘i hono loto ko e tau: ‘Oku fakamalūlū ange ‘i he lolo ‘ene ngaahi lea, ‘Osi, ko e ngaahi hele ia ‘oku hiki tā.

²²Lī ho‘o kavenga kia Sihova, He te ne poupou koe ‘e ia: ‘E ‘ikai te ne tuku ‘a e mā‘oni‘oni ke ue‘ia ‘o ta‘engata.

²³Ka ko koe, ‘Elohimi, te ke ‘ohifo kinautolu ki he luo faka‘auha. Ko e kau tangata toto‘ia mo kākā, ‘E ‘osi ‘enau mo‘ui te‘eki vaeua; Ka ko au te u falala ki he ‘Afiona.