Read KO E TOH TAPU KATOA TONGA KO E SAAME 56 Bible Online

KO E SAAME 56 - KO E TOH TAPU KATOA TONGA bible

KO E SAAME 56

¹(Ki he Pule ‘o e Hiva. Ke fai‘aki ‘a e fasi “Ko e Lupe noa ‘i he ngaahi potu mama‘o.” Ko e Saame Koula ‘a Tēvita: ‘i he taimi na‘e puke ia ‘e he kau Filisitia ‘i Kati.) ‘OFA MAI, ‘Elohimi, he ‘oku fie folo au ‘e he tangata: Ko e ‘aho kotoa ‘oku nau tau‘i au, ‘o fakamālohia.

²‘Oku fie folo au ‘e hoku ngaahi fili ‘i he ngaahi ‘aho kotoa: He ‘oku tokolahi ‘oku fai tau mai, ‘o tā mei ‘olunga.

³Ko e taimi ‘o ‘eku ilifia, Te u falala ki he ‘Afiona.

⁴‘Ia ‘Elohimi te u pōlepole ‘i he‘ene folofola: ‘Ia ‘Elohimi te u falala ‘o ‘ikai te u ilifia; ‘E lava ha me‘a koā kiate au ‘e ha‘a kakano ‘atā?

⁵Ko e ‘aho kotoa ‘oku nau nofo ko e piko‘i ‘eku fai: Ko ‘enau ngaahi fakakaukau kiate au, ha me‘a pē ke u kovi ai.

⁶‘Oku nau fakataha — Ko e malumu ‘oku nau tuku ai — Ko hoku topuva‘e ‘oku lama ‘e kinautolu na, Hangē ai pē ‘enau feinga‘i ‘eku mo‘ui.

⁷Te nau hao koā ‘i he funga ‘o ‘enau kovi?[65] ‘E ‘Otua, ke ke hifo ki lalo ‘a e fu‘u kakai na ‘i ho‘o tuputāmaki.

⁸Ko ‘eku ‘āunoa ni ‘oku fakalau ‘e he ‘Afiona — ‘Ē, ke ke ‘ai hoku lo‘imata ki ho‘o hina na — ‘Ikai ‘oku tu‘u ‘i ho‘o tohi na?

⁹Toki fakafoki ki mui ai hoku ngaahi fili, ‘oka u ka tautapa atu: Kehe ko e me‘a ni ‘oku ou ‘ilo ki ai: ‘oku kau ‘a e ‘Otua ma‘aku.[66]

¹⁰‘Ia ‘Elohimi ‘oku ou pōlepole ‘i he folofola ‘Ia Sihova ‘oku ou pōlepole ‘i he folofola.

¹¹‘Ia ‘Elohimi ‘oku ou falala, ‘o ‘ikai te u ilifia; Ko e hā ‘e lava kiate au ‘e ha tangata?

¹²‘Oku ‘iate au ‘a e ngaahi tukumo‘ui na‘a ku fai atu, ‘Elohimi: Te u fakaai ki he ‘Afiona ‘eku ngaahi fakafeta‘i.

¹³He kuo ke hamusi hoku laumālie mei he mate: ‘Ikai te ke tauhi mei he hinga hoku va‘e? Ke u taka ‘i he ‘ao ‘o ‘Elohimi ‘i he maama ‘o e mo‘ui.