Read KO E TOH TAPU KATOA TONGA KO E SAAME 59 Bible Online

KO E SAAME 59 - KO E TOH TAPU KATOA TONGA bible

KO E SAAME 59

¹(Ki he Pule ‘o e Hiva. Ki he fasi ko “‘Oua ‘e faka‘auha.” Ko e Saame-Koula ‘a Tēvita ‘i he taimi na‘e fekau ai ‘e Saula ke lama ‘a e fale ke tāmate‘i ia.) ‘E HOKU ‘OTUA, hamusi au mei hoku ngaahi fili; Hiki ki ‘olunga meiate kinautolu ‘oku tu‘u mai.

²Hāmusi au mei he kakai ‘oku mo‘ui ‘aki ‘a e angahala, Pea fakahaofi au mei he kau siana toto‘ia.

³He vakai kuo nau puleaki‘i ‘eku mo‘ui; ‘Oku nau fakataha ke fai me‘a kiate au ko e koto mālohi; Ka tala‘ehai ko ha‘aku ngāue kovi kuo fai, pe ko ha‘aku angahala, ‘Eiki.

⁴Ta‘eha‘aku kovi ‘oku nau felelei ke fakatē mai: Ke ke ‘ā ke fakafetaulaki kiate au, ‘o vakai.

⁵‘Io, ko koe, Sihova ‘Elohimi Sāpaoti ‘a e ‘Otua ‘o ‘Isileli, O‘i ke ‘a‘ahi kotoa ‘a e hīteni: ‘Oua te ke mamae‘i ha toko taha ‘i he kau kovi ‘oku lavaki. (Sila)

⁶‘Oku nau foki efiafi, ‘Oku nau kālou hangē ha kulī, ‘Oku nau foli takai ki he kolo ni.

⁷‘Oi! ‘a e pu‘aki ‘e honau ngutu na; Tā ko honau loungutu ko e ‘ainga heletā: “Ko ia ai, pē, he ko hai ‘oku ongona?”

⁸Ka ko koe, ‘Eiki, ‘oku ke kata kiate kinautolu na; ‘Oku ke manukia ‘a e hīteni kotoa.

⁹‘E hoku mālohinga, ko koe te u tauhi ki ai: He ko hoku taua ‘a ‘Elohimi.

¹⁰Ko hoku ‘Otua te ne fakafetaulaki kiate au mo ‘ene meesi: ‘E tuku ‘e ‘Elohimi ke u sioa hoku ngaahi fili.

¹¹‘Oua ‘e tāmate‘i kinautolu, Na‘a ngalo ‘a e me‘a ‘i he kakai ‘o‘oku: Fai ‘aki ho ivi ke nau ‘āunoa, pea toki tulaki kinautolu, ‘E ‘Ātonai ko homau fakaū.

¹²‘Oku angahala tu‘u honau ngutu ‘i he me‘a ‘oku tō mai, Ko ia tuku ke puke kinautolu ‘i he‘enau fielahi, Pea koe‘uhi ko e kape mo e loi ‘oku nau lea‘aki.

¹³Faka‘auha kinautolu ‘i ho‘o tuputāmaki, Faka‘auha ke ‘oua te nau toe ‘i ai: Ke nau ‘ilo ‘oku pule ‘i Sēkope ‘a ‘Elohimi, ‘O fai atu ki he ngata‘anga ‘o māmani. (Sila)

¹⁴Pea te nau foki efiafi, Te nau kālou hangē ha kulī, Pea te nau foli takai ki he kolo ni.

¹⁵Te nau holi fano he kumi kai ‘a kinautolu na; Ka ‘ikai ma‘u te nau mohe fiekaia.

¹⁶Ka ko au te u hiva‘aki ho ivi; Pea te u kalanga‘aki ho‘o ‘ofa ‘i he pongipongi: He ko e fu‘u taua koe kiate au, Mo e hūfanga ‘i he ‘aho na‘a ku faingata‘a‘ia ai fau.

¹⁷‘E hoku mālohinga, ko koe te u tā ha‘ape ki ai: He ko hoku taua ‘a ‘Elohimi ko e ‘Otua ‘o ‘eku meesi.