Read KO E TOH TAPU KATOA TONGA KO E SAAME 63 Bible Online

KO E SAAME 63 - KO E TOH TAPU KATOA TONGA bible

KO E SAAME 63

¹(Ko e Saame ‘a Tēvita; ko e taimi na‘a ne ‘i he Toafa ‘o Siuta ai.) ELOHIMI ē, ko koe hoku ‘Otua; Talu ai ‘eku hakule ki he ‘Afiona, ‘Oku fie inu ki he ‘Afiona hoku laumālie ni, ‘Oku vaivai he holi atu hoku kakano ni, ‘I he fonua mōmoa mo fie inu he honge vai.

²Kuo pehē ‘eku fakasio ‘i he fale tapu Ke māta‘i ‘a e ivi mo e kolōlia ‘o‘ou.

³‘Oku mahu‘inga ange ho‘o ‘ofa ‘i he mo‘ui ni, Ko ia ai, ‘e fakamālō ki he ‘Afiona ‘e hoku ngutu ni.

⁴Pehē ‘eku fakafeta‘i atu lolotonga ‘eku mo‘ui: ‘I he hua‘aki ho huafa te u hiki hoku nima ni.

⁵Ko hoku laumālie ‘e topono hangē kuo kai me‘a ngako mo lolo; Pea mavava hoku ngutu he fakamālō.

⁶Ka u ka manatu kiate koe ‘i hoku mohenga, ‘Oku ‘osi ‘a e pō mo ‘eku fakalaulauloto ki he ‘Afiona.

⁷He kuo ke hoko ko e tokoni kiate au, Pea te u mavava ‘i he malu ‘o ho kapakau.

⁸Ko hoku laumālie kuo ne molomolomuiva‘e atu, Pea pukepuke au ‘e ho nima to‘omata‘u.

⁹Ka ko kinautolu ‘oku tuli ‘eku mo‘ui ke ‘auha Te nau ‘alu ki Lolofonua.

¹⁰‘E li‘aki kinautolu ki he ivi ‘o e heletā, Ko e ‘inasi ‘o e fanga siakali honau iku‘anga.

¹¹Ka ko e tu‘i te ne viki ‘i he ‘Otua: ‘E pole ‘a e kakai ‘oku fuakava ‘iate ia; Kae tāpuni ‘a e ngutu ‘o ha‘a lea kākā.